– ەل حالقىنىڭ ءومىر ساپاسىن جاقسارتۋ – مەملەكەتتىڭ باسىم باعىتتارىنىڭ ءبىرى. الەم بويىنشا ستاتيستيكالىق دەرەكتەرگە قاراعاندا جاعدايىمىز ءماز ەمەس. ءومىر ساپاسىن ارتتىرۋعا بىرنەشە فاكتور اسەر ەتەدى. جۇمىسسىزدىق ماسەلەسىمەن قاتار, جەمقورلىققا قاتىستى ماسەلەلەردى تۇبەگەيلى شەشپەيىنشە, مەملەكەتتىك باسقارۋ جۇيەسىن قالىپتى جۇزەگە اسىرۋ مۇمكىن ەمەس. جەمقورلىقپەن كۇرەستى كۇشەيتۋ كەرەك, پاراقورلارعا قاتىستى ماكسيمالدى جازا ورناتىپ, مەرزىمىنەن بۇرىن بوساتۋ قۇقىعىنان ايىرۋ قاجەت. ءبىزدىڭ مەملەكەتىمىز, باسقا دا كوپتەگەن ەل سياقتى سىبايلاس جەمقورلىقتىڭ الدىن الۋ جانە ونى بولدىرماۋ ماقساتىندا قارقىندى جۇمىس جۇرگىزىپ جاتىر. جەمقورلىقتى جەڭىپ, مەملەكەتتىڭ باسقارۋ جۇيەسىن اۋىستىرۋ ارقىلى ەلدىڭ ەكونوميكالىق گۇلدەۋىنە قول جەتكىزۋگە بولادى, – دەدى نۇرلان اۋەسباەۆ.
وسىلايشا, پارتيا مۇشەلەرى ءومىر ءسۇرۋ ساپاسىنىڭ ستاندارتتارىن ازىرلەۋ جانە ەنگىزۋ ماسەلەسىن پارلامەنتتە باستاماشىلىق جاساۋعا نيەتتى. كەزدەسۋدە كانديداتتار سايلاۋشىلاردى پارتيانىڭ سايلاۋالدى باعدارلاماسىمەن تانىستىردى. باعدارلامادا ءبىلىم بەرۋ سالاسىنىڭ دامۋىنا ەرەكشە كوڭىل بولىنگەنى ايتىلدى. مەديتسينا جانە ءبىلىم بەرۋ سالالارىنا ءجىو-دەن جىلىنا ەڭ كەمى 5-7%-دى ءبولۋ ۇسىنىلعان. جالپىۇلتتىق سوتسيال-دەموكراتيالىق پارتيا وكىلدەرى مۇنداي ءىس-شارا دارىگەرلەر مەن مۇعالىمدەر ەڭبەكاقىسىنىڭ بانك قىزمەتكەرلەرى دەڭگەيىنە دەيىن كوتەرۋگە مۇمكىندىك بەرەتىندىگىن ايتتى. «مۇنىڭ ماڭىزى زور, سەبەبى اتالمىش ماماندار ادامي كاپيتالدىڭ ساپاسىنا جاۋاپ بەرەدى, ال بۇل ءوز كەزەگىندە وتاندىق ەكونوميكانى دامىتۋ ءۇشىن نەگىزگى تالاپ بولىپ سانالادى», دەدى نۇرلان اۋەسباەۆ.
ءىc-شارا بارىسىندا الەۋمەتتىك ماسەلەلەر كوتەرىلدى. اتاپ ايتساق, ازىق-ت ۇلىك ينفلياتسياسى, كوممۋنالدىق تاريفتەردىڭ قۇنى, الەۋمەتتىك كەپىلدىكتەر جانە مەملەكەتتىك قولداۋ ماسەلەلەرى قوزعالدى.
كانديداتتار سايلاۋشىلاردىڭ ساۋالىنا جاۋاپ بەرىپ, شاما-شارقىنشا تۇيتكىلدەردىڭ ءتۇيىنىن تارقاتۋعا تىرىساتىندارىن جەتكىزدى.
