سارقان اۋدانىندا ورنالاسقان ستانسادا ەلەكتر قۋاتىن وندىرەتىن قوندىرعىلار جۇمىس ىستەپ تۇر. وبلىس اكىمى ءباسپاسوز قىزمەتىنىڭ مالىمەتىنە سۇيەنسەك, وسى ءىرى ينۆەستيتسيالىق جوباعا 19 ملرد تەڭگەدەن اسا جەكە قارجى ينۆەستيتسياسى تارتىلعان.
بيىل وبلىستا جيىنتىق قۋاتى 23,5 مۆت بولاتىن تاعى 3 گەس پايدالانۋعا بەرىلەدى. قازىرگى كەزدە وڭىردە جاڭارتىلعان ەنەرگيا كوزدەرىنىڭ 14 نىسانى بار, ولاردىڭ جالپى قۋاتى – 160 مۆت.
لەپسى ەلدى مەكەنىندەگى يگى جۇمىس 2019 جىلى باستالعان. كەزەڭ-كەزەڭىمەن جۇرگىزىلگەن قۇرىلىس جۇمىستارى كوز سۇيىندىرەدى. اسىرەسە نىساننىڭ ورنالاساتىن جەرىنە ەرەكشە نازار اۋدارىلدى. جازىق القاپ – جەلدىڭ جىلدىق ورتاشا جىلدامدىعى ءۇشىن تاپتىرماس جەر, سوندىقتان وندا جىل بويى ەلەكتر ەنەرگياسىن وندىرۋگە بولادى. نىساننىڭ قۇرىلىس-مونتاجداۋ جۇمىستارى 2022 جىلدىڭ قاراشا ايىندا تولىق اياقتالعان. سول كەزدەن بەرگى جەس-تە وندىرىلگەن ەلەكتر قۋاتى 23,767 مىڭ كۆت/ساعاتقا جەتتى.
جالپى, «Eneverse Kunkuat» جشس ىسكە اسىرعان جوبا اياسىندا 16 جەل قوندىرعىسى ورناتىلعان. جەل ماچتىنىڭ بيىكتىگى – 100 مەتر, قالاقشاسىنىڭ كولەمى – 70 مەتر. ءاربىر قۇرىلعى شامامەن 3,2 مۆت ەلەكتر ەنەرگياسىن وندىرە الادى. جالپى قۋاتى – 50 مۆت.
اتاپ وتسەك, سارقان اۋدانىندا «جاسىل» ەنەرگەتيكانى دامىتۋ باعىتىندا اۋقىمدى جۇمىستار جۇرگىزىلىپ جاتىر. اۋداندا ىسكە قوسۋ جوسپارلانعان 5 سۋ ەلەكتر ستانساسىنىڭ بۇگىنگى تاڭدا ۇشەۋى تابىستى جۇمىس ىستەپ تۇر. قالعان ەكەۋىنىڭ قۇرىلىسى بيىل اياقتالىپ, ىسكە قوسىلادى. اتاپ ايتقاندا, «Baskan Power» جشس-نىڭ جالپى قۋاتى 14,9 مۆت بولاتىن, قۇنى 11,7 ملرد تەڭگەلىك, 24 جۇمىس ورنى قۇرىلاتىن جوعارعى باسقان گەس-2 جانە 3 جوباسى. وعان قوسا كەربۇلاق اۋدانىندا قۋاتى 8,6 مۆت, قۇنى 6,3 تەڭگەلىك كوكتال گەس-1 جوباسى دا بار.
وبلىستىق ەنەرگەتيكا جانە تۇكش باسقارماسىنىڭ مالىمەتىنە قاراعاندا, 2021-2025 جىلدار ارالىعىندا جەتىسۋ وبلىسىندا جالپى قۋاتتىلىعى 236,7مۆت بولاتىن 13 جاڭارتىلعان ەنەرگيا كوزى نىسانىن ىسكە قوسۋ جوسپارلانعان. (گەس – 10, جەس – 2, كەس – 1). سونىڭ ۇشەۋى پايدالانۋعا بەرىلسە, تاعى ۇشەۋى بيىل ىسكە قوسىلماق. جالپى قۋاتى 132,5 مۆت قالعان 7 نىسان 2025 جىلعا دەيىن ەل يگىلىگىنە بەرىلەدى.
ايتا كەتەيىك, جەتىسۋدىڭ وزىندە وندىرىلەتىن ەلەكتر ەنەرگياسىنىڭ كولەمى 479,2 ملن كۆت/ساعاتتى قۇراسا, ونداعى جاڭارتىلعان ەلەكتر ەنەرگياسى كوزدەرىنىڭ ۇلەسى 340,6 ملن كۆت/ساعات بولىپ وتىر. العا قويعان جوسپارلار ءوز ناتيجەسىن بەرسە, جاڭا جەل ەلەكتر ستانسالارى وڭىردەگى ەلەكتر قۋاتىنىڭ تاپشىلىعىن ازايتۋعا كومەكتەسەدى.
جەتىسۋ وبلىسى
