ورالدىق جاس سازگەر, بولاشاعى زور ونەرپاز دانيار تاڭاتاروۆ باسقاراتىن «الاش» ەتنو-فولكلورلىق ءانسامبلى 2019 جىلى قۇرىلعان. 2020 جىلى ناۋرىز ايىندا العاشقى كونتسەرتىن بەرۋ ءۇشىن دايىندالىپ جاتقاندا اياق استىنان پاندەميا باستالىپ كەتتى. كوپشىلىك شارا وتكىزۋگە تىيىم سالىندى. ءسويتىپ جاس ۇجىم ەكى جىلداي ەل الدىنا شىعا الماي قالدى.
– بۇل ءالى قالىپتاسا قويماعان جاس ۇجىمعا وڭاي بولعان جوق. انسامبل مۇشەلەرىنىڭ دەنى جاستار, ستۋدەنتتەر بولاتىن. ەكى جىل ىشىندە وقۋىن ءبىتىرىپ, ءومىر اعىنىمەن ءار تاراپقا كەتكەنى بار. ءسويتىپ, وسى كونتسەرتكە «الاش» ءانسامبلى جاڭعىرىپ, جاسارىپ كەلدى. رەپەرتۋارى دا بايىپ, كەڭەيە ءتۇستى, – دەيدى ورال قالالىق مادەنيەت جانە تىلدەردى دامىتۋ ءبولىمىنىڭ باسشىسى سەرىك قايىرليەۆ.
شىنىندا دا ەكى جىلدىق ەرىكسىز شەكتەۋ «الاش» توبىنا جاقسىلىق تا اكەلگەن: انسامبل مۇشەلەرىنە جاڭا كيىم تىگىلىپ, مۋزىكالىق اسپاپتارمەن قامتىلعان. كوك ءبورى تەرىسىمەن ادىپتەلگەن ادەمى ۇلتتىق كوستيۋمدەر بەلگىلى شەبەر, «مەكو» ديزاين-ستۋدياسىنىڭ ديرەكتورى مەڭدىبەك نۇرعاليەۆتىڭ قولىنان شىعىپتى. ءسويتىپ, سىرتقى ءسانى مەن ىشكى مازمۇنى كەلىسكەن ادەمى ونەر ۇجىمى ساحناعا شىققان.
ىشكى مازمۇن دەمەكشى, «الاش» ەتنو-فولكلورلىق ءانسامبلى دەپ اتى ايتىپ تۇرعانداي, ۇجىم جەتەكشىسى دانيار تاڭاتار ۇلى ءاۋ باستان رەپەرتۋاردى كەرەمەت تاڭداعان. انسامبل مۇشەلەرىنىڭ ورىنداۋىندا قارشىعا احمەدياروۆتىڭ «التىن ۇيا» كۇيى, جاسارال ەڭسەپوۆتىڭ دەككو ستيلىندەگى «اكە تولعاۋى» شىعارماسى, باۋىرلاس نوعاي حالقىنىڭ جىرشىسى ارسلانبەك سۇلتانعاليەۆتىڭ «دومبىرا», «الاش ۇرانى» تۋىندىلارى, «مولدابايدىڭ ءانى» ەرەكشە شىقتى. انشىلەر البينا ناۋرىزاليەۆا, ەرنار ءومىرالى, ءادىل جالەتدەنوۆ قۇلاق قۇرىشىن قاندىردى.
دەگەنمەن, كونتسەرتتىڭ باستى جاڭالىعى – دانيار تاڭاتاروۆتىڭ ءوزى شىعارعان اسپاپتىق تۋىندىلار بولدى. التىن وردا حاندىعىنىڭ 750 جىلدىعىنا ارناپ جازىلعان «التىن وردا» كۇيى, «جاڭا قازاقستان», «سازسىرناي», «ەلىمە ارناۋ», «ازات», «قانداعى قاسيەت» شىعارمالارى ەرەكشە ەكپىنىمەن, تىڭ سارىنىمەن ەستە قالدى. ءبىر ەرەكشەلىگى, كونتسەرتتى توپ جەتەكشىسى دانياردىڭ ءوزى جۇرگىزىپ, ءار شىعارمانىڭ ءمان-مازمۇنىن اشىپ وتىردى.
«سازسىرناي اسپابى – بالا وبرازىن, ونىڭ سۇيكىمدى قىلىعى مەن قۋانىش كۇلكىسىن تاپ باسىپ سومدايتىن بىردەن ءبىر اسپاپ. الايدا وسى شىعارمادا سازسىرناي جەتكىزەتىن ءبىر مۇڭ دا بار. بۇل تۋىندىمدى مەن «بالا باقىتى» دەپ اتادىم. ءبىز جەتىمىن جىلاتپاعان, جەسىرىن قاڭعىرتپاعان ەلمىز. توقسان اۋىز ءسوزدىڭ توبىقتاي ءتۇيىنى – ءسابيدىڭ ءبارى باقىتتى بولۋى ءۇشىن جارالعان!» – دەدى دانيار كەزەكتى شىعارماسىن تانىستىرعان كەزدە. ءسويتىپ, سازسىرنايعا ارنالعان شىعارماسىن ءانسامبلدىڭ سۇيەمەلدەۋىمەن ءوزى ورىنداپ بەردى.
كونتسەرتتە الەمدىك مۋزىكا الەمىنىڭ جانكۇيەرلەرى دە سىي-سياپاتسىز قالمادى. بەلگىلى Beltaine توبىنىڭ رەپەرتۋارىنان «Bring to the boil» شىعارماسى, الەمگە ايگىلى نيرۆانا توبىنىڭ «Smells like teen Spirit» ءانى ينسترۋمەنتالدى نۇسقادا ۇسىنىلدى. «ونەردە شەكارا جوق» دەگەن وسى عوي.
– «الاش» ەتنو-فولكلورلىق ءانسامبلىنىڭ وسى رەپەرتۋارىن باتىس قازاقستان وبلىسىنىڭ بۇكىل اۋدانىنا گاسترولدىك ساپار جوسپارلاپ, حالىققا ۇسىنعىمىز كەلەدى. ال بولاشاقتا قازاق ونەرىنىڭ ورەلى ءبىر بيىگى رەتىندە كەز كەلگەن شەتەلدىك ساحناعا دا شىعۋدان باس تارتپايمىز, – دەيدى دانيار تاڭاتاروۆ.
باتىس قازاقستان وبلىسى
