ءدارىس بارىسىندا بولات سەرعازى ۇلى الەمدىك جانە ءداستۇرلى دىندەر كوشباسشىلارىنىڭ VII سەزى مەن ونىڭ قورىتىندى دەكلاراتسياسىنىڭ نەگىزگى حابارلامالارى ءىس-شارانىڭ ناتيجەلەرى تۋرالى اڭگىمەلەدى. سەزد شەڭبەرىندە قابىلدانعان, ساياساتكەرلەر, حالىقارالىق ۇيىمداردىڭ جەتەكشىلەرى قول قويعان, قورىتىندى قۇجات سانالاتىن دەكلاراتسيانىڭ مىندەتتەرىن جۇزەگە اسىرۋ, يدەيالارىن ودان ءارى ىلگەرىلەتۋ ماڭىزدى ەكەنى ايتىلدى.
«الەم حالىقتارىنىڭ بەيبىت ءومىرى ءۇشىن ءاربىر ادام ءوز ۇلەسىن قوسۋى كەرەك. سىزدەر تاڭداعان ءدىنتانۋ, تەولوگيا جانە يسلامتانۋ ماماندىقتارى – بۇگىنگى تاڭدا الەمدىك دەڭگەيدەگى ەڭ سۇرانىسقا يە ماماندىق. بۇل ماماندىق سىزدەرگە الەمدەگى بولىپ جاتقان حاوستاردى توقتاتاتىن, ءاربىر ادامنىڭ جۇرەگىنە جول تاۋىپ, سونگەن ءۇمىتتى جاعاتىن, ۇزىلگەن ءۇمىتتى جالعايتىن مول جاۋاپكەرشىلىك جۇكتەيدى. رۋحاني ءھام تاريحي-مادەني قۇبىلىستاردى جەتە مەڭگەرىپ, ادام بولمىسىنىڭ ءار-قىرىنا ۇڭىلەتىن ءدىنتانۋ-تەولوگيا سالاسىنىڭ ماماندارىنان مەملەكەت ۇلكەن ءۇمىت كۇتەدى.
قوعامنىڭ ءاربىر وكىلىنىڭ جۇرەگىنە ەرتەڭگى كۇنگە دەگەن ۇلكەن سەنىمگە جەتەلەيتىن, دۇرىس باعىت كورسەتۋگە ءتيىس تە وسى سالانىڭ ماماندارى. سوندىقتان اتالعان سالانىڭ ماماندارى ءتول تاريحىمىزدى تەرەڭ ءبىلۋى كەرەك. ەلىمىزدىڭ تاريحى وتە باي, ونى ۇنەمى وقىپ, ۇيرەنۋدەن جالىقپاۋىمىز كەرەك. تاريحتان ساباق الىپ, بولاشاقتىڭ يگى كادەسىنە جاراتا ءبىلۋىمىز كەرەك. سىزدەردەن تۋعان ولكەنىڭ ءدىن تاريحىن, سالتى مەن ءداستۇر ەرەكشەلىگىن, ۇلتتىق قۇندىلىقتارىمىزدىڭ قالىپتاسۋ كەزەڭدەرى, تانىمدىق ەرەكشەلىكتەرىمىز سياقتى قۇبىلىستاردى باعامداي الاتىن ماماندار شىعادى دەپ ۇمىتتەنەمىز», دەدى بولات سەرعازى ۇلى.
سونداي-اق ورتالىق توراعاسى ءوزى باسقارىپ وتىرعان دامىتۋ ورتالىعىنىڭ قىزمەتتەرى جونىندە, ونىڭ ماقسات-مىندەتتەرىن, اتقارىلعان ماڭىزدى جۇمىستارى تۋرالى مالىمەتتەر بەردى. ستۋدەنتتەر مەن ماگيسترانتتارعا ن.نازارباەۆ كونفەسسياارالىق جانە وركەنيەتارالىق ديالوگتى دامىتۋ ورتالىعى مەن احمەت ياساۋي ۋنيۆەرسيتەتى اراسىنداعى مەموراندۋم اياسىندا وندىرىستىك تاجىريبەدەن ءوتۋ مۇمكىندىگىن پايدالانۋدى ۇسىندى.
كەزدەسۋدەن سوڭ قوناقتار تەولوگيا فاكۋلتەتى ستۋدەنتتەرىننىڭ ۇيىمداستىرۋىمەن ءوتىپ جاتقان «ناۋرىز كوجە» اكتسياسىنا قاتىستى.
تۇركىستان
