25 جاستاعى ءنادىردىڭ ماماندىعى مەحانيزاتور. ورال قالاسىنداعى كاسىپورىنداردىڭ بىرىندە اۋىر تەحنيكا جۇرگىزەدى. كىشكەنتايىنان تەحنيكاعا بەيىم, قولى شەبەر جىگىت پوليتسيا كولىگىنىڭ توبەسىندەگى قىزىل-كوك شامىن دا جارقىلداپ ويناپ تۇراتىنداي ەتىپ جاساعان. اۋدەم جەردەن قاراعاندا ناعىز پوليتسيا كولىگى تۇرعانداي اسەر بەرەدى.
«كوپتەن ويىمدا جۇرگەن ىسكە اقپاننىڭ 14-ءى كۇنى كىرىستىم. ول كۇنگە دەيىن ءبىزدىڭ جاقتا قار جاۋمادى عوي. اۋەلى اينالاداعى قاردى جيناپ, ۇزىنى 3,5 مەتر, ەنى 1,7 مەتر ەتىپ ءۇيىپ الدىم. وعان كۇن جارىم كەتتى. ارينە, كوبىنە كەشتە, جۇمىستان كەلگەن سوڭ, جاساپ ءجۇردىم. جالپى, نوبايى شىققان سوڭ ناقتى دەتالدارىنا كىرىستىم. ءسويتىپ, التى كۇندە تولىق جاساپ شىقتىم», دەيدى ءنادىر.
نادىرگە قاردان پوليتسيا اۆتوكولىگىن جاساۋ يدەياسى كادىمگى ويىنشىق ستروبوسكوپتىڭ قۇرىلىسىن اقتارىپ وتىرىپ كەلىپتى. ستروبوسكوپ دەگەن قۇتقارۋشى نەمەسە جەدەل جاردەم, پوليتسيا سەكىلدى ارنايى قىزمەت كولىكتەرىنە ورناتىلاتىن سيگنال-شام عوي. ءسويتىپ, كىشكەنتاي يدەيادان ۇلكەن ءىس تۋعان.
وسى وقيعادان كەيىن نادىرگە باتىس قازاقستان وبلىستىق پوليتسيا دەپارتامەنتىنەن تەلەفون شالىپ, راحمەت ايتىپتى. قۇقىق ساقشىلارى قار-كولىكتى وزدەرى كەلىپ كورەمىز دەگەن ەكەن. بىراق قات-قابات شارۋامەن ۋاقىت تاپپاعان كورىنەدى.
بىلتىر دا ءوز اۋلاسىنىڭ جانىنان ورال قالاسىنداعى ورتالىق مەشىتتىڭ ماكەتىن قاردان جاساپ شىققان ن.قۋاناەۆ اسپاننان اق ۇلپا جاۋعانىن كۇتىپ ءجۇر. كەلەر جىلى شەبەر جىگىت ءبىزدى نەمەن تاڭعالدىرار ەكەن؟
باتىس قازاقستان وبلىسى
