وسىدان بەس جىل بۇرىن الاقانداي اۋىلدا نەگىزى قالانعان ونەر مەكتەبى بۇگىندە قاناتىن كەڭگە جايىپ, رەسپۋبليكامىزدىڭ ءار ايماعىنان, اتاپ ايتقاندا الماتى, استانا, ەكىباستۇز قالالارى مەن الماتى وبلىسىنىڭ ەڭبەكشىقازاق, تالعار اۋداندارىنان تالانتتى شاكىرتتەر تاربيەلەۋ ءىسىن باستاپ كەتكەن. قازىرگى كۇنى ەل بويىنشا 138 ماماندى ەڭبەكپەن قامتىپ وتىرعان ونەر مەكتەپتەرىندە 4 مىڭعا تارتا بالا ونەرگە بەيىمدەلىپ, ءورىسىن كەڭەيتۋدە.
– بالالار ونەرگە وتە بەيىم, تەك اتا-انامەن بىرلەسىپ, دۇرىس باعىت-باعدار بەرۋىمىز كەرەك. ءبىزدىڭ ونەر مەكتەبىمىزدە 12 ۇيىرمە مەن 3 سپورتتىق سەكتسيا جۇمىس ىستەيدى. كەيىنگى ۋاقىتتا كىشكەنتاي بالالاردىڭ حورەوگرافياعا قىزىعۋشىلىعى باسىم. بۇعان قوسا ۆوكال, دومبىرا, سۋرەت سالۋ ۇيىرمەلەرىنە دە كوپتەپ كەلۋدە. حالىقتىق قولونەرگە, سونىڭ ىشىندە اعاش ويۋ, ءتۇرلى بۇيىمدار جاساۋ, كورپە, كەستە تىگۋگە ىنتانىڭ ارتۋى قۋانتادى. ءوزىمنىڭ ماماندىعىم – بالەتمەيستەر. سوندىقتان العاشقى باستامامدى «ارۋ» اتتى بيشىلەر ءانسامبلىن قۇرۋدان باستاعانمىن. وسى ۇجىمدا 100-گە جۋىق ءبيشى قاناتىن قاتايتىپ, الدى ونەردىڭ ءار قيىرىندا قىزمەت ەتىپ ءجۇر. تاجىريبەمىز تولىسا كەلە وسىنداي ۇلكەن ىسكە تاۋەكەل ەتتىك. قازىرگى كۇنى رەسپۋبليكا كولەمىندە ون شاقتى ونەر مەكتەبىن اشتىق, – دەيدى ART PRODUCTION ونەر مەكتەبى جەلىسىنىڭ باس ديرەكتورى گۇلجان ءتۇسىبيانوۆا.
ونىڭ جەتەۋى تالعار اۋدانىندا تۇراقتى جۇمىس ىستەپ جاتقانىن ايرىقشا اتاعىمىز كەلەدى. ۇشەۋى تالعار قالاسىندا, قالعاندارى جاڭالىق, بەلبۇلاق, كەڭدالا, نۇرا اۋىلدارىندا ورنالاسقان. اۋىل بالالارىنىڭ ونەرگە دەگەن ىنتاسىن ارتتىرىپ, تالابىن ۇشتاۋدى باستى مىندەت ەتكەن بۇل مەكتەپتە جاس ونەرپازدار شىعارماشىلىقتارىن تەگىن دامىتادى. وعان اتا-انالار دا ءدان ريزا.
مەملەكەتتىك قولداۋعا يە ونەر مەكتەبىندە ەسىمى ەلگە ءمالىم سۋرەتشى, ەڭبەك ارداگەرى مارات كيتابوۆ, ۇلتتىق ديزاين اكادەمياسىنىڭ اكادەميگى, زەرگەر سەرىكحان مادىعاليەۆ, ەلىمىزدىڭ مادەنيەت قايراتكەرى, ساحنا شەبەرى ءادىلحان قابىلوۆ سىندى ۇستازدار جاس بۋىندى سۋرەتشىلىك, اعاش شەبەرى, تەاتر تانۋعا باۋلىپ كەلەدى. ون ساۋساعىنان ونەر تامعان بالالار قولونەر بۇيىمدارىمەن بولگاريا, گرۋزيا, قىرعىزستان, تۇركيا ەلدەرىنە بارىپ, حالىقارالىق بايقاۋلاردىڭ جەڭىمپازدارى اتانعانىن ماقتان ەتۋگە بولادى. كوپشىلىك ولاردىڭ كەلەشەگىنەن زور ءۇمىت كۇتىپ وتىر.
– بالالاردىڭ بوس ۋاقىتىن ءتيىمدى وتكىزۋىنە, ونەردە دە, سپورتتا دا الەمدىك ارەناعا كوتەرىلىپ, كوك تۋىمىزدى كوكتە جەلبىرەتەر ازامات بولىپ قالىپتاسۋىنا تامشىداي بولسا دا ۇلەس قوسىپ, باعىت-باعدار بەرۋ – باستى ماقساتىمىز. وسى ارقىلى جاس وسكىننىڭ قيمىل-قوزعالىسىن ارتتىرىپ, تالانتىن اشىپ, شىعارماشىلىعىن دامىتۋىنا ىقپال ەتۋدەمىز, – دەيدى گۇلجان نۇربەكقىزى.
وسى كۇنى شاكىرت تاربيەلەۋدە عيماراتتاردى جالعا الىپ جۇرگەن كاسىپ يەسى تالعار قالاسى مەن بەلبۇلاق اۋىلىنان جەر الىپ, ءسان-سالتاناتى ۇيلەسكەن زاماناۋي ونەر جانە ساۋىقتىرۋ مەكتەپتەرىنىڭ ىرگەتاسىن قالاعانىن قۋانا جەتكىزدى. الداعى جازدا قۇرىلىس جۇمىستارى تولىق اياقتالسا, ونەرپاز بالالار جاڭا عيماراتتا جاتتىعاتىن بولادى.
ۇلبوسىن يسابەك,
جۋرناليست
الماتى وبلىسى,
تالعار اۋدانى
