قاراعاندى وبلىستىق كلينيكالىق اۋرۋحاناسىنىڭ جۇقپالى اۋرۋلار ءبولىمىنىڭ كورپۋستارى دا وتكەن عاسىردىڭ ەلۋىنشى جىلدارى بوي كوتەرگەن. ءۇش بلوكتان تۇراتىن اۋرۋحانانىڭ جاقىندا ەكىنشى بلوگى كۇردەلى جوندەۋدەن ءوتتى. بۇل بلوكتىڭ جەلدەتكىش, جىلۋ, سۋ جانە كارىز جۇيەلەرى تولىق جاڭاردى. سونىمەن قاتار ماتەريالدىق-تەحنيكالىق بازاسى كۇشەيتىلدى. اۋرۋحانانىڭ بۇل بلوگى 1955 جىلى سالىنىپتى. جالپى اۋماعى – 2 100 شارشى مەتر شاماسىندا. مۇندا جوندەۋ سوڭعى رەت وسىدان ون جىل بۇرىن جاسالعان ەكەن.
اۋرۋحانا باسشىلىعى كۇردەلى جوندەۋ كەزىندە بارلىق ينجەنەرلىك ينفراقۇرىلىمنىڭ اۋىسقانىن ايتادى. جەلدەتۋ جۇيەسى ءار جاتىن بولمەدە جەكە دارا. بۇل ينفەكتسيانىڭ باسقا جاققا تاراماي, اۋانىڭ الماسۋىنا ىقپال ەتپەك.
بۇعان قوسا عيماراتتىڭ سىرتى تىستالىپ, جىلۋ سىرتقا شىقپايتىنداي قاپتالدى. سىرتقى ءارى ىشكى ەمدىك گازبەن جابدىقتاۋ جەلىسى جوندەلدى. ينتەنسيۆتى تەراپيا بولىمشەسى قايتا رەكونسترۋكتسيادان ءوتتى. سونىڭ ناتيجەسىندە, جان ساقتاۋ بلوگى قابىلداۋ-دياگنوستيكالاۋ بولىمىمەن قاتار ورنالاستىرىلدى.
– جانساقتاۋ ءبولىمى بۇرىن ءۇشىنشى كورپۋستا ەدى. بۇل قازىرگى ەكى بلوك پەن قابىلداۋ بولىمىنەن بولەك-ءتىن. ونىڭ ۇستىنە ەكىنشى قاباتتا. تاسىمالداۋدا, پاتسيەنتتەردى ەۆاكۋاتسيالاۋدا قولايسىزدىقتار تۋعىزاتىن. ەندى جانساقتاۋ ءبولىمى ءبىرىنشى قاباتتا, قابىلداۋ ءبولىمىنىڭ ماڭىندا بولادى. ءبىزدىڭ ورتالىقتىڭ ەرەكشەلىگى – ءبىز 100 پايىز جەدەل كومەك كورسەتەمىز. پاتسيەنتتەردىڭ بارلىعى دەرلىك اۋىر حالدە قابىلداۋ بولىمىنەن ينتەنسيۆتى تەراپيا بولىمىنە تۇسەدى. وعان قوسا وسى كورپۋستا ەكى بالالار بولىمشەسى بار, – دەيدى جۇپالى اۋرۋلار ورتالىعىنىڭ باسشىسى ەرجان ءجۇنىسوۆ.
جوندەلگەن كورپۋس جاڭا مەديتسينالىق قۇرال-جابدىقتارمەن دە تولىقتى. اتاپ ايتقاندا, وكپەنى جاساندى جەلدەتۋ اپپاراتتارى, توسەك ماڭىنا ورناتىلاتىن مونيتورلار, ۋلترا دىبىستىق زەرتتەۋ قۇرالدارى بار. ورتالىق باسشىلىعى بىلتىر اعزانى قات-قابات زەرتتەۋگە مۇمكىندىك بەرەتىن تسيفرلى رەنتگەن اپپاراتى الىنعانىن ايتادى.
مەديتسينالىق تەحنيكا مەن جيھازدار دا جاڭاردى. بارلىق اۋرۋحاناعا SOS جۇيەسى ورناتىلعان. دابىل تەتىكتەرى دە بار.
– جانساقتاۋ ءبولىمى التى ورىنعا شاقتالعان. بۇل – بالانى دا, ەرەسەكتى دە قابىلداي الاتىن قالاداعى جالعىز بولىمشە. جالپى, جۇقپالى اۋرۋلار ورتالىعىندا بالا مەن ۇلكەندەرگە ارنالعان 190 ورىن بار. ءبىز رەسپيراتورلى, ىشەك, ۆيرۋستى ينفەكتسيامەن اۋىرعان ناۋقاستارعا كومەك كورسەتەمىز. وتكەن جىلى 7,5 مىڭ ناۋقاسقا ەم جاسالدى, – دەيدى ە.ءجۇنىسوۆ.
2019 جىلى نەيروينفەكتسيا بلوگى جوندەلسە, بيىل ءۇشىنشى بلوك جاڭعىرماق.
قاراعاندى
