سپيكەردىڭ ايتۋىنشا, استانانىڭ ەڭبەك نارىعىنداعى جاعداي تۇراقتى جانە ەرەكشە باقىلاۋدا. كاسىپكەرلىكتى دامىتۋ جونىندەگى ۇلتتىق جوبانى ىسكە اسىرۋ اياسىندا وتكەن جىلى 27,5 مىڭنان اسا جۇمىسسىز ادام الەۋمەتتىك قورعاۋ شارالارىمەن قامتىلدى. ولاردىڭ اراسىندا 12,4 مىڭ ادام جاڭا جۇمىسقا تۇردى, ال ونىڭ ىشىندە ەلوردانىڭ 8 362 تۇرعىنى تۇراقتى جۇمىس ورىندارىنا ورنالاستىرىلدى.
سونىمەن قاتار جاڭا بيزنەس-يدەيالاردى ىسكە اسىرۋعا ارنالعان 350 گرانت بەرىلدى. جۇمىس بەرۋشىلەردىڭ سۇرانىسى بويىنشا كاسىپتىك وقىتۋدان 172 ادام ءوتتى, جۇمىس بەرۋشىنىڭ جۇمىس ورنىندا كاسىپتىك وقىتۋدان 64 ادام ءوتتى. بۇعان قوسا «باستاۋ بيزنەس» جوباسى بويىنشا 4 320 ادام, ال enbek.kz پلاتفورماسىندا 598 ادام ونلاين وقىدى.
«استانادا 40 513 جاڭا جۇمىس ورنى قۇرىلدى. ونىڭ ىشىندە 35 981-ءى – تۇراقتى جۇمىس ورنى. جۇمىسسىز ازاماتتار مەن جۇمىسپەن قامتىلماعان حالىقتى جۇمىسقا ورنالاستىرۋ مۇمكىندىكتەرىن كەڭەيتۋ ماقساتىندا 62 بوس جۇمىس ورىندار جارمەڭكەسى وتكىزىلدى. سونداي-اق 2022 جىلدان باستاپ «جاستار پراكتيكاسى», «العاشقى جۇمىس ورنى» جانە «ۇرپاقتار كەلىسىمشارتى» جوبالارىنا قاتىسۋشىلاردىڭ جالاقىسىنىڭ مولشەرى 30 اەك-كە دەيىن ارتتى. جاستار مەن حالىقتىڭ الەۋمەتتىك وسال توپتارى ءۇشىن جاڭا بيزنەس-يدەيالاردى ىسكە اسىرۋعا ارنالعان گرانت مولشەرى 400 اەك-كە دەيىن (1,2 ملن تەڭگەگە دەيىن) ۇلعايتىلدى», دەدى س.جامانباەۆ.
سونىمەن قاتار 2023 جىلى ەلوردانىڭ 24 مىڭنان اسا تۇرعىنىن, ونىڭ ىشىندە جاستار اراسىنان 16,5 مىڭنان اسا ادامدى جۇمىسپەن قامتۋ شارالارىنا تارتۋ ارقىلى ەڭبەككە ارالاسۋىنا جاعداي جاساۋ جوسپارلانىپ وتىر. بۇل رەتتە 55 مىڭنان اسا جاڭا جۇمىس ورىندارىن قۇرۋ كوزدەلىپ وتىر. ونىڭ ىشىندە 10,3 مىڭ ورىن ۇلتتىق جوبالار اياسىندا جۇزەگە اسىرىلماق.
«ەلەكتروندىق ەڭبەك بيرجاسى پورتالىندا 1 674 جۇمىس بەرۋشى 4 306 بوس ورىن ورنالاستىردى. سونداي-اق بيىل بەيىندى باسقارما جاستارعا 5 جىلعا دەيىنگى مەرزىمگە جىلدىق 2,5%-بەن 5 ملن تەڭگەگە دەيىنگى مولشەردە شاعىن نەسيە بەرۋدىڭ جاڭا تەتىگىن ەنگىزۋدى جوسپارلاپ وتىر. ەلوردادا كاسىبي بىلىكتىلىكتى تانۋعا ارنالعان بىررەتتىك ۆاۋچەرلەر ۇسىنىلماق. بيىل 20 اقپاننان باستاپ جاڭا بيزنەس-يدەيالاردى ىسكە اسىرۋ ءۇشىن وتەۋسىز گرانتتار الۋدىڭ ءبىرىنشى اعىمىنا وتىنىمدەردى قابىلداۋ باستالدى. وتىنىمدەردى قابىلداۋ كەزەڭ-كەزەڭمەن 4 اعىمدا, ونلاين رەجىمدە, business.enbek.kz پورتالى ارقىلى جۇزەگە اسىرىلادى. بيىل حالىقتىڭ الەۋمەتتىك وسال توپتارىنىڭ ىشىنەن 132 ازامات ءۇشىن گرانتتار كوزدەلگەن. جالپى, جۇمىس ىزدەۋشىلەر ءۇشىن دە, جۇمىس بەرۋشىلەر ءۇشىن دە كورسەتىلگەن بارلىق بەلسەندى جۇمىسپەن قامتۋ شارالارى enbek.kz ەلەكتروندىق ەڭبەك بيرجاسىنىڭ پورتالىندا قولجەتىمدى», دەدى سپيكەر.
