«ايماقتا ۇستازدىقتى كاسىپ ەمەس, ۇلى قىزمەت سانايتىن كىم بار؟» دەپ كوپكە سۇراۋ سالعاندا, جۇرتشىلىق ءمولدىردى ۇسىندى. ءادىل باعانى كوپتەن اسىرىپ كىم ايتادى؟ شاكىرتتەرىنىڭ ءبىلىم دوداسىندا توپ جارىپ جۇرگەنىن, مۇعالىمدىكتى جان-تانىمەن جاقسى كورەتىنىن, كەشە عانا ەلىمىزدە ۇيىمداستىرىلعان «ۇزدىك ۇستاز-2022» بايقاۋىندا جەڭىمپاز دەپ تانىلعانىن توڭىرەگى عانا ەمەس, ءوڭىر جۇرتى تەگىس بىلەدى. وڭىردە ەمەس, رەسپۋبليكادا ۇزدىك تانىلۋ ەكىنىڭ بىرىنە بۇيىرا بەرمەيتىن باق. بۇل ءمولدىر جاقسىبايقىزىنىڭ جيىرما جىلعا جۋىق مۇعالىمدىك ەڭبەگىنىڭ ناتيجەسىن كورسەتكەن ءبىر بەلەسى عانا. الدا ءالى تالاي اسۋ بار.
ءمولدىر – پەداگوگ-زەرتتەۋشى, ءپان وليمپياداسىندا رەسپۋبليكالىق جۇلدەگەر جۇيرىگىن باپتاعان ۇستاز. ەسىمى «قاراعاندى وبلىسىنىڭ ءبىلىم سالاسىنداعى 100 جاڭا ەسىم» قاتارىنا ەنگەن.
ء«بىر قىزىعى, مەن مۇعالىمدىككە جۇرەك قالاۋىمەن كەلسەم دە, ەڭ العاش اعىلشىن تىلىنە قىزىقتىم. الايدا قازاق ءتىلى مەن ادەبيەتى پانىنەن ساباق بەرگەن مۇعالىمىمنىڭ نۇسقاۋىمەن قازاق ءتىلى مەن ادەبيەتى ءپانى ماماندىعىن تاڭدادىم. ۇستازىم «سەن اناڭنان ۇستاز بولىپ تۋعانسىڭ» دەگەندى ءجيى ايتاتىن. راسىندا, سولاي ەكەن. ۇستازدىڭ كورەگەندىگىنە ءتانتىمىن. ال بۇگىنگى ۇستازعا قويىلاتىن تالاپ پەن ءوزىمنىڭ ۇستازدىق عۇمىرىما قاراپ, جالپى وسى كۇنى مۇعالىمدىككە كەزدەيسوق كەلگەن ماماندار جوقتىڭ قاسى دەپ بىلەمىن», دەيدى ءمولدىر جاقسىبايقىزى.
ۇستازدىڭ قولىندا ۇلت بولاشاعىنىڭ كىلتى تۇرعانى بارشاعا ءمالىم. ونى كۇندە جار سالىپ ايتا بەرمەسەك تە, كوكىرەكتە سايراپ جاتقان دۇنيە. مۇعالىمدىك ميسسياعا ادال بولۋ ءۇشىن قايتپەك كەرەك؟ بۇل ساۋالعا قاتىستى ءمولدىردىڭ ءوز فيلوسوفياسى بار. ول – «ادامدىق ميسسياعا ادال بولۋى كەرەك».
«مۇعالىمدىك ميسسياعا ادال بولۋ ءۇشىن الدىمەن ادامدىق ميسسياعا ادال بولۋ كەرەك. جاقسى ادام بولماي, جاقسى مۇعالىم دە بولا المايتىن شىعارمىز. الاش قايراتكەرى ماعجان جۇماباەۆ: «مەن شاكىرتتىڭ شىراعىن جاعۋ ءۇشىن مەكتەپتەمىن», دەگەن ەكەن. ەگەر ۇستاز ءون بويىنا وقۋشىعا دەگەن, ءوز ماماندىعىنا دەگەن سۇيىسپەنشىلىكتى جيناقتاسا, ول ناعىز ۇستاز بولا العاندىعى. راسىمەن, ۇستازدىقتى شەكسىز سۇيەمىن. وعان كۇنىنە مىڭ سەبەپ تابىلادى. ءوزىمدى بۇرىنعى مۇعالىم مەن قازىرگى مۇعالىمنىڭ ورتاسىنداعى كوپىر ىسپەتتى سەزىنەمىن. قازىرگى جاڭاشىلدىقتىڭ بەرەرى دە كوپ. بۇگىنگى مۇعالىم ساباق بەرۋدىڭ ءتۇرلى ءتاسىلىن مەڭگەرگەن, ءارتۇرلى پلاتفورمالاردى قولدانىپ, ءتۇرلى ءادىس ارقىلى بالانىڭ قىزىعۋشىلىعىن ارتتىرا الاتىن شەبەر ادام. بىراق ءوز باسىم ءادىس قۋالاپ, وزگەرىس جاسايمىز دەپ وزەگىمىز تالىپ, ىشكى قۇندىلىعىمىزدى, ءوزىمىزدىڭ تاعىلىمدى تاربيەمىزدەن اجىراپ قالماساق ەكەن دەيمىن. ۇلتتىق بولمىسىمىزدان الىستاماي جاڭارۋىمىز كەرەك», دەيدى ءمولدىر.
مۇعالىمنىڭ پىكىرىنشە, ۇستازدىڭ بەدەلىن زاڭ ەمەس, ۇستازدىڭ ءوزى كوتەرەدى. «پەداگوگ مارتەبەسى تۋرالى» زاڭ مۇعالىمدىك ماماندىققا سۇرانىستى ارتتىرعان سياقتى. وعان بۇگىنگى بولاشاق مۇعالىم – ستۋدەنتتەردىڭ كوپتىگى دالەل», دەيدى ول.
قاراعاندى
