– جەر قاتىناستارى سالاسىندا جالپى باعاسى 238 ميلليون تەڭگە سوماسىنداعى 3,56 گەكتار جەر ۋچاسكەلەرىن زاڭسىز بەرگەن تاراز قالاسى اكىمدىگىنىڭ لاۋازىمدى تۇلعالارىنا قاتىستى قىلمىستىق ءىس اياقتالدى. سوت شەشىمىمەن جەر ۋچاسكەلەرى مەملەكەت مەنشىگىنە قايتارىلىپ, وبلىس اكىمدىگى جۇرگىزگەن كەلىسىم ناتيجەسىندە, قايتارىلعان جەر ۋچاسكەلەرى مەكتەپ پەن كوپپاتەرلى تۇرعىن ءۇي قۇرىلىسىنا بەرىلەدى. اتالعان فاكتىلەردەن باسقا, مەملەكەتكە اۋىل شارۋاشىلىعىنا ارنالعان 12 846 گەكتار جەر ۋچاسكەلەرى قايتارىلعانىن ايتا كەتكەن ءجون, – دەيدى ق.احمەتقاليەۆ.
دەپارتامەنت تاراپىنان ءتيىستى جۇمىستار اتقارىلىپ جاتقانىنا قاراماستان, قىلمىستىق جاۋاپكەرشىلىككە تارتىلعان جاۋاپتى ادامداردىڭ سانى ازايار ەمەس. ماسەلەن, 2022 جىلى 68 ادام قىلمىستىق جاۋاپكەرشىلىككە تارتىلسا, ونىڭ 16-سى ءتۇرلى دەڭگەيدەگى باسشىلىق قىزمەتتە وتىرعاندار ەكەن.
– قىلمىستىق ءىستى تەرگەپ-تەكسەرۋ اياقتالعاننان كەيىن مىندەتتى تۇردە قىلمىستىق-پروتسەستىك كودەكستىڭ 200-بابىنا سايكەس مەملەكەتتىك ورگاندارعا ۇسىنىستار جولدانادى. وسىعان بايلانىستى 2022 جىلى مەملەكەتتىك ورگاندارعا جولدانعان 59 ۇسىنىس قارالىپ, قاراۋ ناتيجەلەرى بويىنشا وبلىستاعى ءارتۇرلى ۆەدومستۆونىڭ 35 قىزمەتكەرى تارتىپتىك جاۋاپكەرشىلىككە تارتىلدى, – دەيدى ول.
ايتپاقشى, دەپارتامەنت تاراپىنان جولداناتىن اقپاراتتىق حاتتاردىڭ كەيبىر ماسەلەلەردىڭ الدىن الۋدا ايرىقشا ءرول اتقاراتىنى دا بەلگىلى بولىپ وتىر. حاتتىڭ دەر كەزىندە جولدانۋى ارقىلى بىرقاتار كەمشىلىك دەر كەزىندە قالپىنا كەلتىرىلگەن.
– اگەنتتىك بيۋدجەت قاراجاتىن جىمقىرۋ جانە ساپاسىز قۇرىلىس, جوندەۋ جۇمىستارىنىڭ الدىن الۋ ماقساتىندا مەملەكەتتىك ورگاندارعا اقپاراتتىق حاتتاردى جولداۋ بويىنشا ۆەدومستۆولىق باقىلاۋ الگوريتمىن بەكىتكەن. ماسەلەن, تۇرار رىسقۇلوۆ اۋدانىنىڭ قاراقات اۋىلىنداعى مەكتەپ عيماراتىنا كۇردەلى جوندەۋ جۇمىستارىن جۇرگىزۋ كەزىندە ساپاسىز قۇرىلىس جۇمىستارى جۇرگىزىلگەنى جانە اتقارىلماعان جۇمىستارعا 80,8 ميلليون تەڭگە سوماسىندا قاراجات تولەنگەنى انىقتالدى. وسىعان وراي وبلىس اكىمدىگىنە اتالعان دەرەك بويىنشا شارا قولدانۋ تۋرالى اقپاراتتىق حات جولداندى. وسى نىسان بويىنشا جۇمىس توبى قۇرىلىپ, قىسقا مەرزىمدە مەكتەپتىڭ كۇردەلى جوندەۋ جۇمىستارى اياقتالىپ, بيۋدجەت قاراجاتىن جىمقىرۋعا جول بەرىلمەدى. وقۋ ۇدەرىسى دەر كەزىندە ۇيىمداستىرىلدى, – دەيدى ول.
قالاي الىپ قاراساق تا, وڭىردە قۇقىق بۇزۋشىلىقتىڭ ازايماي تۇرعانى كىمدى دە بولسىن ويلاندىرماي قويمايدى. باۋىرجان مومىش ۇلى تۋعان وڭىردە: «تارتىپكە باس يگەن قۇل بولمايدى, ءتارتىپسىز ەل بولمايدى» دەگەن باتىردىڭ سوزىنە باس اۋىرتاتىندار از بولىپ تۇرعانى وكىنىشتى.
جامبىل وبلىسى
