اقىندى وبلىس اكىمى ايداربەك ساپاروۆتىڭ اتىنان ىشكى ساياسات باسقارماسىنىڭ باسشىسى كەمەل وسپانوۆ قۇتتىقتاپ, ءوڭىر باسشىسى قۇتتىقتاۋىن جەتكىزدى. ء«بىز ءسىزدى بۇگىنگى قازاق پوەزياسى الىپتارىنىڭ قاتارىندا جاقسى بىلەمىز. ءسىزدىڭ ولەڭدەرىڭىز پوەزيانى ەجەلگى قازاق ولەڭىنىڭ سارىنىنان اجىراتپاي, ونى جاڭا تۇرمەن قۇلپىرتىپ, بۇگىنگى زامانداستارىمىزدىڭ جۇرەگىنە قوندىرا ءبىلدى. سونىمەن قاتار ءسىز الەۋمەتتىك سالماعى اۋىر ولەڭدەر دە تۋدىرىپ, ويلى وقىرماننىڭ ساناسىنا قازىنالى جۇك تاستاپ كەلەسىز. جازىقسىزدان لاگەرگە قامالعان ايەل-انالار تۋرالى جازىلعان «قارا ورامال» اتتى پوەماڭىز قازىر الەمنىڭ 16 تىلىنە اۋدارىلىپ, دۇنيە ءجۇزىن شارلاپ كەتتى. كەڭەستىك قاندى قاساپتىڭ زاردابىن تانىتۋدا مۇنداي شىعارمالارعا باعا جەتپەيدى. ءسىزدىڭ «جانىمنىڭ جاپىراقتارى», «جۇرەگىمنىڭ جۇلدىزى», «قۇسقاناتى», «ارداكۇرەڭ», «اق سيسا», «تاماكوشكەن», «ەسىل اعادى», «اي سىنىعى», «اي تاڭبالى ارعىماق», ت.ب. جىر جيناقتارىڭىز قىزىلجار ءوڭىرى تۇرعىندارىنا جاقسى تانىس», دەلىنگەن قۇتتىقتاۋدا. سونىمەن بىرگە اكىم عالەكەڭنىڭ سولتۇستىكتە قازاق ونەرى مەن ادەبيەتىنىڭ وركەندەۋىنە ولشەۋسىز ۇلەس قوسىپ كەلە جاتقانى دا ايتىلىپتى. «وبلىسىمىزدا ايتىس, ءمۇشايرا نەمەسە اتاقتى ادامدارىمىزدىڭ مەرەيتويلارى بولسا ءسىز ەلىمىزگە بەلگىلى الماتىلىق, استانالىق جىر سۇلەيلەرىن, اتاقتى اقىن-جازۋشىلاردى الىپ كەلىپ, ءبىزدىڭ ءوڭىردىڭ مادەني ءىس-شاراسىنا زور سالماق بەرەسىز», دەپتى اكىم ءوزىنىڭ قۇتتىقتاۋىندا.
«اي تاڭبالى ارعىماق» اتتى ادەبي كەشتە اقىن ءوزىنىڭ ولەڭدەرىن وقىدى, سولتۇستىكتىڭ ادەبيەتسۇيەر قاۋىمى اتىنان پروفەسسور زارقىن تايشىباي, جاراسباي سۇلەيمەنوۆ, وسى كەشكە كوكشەتاۋدان ارنايى كەلگەن جازۋشى جابال ەرعاليەۆ تاعى باسقالار سويلەپ, اقىندى قۇتتىقتادى.
وڭىرىمىزگە بەلگىلى مەتسەنات, كاسىپكەر جومارت وماروۆ اقىنعا شاپان جاۋىپ, استىنا ات مىنگىزدى.
پەتروپاۆل
