سۋرەتتى تۇسىرگەن ەرلان ومار, «EQ»
ماماننىڭ ايتۋىنشا, ەلوردادا جرۆي جۇقتىرعانداردىڭ ىشىندە 80-گە جۋىق بالا بار. ونىڭ ىشىندە 6 پاتسيەنت – رەانيماتسيا بولىمىندە.
– ءبىز قالا تۇرعىندارىنا بالالار اراسىندا جۇقپالى اۋرۋلاردىڭ بولاتىنى تۋرالى ەسكەرتكىمىز كەلەدى. ەلوردادا قىس ۇزاق. قازىرگى جۇقپالى اۋرۋلاردىڭ, سونىڭ ىشىندە جرۆي مەن تۇماۋ ينفەكتسياسى ءورشىپ تۇر. جرۆي 200-دەن استام تۇردەگى ۆيرۋستان تۋىندايدى. كەيبىر جاعدايلاردا قوزدىرعىشتاردىڭ بىرنەشە ءتۇرى ءبىر ۋاقىتتا جۇعۋى مۇمكىن. ياعني بۇل ءتۇرلى ينفەكتسيالاردى, سونىڭ ىشىندە تۇماۋدى جانە كوروناۆيرۋستى دا قامتيدى. سۋىق تيۋ نەگىزى مۇرىن جولدارىنا اسەر ەتەتىن جەڭىل اعىمدى جرۆي-ءدى بىلدىرەدى, – دەپ ءتۇسىندىردى سپيكەر.
جرۆي-ءدىڭ ءارتۇرلى قوزدىرعىشتارىنان ازدى-كوپتى بەلگىلەر بايقالۋى مۇمكىن. مىسالى, دەنە قىزۋىنىڭ جوعارىلاۋى, قالتىراۋ, السىزدىك, باس اۋرۋى جانە باسقا دا بەلگىلەر. ال كلينيكالىق جاعدايدا جرۆي جەدەل رينيت, فارينگيت, تونزيلليت, لارينگوتراحەيت جانە برونحيت تۇرىندە كەزدەسۋى مۇمكىن. كوپ جاعدايدا رەسپيراتورلىق ۆيرۋستىق ينفەكتسيالار جەڭىل اۋرۋ تۇرىندە جۇرەدى جانە وزدىگىنەن وتەدى. ويتكەنى يممۋندىق جۇيە اعزانى ۆيرۋستان وزدىگىنەن تازارتادى ەكەن. ەگەر اۋرۋ اسقىنعان جاعدايدا ۆيرۋستار تومەنگى تىنىس جولدارىنا ەنىپ, برونحيتتەن باسقا ينفەكتسيا ۆيرۋستىق پنەۆمونياعا جانە جەدەل رەسپيراتورلىق ديسترەسس سيندرومىنا اكەلۋى دە عاجاپ ەمەس.
ۆيرۋستىق رەسپيراتورلىق ينفەكتسيالار سوزىلمالى اۋرۋلاردىڭ ورشۋىنە اسەر ەتۋى مۇمكىن. سيمپتومدار ۆيرۋسقا, سوزىلمالى اۋرۋلاردىڭ بولۋىنا جانە بۇرىن جاسالعان ۆاكتسينالاۋعا بايلانىستى وزگەرۋى دە ىقتيمال. مۇنداي جاعدايدا ۆيرۋس جۇقتىرعاندار ءوزىن ءالسىز سەزىنىپ, قالتىراۋ, بەزگەك, تۇشكىرۋ, مۇرىننىڭ بىتەلۋى, سينۋستىڭ بىتەلۋى, تاماق اۋرۋى, داۋىستىڭ قارلىعۋى, جوتەل, باس اۋرۋى, بۇلشىقەت اۋرۋى, قۇلاق اۋرۋى, كوزدىڭ قىزارۋى (كونيۋنكتيۆيت كەزىندە), فەبريلدى قۇرىسۋ سىندى سيمپتومداردان بايقالۋى مۇمكىن. ال جوعارى تىنىس جولدارى ينفەكتسيالارىنىڭ بەلگىلەرى ەرتە جانە كەش دەپ جىكتەلەدى. ەرتە سيمپتومدار ادەتتە تەز دامىپ, بىرەر كۇنگە سوزىلادى. سول ارالىقتا باس اۋرۋى, تۇشكىرۋ, قالتىراۋ, تاماق اۋرۋى باسىلماي, السىزدىك بايقالادى. سۋىق تيگەندە جوتەل ادەتتە تۇشكىرۋدەن كەيىن داميدى. بالعىن بالالاردا كەزدەسەتىن فەبريلدى ۇستامالار وتە سيرەك كەزدەسەتىن سيمپتوم بولىپ سانالادى. ولار 6 ايدان 5 جاسقا دەيىنگى بالالاردىڭ 2-5%-ىندا 38°C تەمپەراتۋرادا پايدا بولۋى مۇمكىن. سوندىقتان اق حالاتتىلار اۋرۋدىڭ بەلگىلەرى انىقتالسا, دەر كەزىندە دارىگەرگە قارالىپ, ۋاقتىلى ەمدەلگەن دۇرىس ەكەنىن ەسكەرتەدى.
