جەر بەتىندەگى كۇردەلى ەكولوگيالىق احۋالدىڭ ءبىرى – قالدىقتاردىڭ جايى. تەحنولوگيالىق ۇدەرىستىڭ ناتيجەسىندە كوپ نارسە قولجەتىمدى. سولاردىڭ ىشىندە جۇزدەگەن جىلدان استام ۋاقىت ساقتالاتىن پوليەتيلەن پاكەتتەرى, پلاستيكالىق بوتەلكەلەر بار. دۇنيەجۇزىلىك بانكتىڭ ەسەبىنشە, 2050 جىلعا قاراي الەمدەگى تۇرمىستىق قالدىقتىڭ كولەمى 3,4 ملرد تونناعا جەتەدى. بۇل كەلەشەكتە جەر پلانەتاسىنىڭ ۇلكەن قوقىس پوليگونىنا اينالاتىنىن بىلدىرەدى. بىرقاتار دامۋشى ەلدە قالدىقتى ءبولىپ جيناۋ مادەنيەتى ءالى كۇنگە جولعا قويىلماعان. وكىنىشكە قاراي, بۇل قاتاردا قازاقستان دا بار.
ستۋدەنتتەرمەن كەزدەسۋ بارىسىندا پارتيا مۇشەسى جانە ەكوبەلسەندى ميراس ابباسوۆ سانالى تۇتىنۋعا كوشۋدىڭ ماڭىزدىلىعىن اتاپ ءوتتى. «قازىرگى كۇنى الەمدى ماركەتولوگ ماماندار بيلەپ, ءوز تاۋارلارىن ۇسىنادى. ال ءبىز ءوز كەزەگىمىزدە ناقتىلاي زاتتاردىڭ قانشالىقتى قاجەتى بار ەكەنىن سانامىزدان وتكىزۋىمىز كەرەك. مىسالى, ءبىر دجينسى شالبار شىعارۋ سەگىز مىڭ ليتر سۋدى قاجەت ەتەدى جانە وعان باسقا دا رەسۋرستار قاجەت. سوندىقتان ءار زاتتى الماس بۇرىن وي تارازىسىنان وتكىزۋ كەرەك», دەدى ول.
استانا قالاسىندا ازىرگە ءبىر عانا قوقىس وڭدەيتىن زاۋىت بار. ەكىنشىسى ازىرگە جوسپاردا عانا تۇر. «قالا كوشەلەرىندە ۇشىپ جۇرگەن پاكەتتەر مەن شاشىلىپ جاتقان پلاستيكالىق بوتەلكەلەردى رەتتەۋ ءۇشىن «ەكوحاكاتون» قاتىسۋشىلارى جابىق قوقىس جاشىگىن ورناتۋدى ۇسىندى. كۇن سايىن استانادا 50 مىڭ پوليەتيلەن ءونىمى قوقىسقا جونەلتىلەدى», دەدى م.ابباسوۆ.
ستۋدەنتتەردى مازالايتىن ەكولوگيالىق ماسەلەلەر – ەسىل وزەنىنىڭ لاستانۋى مەن تالدىكول تاعدىرى. سونداي-اق جاستار قالا تۇرعىندارىنىڭ ەكوبەلسەندىلىگىن ارتتىرۋ ماقساتىندا سەنبىلىكتەردىڭ فورماتىن وزگەرتىپ, ەكوكۆەست, مارافون سياقتى قىزىقتى ءىس-شارالاردى وتكىزۋدى ۇسىندى.
«بايتاق» پارتياسىنىڭ جاسىل ەكونوميكا بويىنشا حاتشىسى شىڭعىس لەپسىباەۆ پارتيانىڭ استانا اۋماعىندا عانا ەمەس قازاقستان بويىنشا ەكولوگيالىق جاعدايدى جاقسارتۋدىڭ جوسپارىمەن ءبولىستى. بايتاقتار كوگالداندىرۋ مەن تۇرعىن ءۇي-كوممۋنالدىق شارۋاشىلىعى سالاسىندا جاڭا تاسىلدەردى قولدايدى. بار بولعانى ءتورت جىل كولەمىندە پارتيا مۇشەلەرى حالىقارالىق ستاندارتقا سايكەس كەلەتىن قالا كورىنىسىن كوگالداندىرۋدى جوسپارلاپ وتىر.
