كوميسسيا توراعاسى يگور روگوۆ بۇل ماسەلە وزەكتى ەكەنىن العا تارتىپ, وتىرىستىڭ كۇن تارتىبىنە بەكەر شىعارىلماعانىن ايتتى. ول ءوز سوزىندە قۇقىق قورعاۋ جانە ارنايى ورگانداردىڭ قىزمەتىندە, اسىرەسە قىلمىستىق ۇدەرىستىڭ باستاپقى ساتىلارىندا ادامنىڭ جانە ازاماتتىڭ كونستيتۋتسيالىق قۇقىقتارى مەن بوستاندىقتارىن ساقتاۋدىڭ ماڭىزدىلىعى جوعارى ەكەنىن ەسكە سالدى. بۇل رەتتە ول قۇقىق قورعاۋ سالاسىنداعى زاڭنامانى ودان ءارى جەتىلدىرۋ, ونى ەكونوميكالىق ىنتىماقتاستىق جانە دامۋ ۇيىمى ەلدەرىنىڭ ستاندارتتارىنا سايكەس كەلتىرۋ قاجەتتىگى تۋرالى ماسەلەلەرگە ەرەكشە نازار اۋداردى. كوميسسيا توراعاسى ءوز قۇقىقتارى مەن بوستاندىقتارىن, اسىرەسە, قىلمىستىق ۇدەرىستەردىڭ ساتىلارىندا ءتيىمدى قورعاۋدى قاجەت ەتەتىندەردىڭ بارلىعىنا بىلىكتى زاڭ كومەگىن كورسەتەتىن ادۆوكاتتاردىڭ قىزمەتىندە ادام قۇقىقتارىن قورعاۋدىڭ باسىمدىعى مەن وزەكتىگىن اتاپ ءوتتى. بۇل ماسەلە تۋرالى ىشكى ىستەر ءمينيسترىنىڭ ءبىرىنشى ورىنباسارى مارات قوجاەۆ بايانداما جاساپ, جينالعانداردىڭ ساۋالىنا جاۋاپ بەردى.
كوميسسيا وتىرىسىندا كونستيتۋتسيا, قىلمىستىق-پروتسەستىك كودەكس, زاڭدار, بۇۇ-نىڭ ادام قۇقىقتارى تۋرالى حالىقارالىق پاكتىلەرى, ازاپتاۋعا قارسى كونۆەنتسيا جانە باسقا دا راتيفيكاتسيالانعان حالىقارالىق شارتتارمەن كەپىلدەندىرىلگەن قىلمىستىق ىستەردى سوتقا دەيىنگى تەرگەپ-تەكسەرۋ كەزەڭىندە ازاماتتاردىڭ, وزگە دە ادامداردىڭ كونستيتۋتسيالىق قۇقىقتارىن ساقتاۋ مەن قامتاماسىز ەتۋدىڭ وزەكتى ماسەلەلەرى دە تالقىلاندى.
كوميسسيا مۇشەلەرى قوعاممەن ارىپتەستىكتە قوعامدىق قاۋىپسىزدىكتى قامتاماسىز ەتۋدىڭ 2024-2028 جىلدارعا ارنالعان تۇجىرىمداماسىن قابىلداۋ قۇقىق قورعاۋ جانە وزگە دە مەملەكەتتىك ورگانداردىڭ قىزمەتىندەگى كونستيتۋتسيامەن, باسقا دا زاڭدارمەن جانە ادام قۇقىقتارىن قورعاۋ سالاسىنداعى حالىقارالىق مىندەتتەمەلەرىمەن كەپىلدىك بەرىلگەن ازاماتتاردىڭ قۇقىقتارى مەن بوستاندىقتارىن قامتاماسىز ەتۋدىڭ احۋالىن ەداۋىر جاقسارتۋعا مۇمكىندىك بەرەتىنىن اتاپ ءوتتى.
قىلمىستىق ۇدەرىستىڭ باستاپقى ساتىلارىندا ازاماتتاردىڭ كونستيتۋتسيالىق قۇقىقتارىن ءتيىمدى قورعاۋ ماقساتىندا كوميسسيا مۇشەلەرى مەن ساراپشىلارى اقش پەن الەمنىڭ باسقا دا دامىعان ەلدەرىنىڭ تاجىريبەسىنە سۇيەنۋدى ۇسىندى. ياعني قۇقىق قورعاۋ ورگاندارىندا ارناۋلى جوعارى ءبىلىمى بار پسيحولوگ پەن الەۋمەتتىك پەداگوگتىڭ جانە قۇقىق قورعاۋ ورگاندارىنىڭ قىزمەتكەرلەرى بولىپ تابىلمايتىن ادامداردان تۇراتىن جابىرلەنۋشىلەرمەن جۇمىس جونىندەگى بولىمدەردى ىسكە جۇمىلدىرۋ قاجەت. ولارعا دالەلدەمە مارتەبەسى بار بەينەجازبانى قولدانۋ جانە اڭگىمەلەسۋ قۇقىعىن بەرۋ ماسەلەسى قاراۋعا ۇسىنىلدى. بۇل ەلىمىزدەگى قىلمىستىق-پروتسەستىك كودەكسكە ءتيىستى وزگەرىستەر ەنگىزۋدى تالاپ ەتەدى.
كوميسسيا وتىرىسىندا ازىرلەنگەن ۇسىنىمدار مەملەكەت باسشىسىنىڭ, پارلامەنت پەن ۇكىمەتتىڭ نازارىنا ۇسىنىلماق.
