ۇلىستىڭ ۇلى كۇنىنە وراي وتكىزىلىپ جاتقان ءىس-شارالار اياسىندا «ناۋرىز – ۇلتتىق ءداستۇر مەن مەيماندوستىق مەرەكەسى» اتاۋىمەن, ۇلتتىق بولمىسىمىز, مادەنيەتىمىز بەن كيىمىمىزدى دارىپتەۋگە ارنالعان باستامانى وبلىس اكىمى دارحان ساتىبالدى ۇسىنىپتى. ءوڭىر باسشىسى اكىمدىكتەگى اپپاراتتىڭ كەزەكتى وتىرىسىن ۇلتتىق كيىمدە وتكىزدى. ارىپتەستەرىن كەلە جاتقان ناۋرىز مەرەكەسىمەن قۇتتىقتاعان وبلىس اكىمى ۇلتتىق كيىم مەملەكەتتىك قىزمەتشىنىڭ بولمىسىن ەرەكشە ەتىپ كورسەتەتىنىن ايتىپ ءوتتى. «مادەنيەتىمىز بەن ءداستۇرىمىزدى قولداعان ءجون. ناۋرىز جاقسىلىعىمەن كەلىپ, حالقىمىزدىڭ بەرەكەسى ارتا بەرسىن», دەگەن دارحان ساتىبالدى كۇن تارتىبىندەگى ماسەلەلەردى تالقىلاپ, تاپسىرمالار بەردى.
قازاقتىڭ ۇلتتىق كيىمدەرى كوشپەلى زاماننىڭ سالت-داستۇرىمەن بۇگىنگە دەيىن جالعاسىن تاۋىپ كەلەدى. جىل مەزگىلدەرىنە ساي ارنايى جاسالعان تۇرلەرى, ەرلەرگە, ايەلدەرگە, بالالارعا ارنالعان جانە تاعى دا باسقا جاس ەرەكشەلىگىنە قاراي بولىنەتىن ءتۇرى كوپ كەزدەسەدى. پىشىندەرى مەن ناقىشتارى وزگەشە تازا ۇلتتىق كيىمنىڭ بۇگىنگى زامانعا سايكەستىرىلە, سۇرانىسقا ساي تىگىلگەن تۇرلەرى دە كوپ. ەڭ ادەمى كيىم ۇلتتىق كيىم ەكەنىن ناسيحاتتاپ, جۇمىسقا ەرەكشە كوڭىل كۇيمەن كەلگەن مەملەكەتتىك قىزمەتشىلەرگە جەرگىلىكتى جۇرت تا قىزىعا قارايدى. بارلىق مەملەكەتتىك مەكەمەلەردىڭ قىزمەتكەرلەرى قولداعان بۇل باستاما جالعاسىن تاۋىپ, الداعى ۋاقىتتا دا ۇلتتىق كيىم كيۋ داستۇرگە اينالماق.
تۇركىستان
