جۇزدەن جۇيرىك قىركۇيەكتە انىقتالادى

ورتالىق كوممۋنيكاتسيالار قىزمەتىنىڭ كەشەگى بريفينگى پرەزيدەنت جانىنداعى ايەلدەر ىستەرى جانە وتباسىلىق-دەمو­گرافيالىق ساياسات جونىندەگى ۇلتتىق كوميسسيا ۇيىمداستىرعان «مەرەيلى وتباسى» بايقاۋىنىڭ العاشقى كەزەڭدەرىنىڭ قورى­تىندىسىنا ارنالدى. انا مەن بالانى قورعاۋ, وتباسى ينستيتۋتىن نىعايتۋ, سونداي-اق, وتباسىلىق قۇندىلىقتاردى, تاريحي ءداستۇر مەن مادەنيەتتى ساقتاپ, جاستاردى ادامگەرشىلىككە باۋلۋ تۋرالى ەلباسى تاپسىرماسىنا وراي پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ جۇيەلى جۇمىستار اتقارىپ كەلە جاتقانى انىق. سول يگىلىكتى ىستەردىڭ ءبىرى – بىلتىر  قىركۇيەك ايىنىڭ ەكىنشى جەكسەنبىسىندە تۇڭعىش رەت وتباسى كۇنى تويلانعانى دا كوپشىلىكتىڭ جادىندا. ەلەۋلى مەرەكەنىڭ قارساڭىندا العاش رەت «مەرەيلى وتباسى» اتتى ۇلكەن بايقاۋدىڭ تۇساۋى كەسىلىپ, ونىڭ جەڭىمپازدارى كەزەڭ-كەزەڭ بويىنشا انىقتالۋى ءتيىس بولعان. ءبىرىنشى كەزەڭ اۋداندار مەن قالا دەڭگەيىندە وتكەن بولسا, ەكىنشى كەزەڭ قاتىسۋشىلارى  وبلىستار مەن الماتى جانە استانا قالالارى دەڭگەيىندە جۇلدەلى ورىندارعا يە بولدى. مۇنداعى نەگىزگى ماقسات – قازاقستاندىق وتباسىنىڭ وڭ ءيميدجىن دارىپتەۋ, جاستارعا باقىتتى جۇبايلىق ءومىردى ناسيحاتتاۋ دەسەك قاتەلەسە قويماسپىز. كەزەڭ-كەزەڭمەن وتكىزىلگەن ۇلكەن بايقاۋدىڭ الدا شەشۋشى كەزەڭى تۇر. رەسپۋبليكالىق دەڭگەيدە ءوتىپ, جۇزدەن جۇيرىكتى انىقتايتىن بايگەگە وبلىستار مەن استانا جانە الماتى قالالارىندا جەڭىمپاز بولعان 16 وتباسى جولداما العان. وسى بايقاۋدىڭ جاي-جاپسارى تۋرالى اڭگىمەلەگەن ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ماحاببات سانسىزباەۆا بايقاۋعا قاتىسۋعا نيەت بىلدىرگەن ءاربىر وتباسىنىڭ وزىندىك ەرەكشەلىكتەرى مەن ارتىقشىلىقتارى بولعانىن, ولاردى انىقتاۋ ايماقتا جۇمىس ىستەگەن كوميسسيا مۇشەلەرىنە وڭايعا سوقپاعانىن ايتا كەلە, 500-گە جۋىق وتباسىنىڭ ىشىنەن ىرىكتەلگەن 16 وتباسى الداعى 12 قىركۇيەكتە وتەتىن بايقاۋدا باق سىنايتىنىن جەتكىزدى.  «23 مامىر كۇنى رەسپۋبليكالىق كەزەڭگە وتكەن جەڭىمپازدار انىقتالدى. اتاپ ايتار بولساق, استانا قالاسى بويىنشا جەڭىمپاز دەپ تانىلعان احمەتوۆتەر وتباسى تەمىرجولشىلار اۋلەتى بوپ ەسەپتەلەدى. ولاردا 67 ادام تەمىرجولدا ەڭبەك ەتەدى. الماتى قالاسىندا الەمدەگى 14-كە جۋىق شىڭدى باعىندىرعان الپينيستەر وتباسى جۇماەۆتار جەڭىس تۇعىرىنان كورىندى.  اقمولا وبلىسى بويىنشا جەڭىمپاز اتانعان مۇقاشەۆتار وتباسىنىڭ پەداگوگيكالىق ءوتىلى 300 جىلدان اسادى ەكەن. الماتى وبلىسى بويىنشا جەڭىمپاز دەپ تانىلعان ەسحوجيندەر وتباسى 340 بالانى اسىراپ الىپ, ەلباسىنىڭ قولىنان سىيلىق العان.  اتىراۋ وبلىسىنىڭ جەڭىمپاز وتباسى – بەشىموۆتەردىڭ 3 بۋىن ۇرپاعى مۇناي سالاسىندا ەڭبەك ەتەدى» – دەدى ماحاببات بەكبوسىنوۆا. ول سونداي-اق, ءاربىر وبلىس بويىنشا جەڭىمپاز دەپ تانىلعان وتباسىلاردىڭ بارلىعىن اتاپ شىعىپ, ولارعا ءتان ەرەكشەلىكتەردى بايانداپ بەردى. بريفينگكە ۇلتتىق كوميس­سيا­نىڭ ءتورايىمىنان وزگە «رەسپۋب­ليكالىق بالالاردى وڭالتۋ ورتا­لىعى» اق ديرەكتورلار كەڭەسىنىڭ توراعاسى بەكسۇلتان تۇتقىشەۆ, «قازاقستاننىڭ ىسكەر ايەلدەرى قاۋىمداستىعى» رقب پرەزيدەنتى راۋشان سارسەمباەۆا, سونداي-اق, «دامۋ» كاسىپكەرلىكتى قولداۋ قورى» اق باسقارما ءتورايىمى ءلاززات يبراگيموۆا قاتىسىپ, ۇلتتىق كوميسسيانىڭ ۇيىتقى بولۋىمەن جۇزەگە اسقان باسقا دا ءىس-شارالار تۋرالى بايانداپ بەردى. ايگۇل سەيىلوۆا, «ەگەمەن قازاقستان».