جاڭا وقۋ ورنى Yessenov University باستاماسىمەن قۇرىلعان نەمىس ۋنيۆەرسيتەتتەرى ورتاق كونسورتسيۋمى ناتيجەسىندە اشىلادى. اتالعان كونسورتسيۋم ءبىلىم, عىلىم سالاسىندا بىلىكتى, ءبىلىمدى مامان دايارلاۋ بويىنشا 2022 جىلى جۇرگىزىلگەن جۇمىستار ناتيجەسىندە نەمىستىڭ 7 ۋنيۆەرسيتەتىمەن بىرگە قۇرىلعان.
گەرمانيادان اقتاۋعا ارنايى كەلگەن قوناقتار Yessenov University-ءىن ەكىجاقتى كەلىسىمدەردى ءبىلىم مۇددەسىنە توعىستىرعان حالىقارالىق سەرىكتەستەردىڭ الاڭىنا اينالدىردى. سەرىكتەستەر ءۇش كۇن بويى جوبانى تالقىلاپ, كەڭەسىپ, دوڭگەلەك ۇستەل مەن كونفەرەنتسيالاردا پىكىر الماستى. كونفەرەنتسيا اياسىندا Yessenov University پرەزيدەنتى ب.احمەتوۆتىڭ, قازاق-نەمىس ۋنيۆەرسيتەتىنىڭ پرەزيدەنتى ۆولراد روممەلدىڭ, گامبۋرگ ۋنيۆەرسيتەتىنىڭ پروفەسسورى راينەر ساۆاتتسكيدىڭ جانە باسقا دا عالىمداردىڭ بايانداماسى تىڭدالىپ, ستۋدەنتتەرگە ارنالعان سەمينارلار مەن پىكىرتالاس ۇيىمداستىرىلدى. سونداي-اق گەرمانيا ۋنيۆەرسيتەتتەرىمەن بىرلەسكەن باعدارلامالاردىڭ جاي-جاپسارى تالقىلاندى. كەزدەسۋلەردە گەرمانيالىق ءبىلىم بەرۋدىڭ جۇيەسى, قازاق-نەمىس ينجينيرينگ ينستيتۋتى جوباسىنىڭ بارىسى, وڭىرگە قاجەتتىلىگى مەن ماڭىزى, ۇيىمداستىرۋ جۇمىستارى مەن كەزەڭدەرى, كۇتىلەتىن ناتيجە تۋرالى ايتىلدى.
Yessenov University بازاسىندا قۇرىلىپ, بيىل قىركۇيەك ايىنان باستاپ ستۋدەنتتەردى قابىلدايتىن جاڭا وقۋ ورنى قانداي بولماق؟ تۋريستىك قانا ەمەس, وندىرىستىك الەۋەتى دە مول ماڭعىستاۋ وبلىسىندا جاقسى جوبالاردى جۇزەگە اسىرۋعا بولادى. قۋانىشتىسى, ايماقتىڭ ستراتەگيالىق جوسپارىندا 2025 جىلعا دەيىن جاسىل سۋتەگى زاۋىتىن سالۋ مەجەلەنگەن. جاڭا ونەركاسىپكە, جاڭا زاۋىتقا جوعارى ءبىلىمدى سالالىق ماماندار كەرەك. «قىس شاناڭدى جاز سايلا» دەمەكشى, كاسىبي تەحنيكالىق قاجەتتىلىك بويىنشا ماماندار دايارلاۋ وقۋ باعدارلاماسىنا جاڭا باعىتتار قوسۋعا سۇرانىس تۋىنداتىپ وتىر.
– Yessenov University بازاسىندا نەمىس ينجينيرينگ ينستيتۋتى اشىلاتىنى تۋرالى جاڭالىق ەلدى ەلەڭ ەتكىزدى. الداعى جاڭا وقۋ جىلىنان باستاپ لوگيستيكا جانە ەنەرگەتيكا ماماندىقتارىنىڭ العاشقى توپ ستۋدەنتتەرى قابىلدانىپ, اعىلشىن, نەمىس تىلدەرىندە وقىتىلا باستايدى جانە ءبىلىم الۋشىلار ءۇش ديپلومعا يە بولادى. 2030 جىلعا دەيىن 8 باكالاۆريات پەن 6 ماگيستراتۋرا بويىنشا 1 مىڭ ستۋدەنتتى وقىتىپ, وبلىستاعى Green Hydrogen جوباسىنا جانە باسقا ينجينيرينگ سالالارىنا قاجەتتى كادرلار دايىنداپ شىعارۋدى جوسپارلاپ وتىرمىز, – دەدى ب.احمەتوۆ.
ونىڭ ايتۋىنشا, عىلىم جانە جوعارى ءبىلىم مينيسترلىگى وتاندىق ۋنيۆەرسيتەتتەردە ەۋروپا مەن اقش-تىڭ تەحنيكالىق جوعارى وقۋ ورىندارىنىڭ فيليالىن اشىپ, سولاردىڭ وقۋ باعدارلاماسىمەن ماماندار دايارلاۋ ىسىنە باستاماشى بولىپ كەلەدى.
– وسى ورايدا ءبىز, قازاقستان-گەرمانيا ۋنيۆەرسيتەتىنىڭ باسشىلىعى بەرلين تەحنيكالىق ۋنيۆەرسيتەتىنىڭ, گامبۋرگ ۋنيۆەرسيتەتىنىڭ, مارتين ليۋتەر گاللە-ۆيتتەنبەرگ ۋنيۆەرسيتەتىنىڭ, انحالت ۋنيۆەرسيتەتىنىڭ وكىلدەرى جانە گەرمانيانىڭ قازاقستانداعى ۆيتسە-ەلشىسى, سونداي-اق ينۆەستورلار مەن جۇمىس بەرۋشى كومپانيالاردىڭ رەسمي وكىلدەرىمەن ورتاق جوبالارىمىزدى جان-جاقتى تالقىلادىق. بۇل جولى سۇرانىسقا ساي پەرسپەكتيۆالاردى انىقتاۋعا تىرىستىق. ولكەمىزدىڭ ءوندىرىس سالالارىنا نەمىستىڭ ۇزدىك تاجىريبەلەرىن ەنگىزۋ, قاجەتتىلىككە قاراي ينجەنەريا ماماندارىن دايارلاۋ بويىنشا كەڭ وتىرىپ كەڭەستىك. بىرلەسكەن باعدارلامالارىمىزدى ەگجەي-تەگجەيلى تالقىلاپ بولعان سوڭ, سەرىكتەس كاسىپورىندارىمىزعا بارۋدى دا جوسپارلاپ وتىرمىز, – دەدى ول.
جاقسى جاڭالىق قاشاندا قۋانىش پەن قولداۋعا يە. قازاقستاننىڭ جاس تۇلەكتەرى اقتاۋدان-اق گەرمانيالىق ۇلگىدەگى ءھام ساپاداعى ءبىلىم الىپ, ماماندىق مەڭگەرىپ, ەل دامۋىنا ۇلەس قوساتىنى قۋانىش ەمەس پە؟! جاڭا ينستيتۋت قىركۇيەكتەن باستاپ ستۋدەنتتەر قابىلداعانمەن قۇرىلىمى, وزگە دە جوعارى وقۋ ورنىنا ءتان قاجەتتىلىكتەر مەن ماسەلەلەرى بىرتىندەپ شەشىلە بەرمەك.
– ەلىمىزدىڭ جوعارى ءبىلىم بەرۋ سالاسىندا ەل پرەزيدەنتىنىڭ تاپسىرماسى بويىنشا شەتەلدىك جەتەكشى ۋنيۆەرسيتەتتەرمەن اكادەميالىق ىنتىماقتاستىق نىعايىپ كەلەدى. وتاندىق جوعارى وقۋ ورىندارىنىڭ بازاسىندا ۇلىبريتانيا, گەرمانيا, كانادا, نيدەرلاند, وڭتۇستىك كورەيا جانە اقش-تىڭ الدىڭعى قاتارلى ۋنيۆەرسيتەتتەرىنىڭ فيليالدارى اشىلاتىن بولدى. اسىرەسە, قازاقستان مەن گەرمانيا اراسىنداعى تىعىز قارىم-قاتىناس جوعارى ءبىلىم مەن عىلىم باعىتتارىنا ايرىقشا باسىمدىق بەرەدى. سول ماقساتتا نەمىس ۋنيۆەرسيتەتتەرىمەن بىرگە كوپتەگەن ءىرى جوبا قولعا الىنىپ جاتىر. Yessenov University بازاسىندا قازاق-نەمىس ينجينيرينگ ينستيتۋتىنىڭ قۇرىلۋى سونىڭ دالەلى, – دەدى ماڭعىستاۋ وبلىسى اكىمىنىڭ ورىنباسارى ۇ.تناليەۆ.
Yessenov University-دەگى تىڭ جاڭالىق تەك ءبىر وقۋ ورنىنىڭ ەتىستىگى ەمەس, مەملەكەتتىك دەڭگەيدەگى جەتىستىك دەۋگە بولادى. اقتاۋلىق وقۋ ورنىنان دا وزگە قازاقستاندىق جوعارى وقۋ ورىندارى گەرمانيانىڭ گامبۋرگ, بەرلين تەحنيكالىق جانە بەرلين ەركىن ۋنيۆەرسيتەتتەرى, انحالت ۋنيۆەرسيتەتى, ۆيلداۋ تەحنولوگيالىق, گاللە-ۆيتتەنبەرگ, دارمشتادت ۋنيۆەرسيتەتتەرىمەن بىرگە ارىپتەستىك بايلانىستى ارتتىرۋعا ىنتالى. قازىرگى تاڭدا Yessenov University تاجىريبە الماسۋ, اكادەميالىق ۇتقىرلىق, قوس ديپلوم باعدارلامالارى بويىنشا پروفەسسور-وقىتۋشىلاردىڭ بىرىگىپ عىلىمي-زەرتتەۋ جوبالارىمەن اينالىسۋى ماقساتىندا ىنتىماقتاستىق ورناتۋعا كۇش سالىپ جاتىر.
جاڭا وقۋ ورنى الىپ ماقساتتى ارقالاپ وتىر. ۇيىمداستىرۋشىلاردى, سەرىكتەستەردى الدا ءالى ۇلكەن جۇمىستار كۇتىپ تۇرعانى دا بەلگىلى. جوبا ويداعىداي جۇزەگە اسىپ, وتاندىق وندىرىسكە بىلىكتى ماماندار دايىنداۋداعى بەلسەندى ىسىمەن قۋانتادى دەپ سەنەمىز.
ماڭعىستاۋ وبلىسى
