– مەملەكەتتىڭ باسقارۋ جۇيەسىنىڭ تيىمسىزدىگىنە اكەپ سوقتىرعان, شەشىمىن كۇتتىرمەيتىن باستى ماسەلە – سىبايلاس جەمقورلىق. ءبىز وسى باعىتتاعى جۇمىسىمىزدى ءارى قاراي دا جالعاستىرامىز. حالىقتىڭ مۇددەسى ءبىز ءۇشىن ءبىرىنشى ورىندا, – دەپ اتاپ ءوتتى ماقسۇت ناسيبۋلوۆ.
جالپى, پارتيا باسشىلىعى قازاقستانداعى باستى ماسەلە ادال بيزنەستى تۇنشىقتىراتىن, ەكونوميكانىڭ دامۋىنا جول بەرمەيتىن, حالىقتىڭ ءال-اۋقاتىنا كەرى اسەر ەتەتىن سىبايلاس جەمقورلىق ەكەنىن ءجيى العا تارتادى. «ەلدە بەنەفيتسيارلارى قايتا وڭدەۋ سالالارىن دامىتۋعا مۇددەلى ەمەس كورپوراتيۆتىك, وليگارحيالىق ەكونوميكا قالىپتاستى. جەكەلەگەن ادامدار بايىپ, ميلليونداعان ادام كەدەيشىلىك جاعدايىندا ءومىر ءسۇرىپ جاتىر. بۇل رەتتە جان-جاقتى تەرگەۋ جۇرگىزىپ, ۇرلانعان جانە وففشورلارعا شىعارىلعاننىڭ ءبارىن قازاقستاندىقتارعا قايتارۋ قاجەت. 1990-جىلدارى كوپتەگەن ءىرى كاسىپورىن كۇلكىلى سوماعا جەكەشەلەندىرىلدى. وسىنداي كومپانيالاردىڭ اكتسيالارىن حالىققا وتكىزۋ تۋرالى ماسەلە وتە وزەكتى. بۇعان IPO ارقىلى قول جەتكىزۋگە بولادى. اكتيۆتەردى ۇلتتىق ەكونوميكانىڭ جاڭا نەگىزىنە اينالۋعا ءتيىس ورتا بيزنەس وكىلدەرى اراسىندا ءبولۋ كەرەك», دەپ ەسەپتەيدى پارتيا مۇشەلەرى.
تۇرعىنداردى الاڭداتاتىن ماسەلەلەردىڭ ءبىرى – تىعىز قۇرىلىس «جىرى». بۇل پروبلەما تەك استانا مەن الماتى قالاسىندا ەمەس, ەلىمىزدىڭ بارلىق قالاسىنا ورتاق ماسەلە. وپپوزيتسيالىق پارتيا مۇشەلەرىنىڭ پىكىرىنشە, تىعىز قۇرىلىس قالا قاسىرەتىنە اينالىپ وتىر. ودان بولەك تويىمسىز قۇرىلىس سالۋشىلارعا ەڭ جاقسى جەر تەلىمدەرىنىڭ بەرىلەتىنى تاعى بار. «اكىمدىكتەر يگەرۋگە باس جوسپار بويىنشا مەكتەپ, بالاباقشا مەن اۋرۋحانالار سالىنۋعا ءتيىس جەرلەردى ۇلەستىرىپ وتىر. سونىڭ سالدارىنان تۇرعىندار الەۋمەتتىك ينفراقۇرىلىمنىڭ جوقتىعىنان زارداپ شەگەدى», دەيدى پارتيا وكىلدەرى.
