قازاقستان مەن ەو اراسىنداعى ىنتىماقتاستىقتىڭ جوعارى دەڭگەيى ەكونوميكالىق سالادا الەۋەتتى ىسكە اسىرۋ ءۇشىن قولايلى جاعدايلار قالىپتاستىردى. ەۋروپالىق وداق – قازاقستاننىڭ ەڭ ءىرى جانە ماڭىزدى ساۋدا سەرىكتەسى, ونىڭ ۇلەسىنە ەلدىڭ سىرتقى ساۋداسىنىڭ شامامەن 30 پايىزى تيەسىلى. 2022 جىلعى تاۋار اينالىمىنىڭ كولەمى 2021 جىلعى كورسەتكىشتەن 27, پايىزعا ءوسىپ, 40 ملرد اقش دوللار (ەكسپورت – 32,3 ملرد, يمپورت – 7,6 ملرد) قۇرادى. ەو ەلدەرىمەن ينۆەستيتسيالىق ىنتىماقتاستىق تا جاڭا ساپالى دەڭگەيگە كوتەرىلۋدە. 2022 جىلدىڭ 9 ايىندا ينۆەستيتسيالار اعىنى 10 پايىزعا وسىپ, 8 ملرد اقش دوللاردى قۇرادى.
«قازاقستاننىڭ ەۋروپامەن ءوزارا ارەكەتتەسۋى تاۋەلسىزدىك جىلدارىندا ەلىمىزدىڭ كوپۆەكتورلى, پراگماتيكالىق جانە تەڭگەرىمدى سىرتقى ساياساتىنىڭ نەگىزگى كومپونەنتتەرىنىڭ ءبىرى بولىپ قالا بەرەدى. 2020 جىلعى ناۋرىزداعى پرەزيدەنت قاسىم-جومارت توقاەۆ ءوز جارلىعىندا 2020-2030 جىلدارعا ارنالعان سىرتقى ساياسات تۇجىرىمداماسىنىڭ ەۋروپالىق وداقپەن جانە ەۋروپالىق مەملەكەتتەرمەن ىنتىماقتاستىقتى ودان ءارى دامىتۋ ماڭىزدى باسىمدىقتاردىڭ ءبىرى رەتىندە بەكىتتى», دەدى سىرتقى ىستەر ءمينيسترىنىڭ ورىنباسارى ر. ۆاسيلەنكو.
قازاقستان مەن ەۋروپالىق وداق كاىك-تى تولىق ىسكە اسىرۋ ماقساتىندا ءوزارا ءتيىمدى ەكىجاقتى قاتىناستاردى ودان ءارى دامىتۋعا جانە نىعايتۋعا بەرىك ۇستانىمىن ساقتاپ وتىر.
«وتكەن جىلى وڭىرىمىزدە جانە الەمدە بولعان ەلەۋلى گەوساياسي جانە گەوەكونوميكالىق سىلكىنىستەرگە قاراماستان, ەۋروپامەن قارىم-قاتىناسىمىزدىڭ دەڭگەيى كوتەرىلىپ, ونىڭ ءمانى ارتا ءتۇستى. ءبىزدىڭ مەملەكەت باسشىسىنان باستاپ, ەۋروپالىق وداق ينستيتۋتتارىنىڭ جانە جەتەكشى ەۋروپالىق مەملەكەتتەردىڭ باسشىلارىمەن بارلىق دەڭگەيدەگى ساياسي ديالوگىمىز نىعايا ءتۇستى. اتاپ ايتقاندا, استاناعا اندوررا, گەرمانيا, گرەتسيا, پولشا, ليتۆا, ماجارستان جانە باسقا دا ەۋروپا ەلدەرىنىڭ سىرتقى ىستەر جانە كولىك مينيسترلەرى كەلدى. ءوز كەزەگىندە, قر پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى ۇلىبريتانياعا, گەرمانياعا, پولشاعا, اۋسترياعا, ليۋكسەمبۋرگكە, پورتۋگالياعا, سولتۇستىك ماكەدونياعا ساپارمەن بارىپ, فرانتسيا, سلوۆەنيا, كيپر, نورۆەگيا, شۆەتسيا مەن ەستونياداعى ارىپتەستەرىمەن ەكىجاقتى كەلىسسوزدەر جۇرگىزدى», دەپ مالىمدەدى ر.ۆاسيلەنكو.
ءباسپاسوز كونفەرەنتسياسىنىڭ سوڭىندا ءمينيستردىڭ ورىنباسارى ەۋروپالىق سەرىكتەستەردىڭ ەكىجاقتى ىنتىماقتاستىقتىڭ بارلىق سپەكترىن ىلگەرىلەتۋگە جوعارى قىزىعۋشىلىعىن اتاپ ءوتتى.
