ەرتىس وزەنىنىڭ ميرنىي كەنتى مەن يپپودروم اۋماعىنداعى تۇسىندا مۇز جارۋ جوسپارلانىپ وتىر. بۇگىنگى تاڭدا ەرتىستەگى مۇزدىڭ قالىڭدىعى 62 سم بولسا, سۋ دەڭگەيى 211 سم.
– جىل سايىن سۋ تاسقىنى قاۋپى بار 15 ۋچاسكەدەن قار الدىن الا شىعارىلادى. وسى كۇنگە دەيىن 380 مىڭ شارشى مەتر قار شىعارىلدى. سەمەي قالاسى بويىنشا ارىق جۇيەسىنىڭ ۇزىندىعى 52 شاقىرىمدى قۇرايدى. ارىق جۇيەسىن «زەلەنستروي سەمەي» جشس تۇراقتى تازالايدى. وندا كۇن سايىن 25 ادام جانە 5 بىرلىك ارنايى تەحنيكا جۇمىلدىرىلعان, – دەيدى سەمەي قالاسى توتەنشە جاعدايلار باسقارماسى باسشىسىنىڭ مىندەتىن اتقارۋشى الىبەك تۇرسىنحانوۆ.
وتكەن دەمالىس كۇندەرى سەمەي قالاسىنىڭ اكىمى نۇربول نۇرساعاتوۆ تا سۋ باسۋ قاۋپى بار اۋماقتاردى ارالاپ, اتقارىلىپ جاتقان جۇمىستاردىڭ انىق-قانىعىنا كوز جەتكىزدى. جوعارىدا ايتقان 15 ۋچاسكەنىڭ ىشىندە شىعىس كەنتى مەن سوگرا اۋدانىن سۋ باسۋ قاۋپى جوعارى بولىپ تۇر. «كوكتەمگى سۋ تاسقىنىنىڭ الدىن الۋ ءۇشىن سەمەي قالاسىنىڭ اكىمدىگى بوگەتتەر سالۋ تۋرالى شەشىم قابىلدادى. سوگرا اۋماعىندا 500 مەترلىك بوگەت سالۋدى باستادىق. قازىرگى ۋاقىتتا 17 تەحنيكا جۇمىلدىرىلىپ, توپىراق تاسۋدا. بوگەت ارقىلى سوگراداعى 40-قا جۋىق جەر ءۇيدى سۋ باسۋدان ساقتاي الامىز. قازىرگى تاڭدا كوممۋنالدىق قىزمەتتەر وزەن ارنالارىن دا تازالاپ جاتىر. سونداي-اق شىعىس كەنتىندەگى ساياجايلارعا 700 مەتر بولاتىن بوگەت سالۋ جوسپاردا بار. بوگەتتەردى سالۋعا قالالىق بيۋدجەتتەن 26 ملن تەڭگە قاراجات قاراستىرىلدى», دەيدى قالا اكىمى ن.نۇرساعاتوۆ.
قالادا قار سۋىنىڭ بوگەتسىز اعىپ كەتۋى ءۇشىن كارىز قۇدىقتارىنىڭ قاقپاقتارىن اشۋ جۇمىستارى دا باستالدى. سەمەي قالالىق جولاۋشىلار كولىگى جانە اۆتوموبيل جولدارى ءبولىمىنىڭ باسشىسى مەدەت التاەۆتىڭ ايتۋىنشا, شاھاردىڭ 30 كوشەسىندە 500 سۋ قابىلداۋ قۇدىعى ورنالاسقان. قالا كوشەلەرىن قاردان تازالۋ ءۇشىن 80-نەن استام تەحنيكا مەن 6 جۇمىسشى بريگاداسى جۇمىلدىرىلعان. سونىمەن قاتار كوكتەمگى سۋ تاسقىنى كەزەڭىنىڭ جاقىنداۋىنا بايلانىستى قالالىق كوممۋنالدىق قىزمەتتەر كۇشەيتىلگەن جۇمىس رەجىمىنە اۋىستىرىلدى.
