تەمىرتاۋدا ەكولوگتار, قالا بەلسەندىلەرى جانە ونەركاسىپ كاسىپورىندارىنىڭ وكىلدەرىمەن كەزدەسۋ بارىسىندا پارتيانىڭ «حالىقپەن بىرگە!» سايلاۋالدى باعدارلاماسىندا كورسەتىلگەن ەكولوگيالىق احۋالدى جاقسارتۋ شارالارى تالقىلاندى.
– ەكولوگيا – ازاماتتاردىڭ ءومىر ءسۇرۋ ساپاسىنا اسەر ەتەتىن ماڭىزدى فاكتورلاردىڭ ءبىرى. سوندىقتان ءبىزدىڭ سايلاۋالدى باعدارلامامىزدىڭ بۇتىندەي ءبىر ءبولىمى قورشاعان ورتانى قورعاۋعا ارنالىپ وتىر. ءبىز ءوندىرۋشى جانە ەنەرگەتيكالىق كومپانيالاردىڭ زاڭناما اياسىندا جۇمىس ىستەۋىن قاداعالايمىز. زاڭ تالاپتارىن اينالىپ وتكىسى كەلەتىندەرگە مۇمكىندىك بەرىلمەيدى, – دەدى پارتيا توراعاسى ەرلان قوشانوۆ.
سونداي-اق قۇجاتتا لاستانۋ دەڭگەيى جوعارى ەلدى مەكەندەردەگى كاسىپورىنداردان شىعاتىن قالدىقتاردىڭ ءنورماتيۆىن 40 پايىزعا دەيىن تومەندەتۋ كوزدەلگەن. سۋ بالانسىن ساقتاۋ ءۇشىن 14 جاڭا سۋ قويماسىن سالۋ جانە جۇمىس ىستەپ تۇرعان 16 سۋ قويماسىن قايتا جاڭارتۋ جوسپارلانىپ وتىر.
كوستەنكو اتىنداعى شاحتادا پارتيالىقتار كومىر وندىرۋشىلەر مەن مەتاللۋرگتەر كاسىپوداق ۇيىمدارىنىڭ وكىلدەرىمەن كەزدەستى. «بىلىكتىلىگى شەتەلدىكتەرمەن بىردەي قازاقستاندىق ماماندار ولارمەن تەڭ جالاقى الاتىن بولادى. پارتيالىقتار زياندى جانە قاۋىپتى وندىرىستەردە جۇمىس ىستەيتىن جۇمىسشىلاردىڭ زەينەتكە ەرتە شىعۋ مۇمكىندىگىنە قول جەتكىزەدى. ەلىمىزدىڭ بارلىق كاسىپورنىندا ەڭبەك مەديتسيناسى قىزمەتى ىسكە قوسىلادى», دەدى پارتيا باسشىلىعى.
بۇدان سوڭ پارتيالىقتار قاراعاندى قالاسىنداعى «سۇرىپتاۋ» تەمىرجول ستانساسىنىڭ ەڭبەك ۇجىمىمەن كولىك جانە لوگيستيكا سالاسىنداعى وزەكتى ماسەلەلەردى تالقىلادى.
سايلاۋالدى باعدارلامادا ەلىمىزدەگى تەمىرجولداردا پايدالانىلاتىن وتاندىق ماتەريالداردىڭ ۇلەسىن ۇلعايتۋ كوزدەلىپ وتىر. ەسكى ۆاگوندار قازاقستاندا وندىرىلگەن جاڭا ۆاگوندارعا اۋىستىرىلادى.
