جاس قىز 19 جاسىنان ۋروليتيامەن اۋىرعان. اۋرۋدىڭ وسى ءتۇرى بۇيرەكتە, قۋىقتا نەمەسە ۋرەترادا ء(زار شىعارۋ جولىندا) تاستار پايدا بولۋ پروتسەسىمەن بايلانىستى. سودان پاتسيەنت بىرنەشە رەت وپەراتسيا جاساتقانىمەن, وكىنىشكە قاراي, اۋرۋ سايابىرلاماعان. پاتسيەنت حيرۋرگيالىق ادىسپەن ەمدەلۋدى ويلاپ, بىرنەشە ۋرولوگيالىق كلينيكاعا بارعانىمەن كلينيكالىق جاعدايدىڭ كۇردەلى بولعانىنا بايلانىستى كەرى قايتقان. امالى قالماعان ناۋقاس كوپبەيىندى قالالىق اۋرۋحاناعا بارادى. سودان كلينيكادا پاتسيەنتكە پەركۋتاندى نەفروليتوتريپسيا وپەراتسياسى ۇسىنىلعان. بۇل وپەراتسيانىڭ ەرەكشەلىگى, ناۋقاستا جاراقات كوپ بولمايدى. ياعني ناۋقاستىڭ بەل ايماعىن 1 سم كەسۋ ارقىلى جاسالادى. وندا بۇيرەك تاستارى لازەردىڭ كومەگىمەن جويىلادى.
قالالىق ۋرولوگيا ورتالىعىنىڭ جەتەكشىسى اسقار جاشەنوۆتىڭ ايتۋىنشا, پاتسيەنتتىڭ بۇيرەك تاستارى ەندوسكوپيالىق ادىسپەن الىنعان. وپەراتسيادان كەيىن-اق پاتسيەنتتىڭ بەتى بەرى قاراپ, جاعدايى جاقسارا باستاعان. ابىروي بولعاندا قاننىڭ بارلىق كورسەتكىشى جاقسى شىعىپ, بۇيرەك قىزمەتى قالپىنا كەلگەن.
– نەفروليتيازدىڭ كۇردەلى فورمالارى قيىن. ەگەر ناۋقاس ۋاقتىلى ەمدەلمەسە, بۇيرەكتىڭ فۋنكتسيونالدى كۇيىنىڭ جوعالۋىنا اكەلەدى. ناتيجەسىندە, تەرمينالدى بۇيرەك جەتكىلىكسىزدىگى پايدا بولادى. مۇنداي جاعدايدا ناۋقاس جاساندى بۇيرەك اپپاراتىن قاجەت ەدى, – دەيدى ديرەكتوردىڭ حيرۋرگيالىق كومەك جونىندەگى ورىنباسارى يۋري پاك.
قازىر پاتسيەنتتىڭ احۋالى جاقسى ەكەنىن جوعارىدا ايتتىق. ونىڭ جاعدايىن دارىگەرلەر ءجىتى باقىلاپ, امبۋلاتوريالىق ەم الىپ جاتىر.
