برازيليادا ءوتىپ جاتقان الەم چەمپيوناتى بەل ورتاسىنا دا جاقىنداپ قالدى.
قازىر كوماندالار ءۇشىنشى تۋردىڭ سوڭعى ويىندارىن وتكىزىپ جاتىر. بۇل تۋر كەيبىر قۇرامالار ءۇشىن نە بەل كەتەتىن, نە بەلبەۋ كەتەتىن تۋر بولىپ تۇر. اسىرەسە, ءۇشىنشى تۋرداعى ماتچتار ەۋروپا ەلدەرى ءۇشىن ەڭ جاۋاپتى بولىپ سانالادى.
سەيسەنبى كۇنى ەۋروپانىڭ ەڭ مىقتى دەگەن تاعى ءبىر قۇراماسى وسى سىننان ءسۇرىنىپ, 1/8 فينالعا وتە المادى. «D» توبىندا ۋرۋگۆاي يتاليانى 1:0 ەسەبىمەن جەڭىپ, كەلەسى اينالىمعا شىعارماي تاستادى. بۇل كەزدەسۋدە 81-ءشى مينۋتتا ديەگو گوديننىڭ سوققان دوبى يتاليانىڭ ءۇمىتىن ءۇزدى. ويتكەنى, اپپەنين تۇبەگى ەلى قارسىلاسىمەن تەڭ ويناسا, جارىستى جالعاستىرۋعا مۇمكىندىگى بار ەدى.
وسى توپتاعى كوستا-ريكا مەن انگليا قۇرامالارىنىڭ اراسىندا وتكەن ويىن تەڭ ەسەپپەن اياقتالدى. تۇماندى البيوننىڭ كومانداسى سوڭعى تۋردىڭ ءناتيجەسىنە قاراماي-اق يسپانيا مەن يتاليا قۇرامالارى سياقتى الەم چەمپيوناتىمەن بۇعان دەيىن-اق قوشتاسقان بولاتىن.
وسى كۇنى «س» توبىندا كولۋمبيا جاپونيانى 4:1 ەسەبىمەن, ال گرەكيا كوت’د يۆۋار كومانداسىن 2:1 ەسەبىمەن جەڭىپ, 1/8 فينالعا شىقتى. وسى ارادا گرەكيانىڭ 1/8 فينالعا العاش رەت شىعىپ وتىرعانىن اتاپ كورسەتكەن ءجون. ەندى پلەي-وففتا كولۋمبيا ۋرۋگۆايمەن, كوستا-ريكا گرەكيامەن كەزدەسەدى. وسى ويىنداردا كولۋمبيا مەن كوستا-ريكا جەڭسە, العاش رەت شيرەك فينالعا شىعادى. گرەكيا قۇراماسى تۋرالى دا وسىنى ايتۋعا بولادى.
كەشە كەشكىسىن ارگەنتينا نيگەريامەن, يران بوسنيا جانە گەرتسەگوۆينامەن, گوندۋراس شۆەيتساريامەن, ەكۆادور فرانتسيامەن كەزدەستى.
