جۋىقتا توتەنشە جاعدايلار دەپارتامەنتىنىڭ قىزمەتكەرلەرى تاۋلى جەردە قالىپ قويساڭىز, قالاي امان قالۋ كەرەكتىگىن ۇيرەتتى. الدىن الا جازىلعان باعدارلاما بويىنشا ريددەر قالاسىنىڭ ماڭىنداعى تاۋ شاڭعى بازاسىندا قار كوشكىنى ءتۇسىپ, تۋريستەردىڭ ءبىرى قار قۇرساۋىندا قامالىپ قالعان. كۇنتىزبەدە كوكتەم شىققانىمەن, تاۋلى جەردىڭ قارى سىرەسكەن كۇيى جاتىر. اياز قىسىپ بارادى. تاۋ باسىندا جاتقان قاردىڭ كوبەسى ءساۋىر بولماي, سوگىلە قويمايدى. سوندىقتان دا قۇتقارۋشىلار جەتكەنشە ءۇسىپ قالماۋدىڭ امالىن قاراستىرعان ءجون.
تاۋلى جەردە امان قالۋ ءۇشىن ادامعا ەڭ قاجەتى – سۋ, تاماق, قالقالاۋ جەر جانە سىرىڭكە. قۇتقارۋشىلاردىڭ كەڭەسىنە قۇلاق تۇرسەك, ەڭ الدىمەن, جەلدىڭ وتىنەن الىستاۋ جەرگە جەتىپ, قوس ىسپەتتى قالقا جاساپ العان ابزال. قاردى قازىپ, بەتىنە اعاش بۇرلەرىمەن قىمتاسا, ءتىپتى دۇرىس. استىڭعى جاعىنان جانعان وتتىڭ جىلۋى تىسقا تارامايتىنداي بولسا, ءۇسىپ قالماسىڭ انىق. ايتقانداي, جازدىگۇنى وت جاعۋ وڭاي شىعار, ال ىلعالدى بويىنا سىڭىرگەن اعاش تەز تۇتانا قويار ما ەكەن. دەمەك قار باسپاعان كەپكەن قاراعاي بۇرلەرىن جيناپ, تۇتاتىپ كورۋ كەرەك. جالىنداپ جانا باستاعان سوڭ عانا ىلعال تارتقان كەسەك اعاشتى تاستاۋ كەرەك. ەگەر جانقالتاڭىزدا وت جاعۋعا ارنالعان سۇيىقتىق بولسا, سۋ تارتقان اعاشتىڭ ءوزىن تۇتاتىپ جىبەرۋگە بولادى. مىنە, قار قۇرساۋىندا قالساڭىز, نە ىستەۋ كەرەكتىگىن قۇتقارۋشىلار ءىس جۇزىندە كورسەتتى.
جالپى, دالالى جەرگە شىعىپ بارا جاتقان تۋريست سومكەسىنە وتتىقتان بولەك, پىشاق, كومپاس, جىلى كيىم, ءدارى-دارمەك, قول شام, سۋ الىپ جۇرگەنى دۇرىس. بۇل قۇتقارۋشىلاردىڭ دا اقىل-كەڭەسى. ال وقىس جاعدايعا تاپ بولعان تۋريست بىردەن 112 نومىرىنە حابارلاعانى دۇرىس.
ءدال قازىرگى ۋاقىتتا شىعىستا كوشكىن ءجۇرۋ قاۋپى وتە جوعارى. ەڭ دۇرىسى, تاۋ-تاسقا شىعۋدى كەيىنگە قالدىرا تۇرعان ءجون.
شىعىس قازاقستان وبلىسى
