اگەنتتىكتىڭ جازۋىنشا, ءزىلزالانىڭ اۋقىمدى زاردابىنا بايلانىستى تەرگەۋ شارالارى جالعاسىپ جاتىر. وسى ۋاقىت ارالىعىندا تۇركيانىڭ باس پروكۋراتۋراسى ادام ولىمىنە اكەپ سوقتىرعان ساپاسىز قۇرىلىسقا 1068 تۇلعانىڭ قاتىسى بارىن انىقتاعان.
320 كۇدىكتى ەلدەن كەتپەۋ تۋرالى كەپىلمەن بوساتىلعان. سونداي-اق 228 كۇدىكتىنى ۇستاۋعا بۇيرىق بەرىلسە, 106 كۇدىكتىنى قاماۋعا الۋعا وردەر بەرىلگەن.
سونىمەن قاتار كۇدىكتىلەردىڭ 43-ءى ومىردەن وتكەنى, ال 14 ادام شەتەلدە ەكەنى بەلگىلى بولعان. بۇعان دەيىن باس پروكۋراتۋرا ەلدىڭ 11 پروۆينتسياسىندا قۇرىلىس جۇمىستارىن دۇرىس جۇرگىزبەدى دەگەن كۇدىكپەن 564 ادامدى انىقتاعان بولاتىن.
ال 26 اقپاندا جەر سىلكىنىسىنەن كەيىن ب ۇلىنبەگەن بىردە-ءبىر عيمارات قالماعان گازيانتەپ پروۆينتسياسىنداعى نۋرداگى قالاسىنىڭ مەرى ۇستالعان ەدى.
ەسكە سالساق, 6 اقپان كۇنى تۇركيانىڭ وڭتۇستىك-شىعىسىندا ماگنيتۋداسى 7 بالدان اساتىن ەكى جويقىن جەر سىلكىنىسى بولدى. تابيعي اپات كورشىلەس سيرياعا دا اسەر ەتىپ, وندا دا تۇرعىن ۇيلەر قيراپ, ادامدار ءۇيىندى استىندا قالدى.
سوڭعى مالىمەتتەر بويىنشا تۇركيادا ءزىلزالا سالدارىنان قازا تاپقاندار سانى 46 مىڭنان اسقان.
