«جۇمىستان ۇيگە كەشكى 20.00-دەر شاماسىندا كەلگەن ەدىم. ۇيگە جاقىنداعاننان-اق قاربالاس قيمىل, جيىلعان جۇرتتى بايقادىم. بۇكىل اۋلامىز ايدىن كولگە اينالعان. ءبىزدىڭ جانىمىزداعى ءۇيدىڭ جەرتولەسىنە سۋ قۇيىلىپ كەتىپتى. كوپ كەشىكپەي ءبىزدىڭ ءۇيدىڭ دە استى سۋعا تولدى. قاۋىپسىزدىك ءۇشىن ءۇيدى ەلەكتر جەلىسىنەن اجىراتتىق. مەن ءوزىم قۇجاتتارىمدى ازىرلەپ, تۇنگى ساعات 03.00.-گە دەيىن ۇيىقتامادىم», دەيدى مۇرات موڭكە ۇلى كوشەسىندەگى №105/1 ۇيدە تۇراتىن ايگۇل ورازبەكوۆا. موڭكە ۇلى كوشەسىنەن كوپقاباتتى 8 ءۇيدىڭ جەرتولەسىنە سۋ كىرىپ, ەلەكتر جەلىسىنەن اجىراتىلعانى بەلگىلى بولدى. مىنە, ءبىر تاۋلىككە جاقىندادى, ول ۇيلەر جارىقسىز وتىر.
«2023 جىلعى 12 ناۋرىزدا ساعات 15.00-دەن باستاپ تەمپەراتۋرانىڭ +12 گرادۋسقا دەيىن كۇرت كوتەرىلۋى جانە قاردىڭ قارقىندى ەرۋى ناتيجەسىندە سارىتاۋ جانە «سۆيستۋن» تاۋلارىنان (بيىكتىگى 300 م.) قالاعا ەڭىس جەرلەرمەن زاشاعان كەنتىنىڭ ساراتوۆ تراسساسى بويىنداعى جۇمىس ىستەپ تۇرعان ارنالار بويىمەن سۋدىڭ كوپ مولشەرى كەلىپ, ەرىگەن سۋ كولەمى جوبالىق وتكىزۋ قابىلەتتىلىگىنەن اسىپ ءتۇستى. ناتيجەسىندە, سارىتاۋ شاعىن اۋدانى بويىنشا سۋ جايىلدى», دەپ حابارلادى توتەنشە جاعدايلار دەپارتامەنتىنىڭ ءباسپاسوز قىزمەتى.
موڭكە ۇلى كوشەسىندەگى تۇرعىنداردى قۇتقارۋ ءۇشىن جەرگىلىكتى اتقارۋشى ورگاندار, توتەنشەلىكتەر, ۇلتتىق ۇلان ساربازدارى تىزە قوسىپ جۇمىلىپ, 250-دەي ادام, 200-گە تارتا تەحنيكا كەنتتەگى تۇرعىن ۇيلەردى ودان ءارى سۋ باسۋعا جىبەرمەي الىپ قالدى. كوپقاباتتى 2 ءۇيدىڭ جەرتولەسىنەن سۋ سورىلىپ, تازارتىلعان.
ورال قالاسى بويىنشا 27 قۇراما-ەۆاكۋاتسيالىق پۋنكت بەكىتىلگەن. سۋ باسۋ قاۋپى تونگەن جاعدايدا حالىقتى ورنالاستىرۋ ءۇشىن قوسىمشا 10 مەكتەپ, 1 مادەنيەت ءۇيى جانە 1 سپورت كەشەنى ءازىر تۇر. بۇعان قوسا قاجەت جاعدايدا حالىقتى كوشىرۋگە 30 اۆتوبۋس, ورال قالاسىنان 2 قوناقۇي دايىندالعان.
اۋدانداردان دا الاڭداۋشىلىق ءبىلدىرىپ جاتقاندار بار. قاراتوبە اۋدانىندا قالدىعايتى وزەنى اققوزى اۋىلىنىڭ تۇسىندا وتكەلدى بۇزعانىن, قاراتوبە – جىمپيتى ارالىعىندا اۆتوجول ۇستىنەن قارعىن سۋ وتكەنىن, ءبورلى اۋدانىندا دا قاۋىپتى احۋال قالىپتاسقانىن حالىقتىڭ ءوزى حابارلاپ جاتىر.
بايتەرەك اۋدانىندا تجد جەدەل-قۇتقارۋ جاساعىنىڭ قۇتقارۋشىلارى دالادا قالعان 20 باس قويدى قۇتقارىپ, سۋدىڭ ارعى بەتىنەن موتورلى قايىقپەن الىپ شىققان.
باتىس قازاقستان وبلىسى
