قايىرىم جاساۋدان قاراعاندىدا قالىس قالعاندار كەمدە-كەم. كاسىپكەرلەر قارجىلاي جانە قاجەتتى تاۋار تۇرىندە قول ۇشىن سوزسا, كوپبالالى انالار مەن ستۋدەنتتەر قاۋىمى اكتسياعا مۇرىندىق بولدى.
«كاسىپكەرلەر اقشا جانە قاجەتتى تاۋارلار تۇرىندە گۋمانيتارلىق كومەك كورسەتتى. بۇل – ءىرى كومپانيالار, ورتا جانە شاعىن بيزنەس وكىلدەرى. ولاردىڭ اراسىندا تۇركيامەن بيزنەس-سەرىكتەستىك ورناتقان كاسىپكەرلەر دە بار», دەيدى قاراعاندى وبلىسىنىڭ كاسىپكەرلىك پالاتاسىنىڭ ءباسپاسوز قىزمەتى.
«شاڭىراق» كوپبالالى وتباسىلار ورتالىعى قايىرىمدىلىق اياسىندا جينالعان قارجىعا وساكاروۆ اۋدانىنداعى تىگىن تسەحىنان جۇزدەن اسا كورپە ساتىپ الدى. ال اقتوعاي اۋدانىنداعى كوپبالالى انا دامەت دۋانبەكوۆا زارداپ شەككەن باۋىرلارعا ارناپ, كورپەشەلەر تىگىپتى. قايىرىمدىلىق اياسىندا كوپتەگەن كورپە-جاستىق, بالالارعا ارنالعان زاتتار, جورگەك جانە وزگە دە قاجەتتىلىكتەر جيناقتالعان ەكەن.
قايىرىم جاساۋدان جوعارى وقۋ ورنى ستۋدەنتتەرى دە تىسقارى قالعان جوق. ە.بوكەتوۆ اتىنداعى قاراعاندى ۋنيۆەرسيتەتى ستۋدەنتتەرى وسى ماقساتتا جارمەڭكە ۇيىمداستىرعانىن اتاپ وتكەن ءجون. ولاردىڭ اراسىندا مەحەندي شەبەرلەرى دە, ەكوجوباعا قاتىسۋشىلاردىڭ ونىمدەرى دە بار. تۇسكەن 2 ملن تەڭگە كولەمىندەگى قاراجات تۇرىك باۋىرلارعا جىبەرىلگەن.
ال وبلىستىڭ جاستار رەسۋرستىق ورتالىعىنىڭ جانىنان اشىلعان گۋمانيتارلىق كومەك جيناۋ پۋنكتىندە ەرىكتىلەر كۇندە كەزەكشىلىك اتقارادى. ەرىكتىلەر قاراشا حالىق اكەلگەن زاتتاردى قابىلداپ, ونى سۇرىپتاپ, بۋىپ-تۇيەدى. حالىق كوبىنە كيىم-كەشەك, توسەك-ورىن جابدىقتارىن اكەپ بەرىپتى.
«قاراپايىم ادامداردىڭ وسىناۋ يگى ىستە بەلسەندىلىك تانىتقانى قاتتى قۋانتتى. ەرەسەكتەرمەن بىرگە ولاردىڭ بالالارى دا, نەمەرەلەرى دە كەلدى. ەگدە جاستاعى ەرلى-زايىپتى ادامدار بىرنەشە جاڭا كورپە, بالالاردىڭ جاڭا اياقكيىمدەرىن تاپسىردى. حالىق بەيجاي وتىرا المايمىز دەپ, شىن جۇرەكتەن كومەك بەرىپ جاتىر», دەيدى فرونت-كەڭسەدەگى جاستار.
مۇنداي جيناقتاۋ پۋنكتتەرى وبلىستىڭ بارلىق قالا-اۋدانىندا ۇيىمداستىرىلدى. حالىقتىڭ شىنايى پەيىلى مەن ىستىق ىقىلاسىن ارقالاعان بۇيىمدار تۇركيا ەلشىلىگىنە جىبەرىلدى.
قاراعاندى
