– كوشپەندىلەردىڭ تاريحي-مادەني مۇراسىن سانالى ۇرپاق رەتىندە ساقتاپ قانا قويماي, جاستاردىڭ ساناسىنا ساۋلە شاشاتىنداي ناسيحاتتاۋعا, بۇكىل الەمگە تاراتۋ ماڭىزدى. ءبىز حالىقتىڭ ءبىرتۇتاس مادەني كەڭىستىگىن قالىپتاستىرۋدى باستى مىندەت رەتىندە قاراستىرىپ وتىرمىز. قازاق حالقىنىڭ ۇلتتىق مادەني بولمىسىنىڭ وزەگى – تاريحي ءداستۇرىمىز, ۇلتتىق قۇندىلىقتارىمىز جانە قازاق ءتىلى. كۇللى تۇركى الەمىنىڭ رۋحاني استاناسىنداعى قوجا احمەت ياساۋي سياقتى تاريحتاعى رۋحاني كوشباسشىلارىمىزدىڭ دۇنيەتانىمىن دارىپتەپ, ۇرپاقتان ۇرپاققا جەتكىزۋ ماڭىزدى, – دەدى ا.قوجانازاروۆ.
ءوز كەزەگىندە دەپۋتاتتىققا كانديدات ەكاتەرينا سمولياكوۆا دا قوعامدى توپتاستىرۋدىڭ فاكتورى رەتىندە قازاق ءتىلىن ناسيحاتتاۋدىڭ ماڭىزدىلىعىنا توقتالدى.
– قازاق تىلىندەگى تانىمال كونتەنتتى دامىتۋ مەن تاراتۋدى ىنتالاندىراتىن تەتىكتەردىڭ جوقتىعى قىنجىلتادى. ءبىز بوس ۇراندارعا قارسىمىز. ءبىز ۇلت بىرلىگىنىڭ باستى فاكتورى – قازاق ءتىلىن دامىتۋدىڭ ءتيىمدى تەتىكتەرى مەن جاعدايىن جاساۋدى ماقسات ەتىپ قويدىق, – دەدى ە.سمولياكوۆا.
«Respublica» پارتياسىنىڭ جەتەكشىلەرى مەن دەپۋتاتتىققا كانديداتتار شىمكەنت قالاسىنا بارىپ, «Ferrum Vtor», «تسۆەتليت» جانە «ST temir» جشس مەتاللۋرگيالىق كاسىپورىندارىنىڭ ەڭبەك ۇجىمدارىمەن كەزدەستى. جيىن بارىسىندا پارتيا توراعاسى ايداربەك قوجانازاروۆ قوعام يگىلىگى ءۇشىن ەڭبەك ەتۋ ناعىز ءپاتريوتيزمنىڭ كورىنىسى ەكەنىن ايتتى.
– «Respublica» پارتياسىنىڭ يدەيالارىن شىنايى پاتريوتتارعا, كۇندەلىكتى زاۋىتتار مەن فابريكالاردا جۇمىس ىستەيتىن ناعىز ەڭبەك ادامدارىنا ۇسىنعانىما وتە قۋانىشتىمىن. وتانشىلدىعىڭدى جار سالىپ كورسەتپەي-اق, وتانعا دەگەن سۇيىسپەنشىلىگىڭدى ىسپەن دالەلدەۋ – حالىقتىڭ يگىلىگى ءۇشىن ەڭبەك ەتۋ دەپ بىلەمىن, – دەدى پارتيا جەتەكشىسى.
