ىنتىماقتاستىق جانە ءوزارا تۇسىنىستىك تۋرالى مەموراندۋمعا ل.ن.گۋميلەۆ اتىنداعى ەۇۋ رەكتورى ەرلان سىدىقوۆ جانە «Astana Clinic» جشس ديرەكتورى بوريس چەن قول قويدى. تاراپتار بىرلەسە جوعارى وقۋ ورنىنىڭ ستۋدەنتتەرى مەن وقىتۋشىلارىنا ساپالى مەديتسينالىق قىزمەت كورسەتۋ ءۇشىن قولايلى جاعداي جاساۋدى جوسپارلاپ وتىر.
كەزدەسۋ اياسىندا بيزنەسمەن بوريس چەن ەۋرازيا ۇلتتىق ۋنيۆەرسيتەتىنىڭ بەلسەندى ستۋدەنتتەرىنە 50 000 تەڭگە كولەمىندە اي سايىنعى شاكىرتاقى تاعايىندادى. سونىمەن بىرگە كاسىپكەر الەۋمەتتىك جاۋاپكەرشىلىك تانىتىپ, ENU Endowment Fund قورىنا 10 ملن تەڭگە كولەمىندە قارجى اۋداردى. رەكتور ەرلان سىدىقوۆ بوريس چەنگە العىس ءبىلدىرىپ, وعان مەتسەناتتاردىڭ ۋنيۆەرسيتەت دامۋىنا قوسقان ۇلەسىنە ارنالعان داڭق اعاشىنىڭ جاپىراعىن تابىس ەتتى.
«ەۋرازيا ۇلتتىق ۋنيۆەرسيتەتىندە ستۋدەنتتەردىڭ اراسىندا ساباقتاستىق ساقتالىپ, جاقسى داستۇرلەر كوبەيىپ كەلەدى. ءبىزدىڭ كاسىپكەرلەر مەن تۇلەكتەر وقۋ ورداسىنىڭ ومىرىنە بەلسەندى قاتىسادى جانە ادامي الەۋەتتى دامىتۋعا عانا ەمەس, بۇكىل ەلدىڭ بولاشاعىنا ءوز ۇلەسىن قوسىپ جاتىر. ەۋرازيا ۇلتتىق ۋنيۆەرسيتەتىنىڭ نەگىزگى مىندەتى – ستۋدەنتكە باعىتتالعان ءبىلىم. سوندىقتان ءبىز ستۋدەنتتەردىڭ الەۋمەتتىك قامسىزداندىرىلۋىنا, ونىڭ ىشىندە دەنساۋلىعىنا ەرەكشە ءمان بەرەمىز. جاڭا ستۋدەنتتىك ءۇيدىڭ قۇرىلىسىن باستاۋ جوسپارلانىپ وتىر. ونىڭ ءبىرىنشى قاباتىندا ەمحانا ورنالاسادى. سەرىكتەستەرىمىزگە ۋنيۆەرسيتەت ومىرىنە قاتىسقانى جانە ونىڭ وركەندەۋىنە قوسقان ۇلەسى ءۇشىن العىسىمدى بىلدىرەمىن», دەدى ەرلان سىدىقوۆ.
«Astana Clinic» جشس ديرەكتورى بوريس چەن بيزنەستىڭ الەۋمەتتىك جاۋاپكەرشىلىگىنىڭ ماڭىزدىلىعىن اتاپ ءوتتى.
«جاسىراتىنى جوق, ەۋرازيا ۇلتتىق ۋنيۆەرسيتەتى – ەلىمىزدەگى جەتەكشى وقۋ وردالارىنىڭ ءبىرى. ۇلتتىڭ جەتىستىگى ەكى نەگىزگى فاكتورعا – دەنساۋلىق پەن بىلىمگە بايلانىستى. ءبىز ۋنيۆەرسيتەت ستۋدەنتتەرى مەن قىزمەتكەرلەرىنە 6 جىل بويى قىزمەت كورسەتەمىز. بۇگىن ءبىلىم بەرۋ سالاسىنا ءوز ۇلەسىمىزدى قوسۋدى ءجون كوردىك – ستۋدەنتتەرگە ءبىزدىڭ ەمحانانىڭ شاكىرتاقىسىن بەرۋ ارقىلى قولداۋ كورسەتىپ, ۋنيۆەرسيتەتتىڭ ەنداۋمەنت قورىنا ۇلەس قوستىق. ءبىز ۋنيۆەرسيتەتتىڭ ءبىلىم الۋشىلارى مەن قىزمەتكەرلەرىنە قىزمەت كورسەتەتىن ەۋروپالىق ستاندارتتار بويىنشا كلينيكا سالامىز», دەدى كاسىپكەر.
ۋنيۆەرسيتەتتىڭ ستراتەگيالىق دامۋ جونىندەگى پرورەكتورى دۋمان ايتماعامبەتوۆ جوعارى ءبىلىم بەرۋ سالاسىنداعى الەۋمەتتىك جاۋاپتى ينۆەستيتسيالاردىڭ جانە ەنداۋمەنت قورلاردىڭ ماڭىزدىلىعىنا توقتالدى.
«ەنداۋمەنت قوردىڭ ماقساتتى كاپيتالىنا قول سۇعىلمايدى جانە ونىڭ جيناقتاۋ سيپاتى بار. ودان تۇسكەن ينۆەستيتسيالىق تابىس ەسەبىنەن عانا جوبالاردى قارجىلاندىرۋدى جۇزەگە اسىرۋ جوسپارلانىپ وتىر. ENU Endowment Fund قۇرىلتايشىلارى ەۇۋ تۇلەكتەرى مۇقتاج ستۋدەنتتەرگە گرانتتار مەن شاكىرتاقىلار تاعايىنداۋ ارقىلى قولداۋ كورسەتۋدى, ءبىلىم الۋشىلاردىڭ عىلىمي-يننوۆاتسيالىق جانە كاسىپكەرلىك قىزمەتىنە جاردەمدەسۋدى جانە تالانتتى جاستارعا قولعابىس ەتۋدى جوسپارلاپ وتىر. ENU Endowment Fund قازىر قالىپتاسۋ كەزەڭىندە جانە تۇلەكتەرمەن مەن كاسىپكەرلەردى ارىپتەستىككە شاقىرامىن», دەدى پرورەكتور.
ۋنيۆەرسيتەتتىڭ 2 كۋرس ستۋدەنتى نازەركە ۇلان ءبىلىم ورداسىنىڭ قوعامدىق ومىرىنە بەلسەندى قاتىسادى. ول «ENU volunteers» قاتارىندا مۇقتاج ادامدارعا كومەكتەسىپ, قوعامنىڭ دامۋىنا ءوز ۇلەسىن قوسىپ كەلەدى.
«اي سايىن شاكىرتاقى الىپ تۇرۋ مەن ءۇشىن كۇتپەگەن جاعداي بولدى. بۇل – ەڭ باقىتتى ساتتەرىمنىڭ ءبىرى. مۇنداي مۇمكىندىك بارىنە بىردەي بەرىلمەيدى. مەن ءوز ۋنيۆەرسيتەتىمە جانە «Astana Clinic» كومپانياسىنا ستۋدەنتتەرگە قوماقتى قولداۋ كورسەتكەنى ءۇشىن العىسىمدى بىلدىرەمىن. ءبىرىنشى كۋرستان باستاپ ۆولونتەرلىكپەن بەلسەندى تۇردە اينالىسىپ كەلەمىن. ءبىز بالالار ۇيلەرىنە, مەرەكە كۇندەرى قارتتار ۇيلەرىنە بارامىز, ولارعا جاقسى كوڭىل كۇي سىيلاۋعا تىرىسامىز. ەلىمىزدە ۆولونتەرلەر قوزعالىسىنىڭ دامۋىنا ۇلەس قوسقىم كەلەدى», دەيدى نازەركە.
ايتا كەتۋ كەرەك, وتكەن جىلدىڭ ءساۋىر ايىندا ۋنيۆەرسيتەت تۇلەكتەرىنىڭ باستاماسىمەن ENU Endowment Fund قورى قۇرىلعان بولاتىن. قورعا 10 ملن تەڭگە كولەمىندە العاشقى جارنانى ENU Endowment Fund قۇرىلتايشىلارىنىڭ ءبىرى, وقۋ ورداسىنىڭ تۇلەگى دميتري ينيۋتين اۋداردى.
