اقمارال بۇعان دەيىن ءۇش بالانى ومىرگە اكەلگەن. ونىڭ ۇلكەن ۇلى 8 جاستا.
ۇشەمنىڭ ۇلكەنى - قاراكوزدىڭ سالماعى 2460 گر, سادىق - 2100 گر, سىدىق - 1820 گر. قاراساي اۋدانارالىق كوپ بەيىندى انا مەن بالا دەنساۋلىعىن ساقتاۋ اۋرۋحاناسى ديرەكتورىنىڭ ورىنباسارى ينديرا كاباەۆا ايەلدىڭ جۇكتىلىك كەزىندە قاتاڭ باقىلاۋدا بولعانىن ايتتى.
«ۇشەمدەر جۇكتىلىكتىڭ 36-شى اپتاسىندا دۇنيەگە كەلدى. ۇشەمنىڭ جۇكتىلىگى ارقاشان انا مەن سابيلەر ءۇشىن ۇلكەن قاۋىپ سانالادى, سوندىقتان ايەل بۇكىل ۋاقىت بويى باقىلاۋدا بولدى. ۇشەم كەسار تىلىگى ارقىلى دۇنيەگە كەلدى. بۇگىندە ولاردىڭ دەنساۋلىعى جاقسى, جاعدايى تۇراقتى», دەدى ينديرا كاباەۆا.
اتا-انالار قاراساي اۋدانارالىق كوپ بەيىندى اۋرۋحاناسىنىڭ بارلىق مەديتسينا قىزمەتكەرلەرىنە بىلىكتى كومەك كورسەتكەنى ءۇشىن العىستارىن ءبىلدىردى.
«اۋرۋحانانىڭ بۇكىل بوساندىرۋ بولىمشەسىنە, وپەراتسيا جاسايتىن جانە ەمدەۋشى دارىگەرلەرىنە زور العىسىمدى بىلدىرەمىن. مەديتسينالىق مەكەمەلەردە قولايلى جاعداي جاساعاندارى, زاماناۋي جابدىقتاردىڭ بولۋى, بىلىكتى مامانداردىڭ جوعارى كاسىبيلىگى ءۇشىن راحمەت. سىزدەردىڭ ارقالارىڭىزدا ءبىزدىڭ سابيلەر ءدىن امان ومىرگە كەلدى», دەدى سابيلەردىڭ اناسى.
ينديرا كاباەۆانىڭ ايتۋىنشا, جاڭا تۋعان نارەستەلەرگە كۇتىم جاساۋ بويىنشا بارلىق قاجەتتى كومەك كورسەتىلەدى.
«اناعا مەيىرگەرلەر كومەكتەسەدى, ال ۋچاسكەلىك دارىگەر نارەستەلەردىڭ جاعدايىن باقىلاۋدا ۇستايدى. سونداي-اق ولاردى قاجەتتى بالالار تاماعىمەن قامتاماسىز ەتەمىز», دەدى ول.
