اۆتور بۇل جولعى كىتابىندا سىنشىلىق قىرىنان تانىلىپ وتىر. سونىڭ ايعاعىنداي ول ارعى اباي, احمەت, ءىلياس, قاسىمنان باستاپ, ورتا تۇستاعى تولەۋجان, مۇقاعالي, تولەگەن, كەيىنگى بۋىن نەسىپبەك, ۇلىقبەك, تەمىرحان, رافاەل جانە ءوزىنىڭ زامانداستارى بەيبىت قۇسانبەك, ەسجان اينابەكوۆ, نۇرلان ماۋكەن ۇلى, باۋىرجان ۇسەنوۆ سىندى تاعى باسقا قالامگەرلەردىڭ شىعارمالارى تۋرالى كەڭىنەن ءسوز قوزعاپ, جان-جاقتى تالداعان. قۇرعاق تالداۋ, ساراپتامامەن شەكتەلمەي, بەلگىلى قالامگەرلەردىڭ بەلگىسىز قىرلارى, ياعني ادامي بولمىس-ءبىتىمى تۋرالى تولعانىستارىن تولقي وتىرىپ وقيسىز, تاڭداي قاعىپ, تاڭىرقايسىز. بۇل ورايدا ونىڭ ءوزىنىڭ اقىندىعى مەن عالىمدىعى كادەگە جاراپ, سىنشىلىق قىرىن ارلەي تۇسكەن بە دەيمىز.
كەيىنگى جىلدارى ادەبيەتىمىزدە سىن جانرى ءبىرجولا جوعالماسا دا, دەڭگەيى تومەندەپ, ازايىپ بارا جاتقانى راس. ونىڭ سىرتىندا سىني كىتاپتار جوققا ءتان. ال بۇرىنعى وقىرمان دۋالى اۋىز سىنشىنىڭ نازارىنا ىلىككەن كىتاپتاردى ىزدەپ ءجۇرىپ وقيتىن-دى. بۇگىن بولسا, كىمنىڭ نە جازىپ جاتقانى بەلگىسىز. از عانا دانامەن شىققان كىتاپ وقىرمان قولىنا تيمەي قالادى. سول سەبەپتەن دە قالامگەرلەردىڭ شىعارماشىلىق لابوراتورياسى تۋرالى قاتارداعى وقىرمان تۇگىلى ادەبيەت مايدانىندا بىرگە جۇرگەن ارىپتەستەرى دە بىلە بەرمەيدى. باۋىرجاننىڭ مىنا قابىرعالى ەڭبەگى ارقىلى سول ولقىلىقتىڭ ورنى ءبىرشاما تولىققان سياقتى.
ونىڭ ۇستىنە ارۋاق ريزا بولماي, ءتىرى بايىمايدى دەگەندەي, قازاق ادەبيەتىنىڭ بۇرىنعى, سوڭعى ارداگەر ابىزدارىن ۇمىتۋعا بولمايدى. بۇل تۇرعىدان العاندا دا اۆتور دىتتەگەن ماقساتىنان شىعا بىلگەن. سونىڭ ءبارى جوعارىدا ايتقانداي, جالاڭ ماقتاۋ, ماداقتاۋ ەمەس, شىندىق تۇرعىسىندا تارتىمدى ءسوز بولىپ قوزعالعانى قۋانتادى.
ءيا, قادىر اقىن ايتپاقشى, جۇرەكتەن شىقپاسا, جۇرەككە جەتپەيدى. باۋىرجاننىڭ «جۇرەكتەن قوزعايىن» دەپ اتالاتىن جاڭا كىتابى سوعان سەندىرەدى.
