تۇركيا پرەزيدەنتى رەجەپ تايىپ ەردوعان ەلدەگى توتەنشە جاعداي كەزىندە ءتارتىپ بۇزعاندار قاتاڭ تۇردە جازالاناتىنىن ەسكەرتكەن. وكىنىشكە قاراي مەملەكەت باسشىسىنىڭ سوزىنە قۇلاق اسپاي, ەلدەگى جاعدايدى پايدالانىپ, وڭاي ولجاعا كەنەلگىسى كەلەتىندەر دە تابىلىپ جاتىر.
ناقتىراق ايتقاندا, ءيزرايلدىڭ United Hatzalah ىزدەستىرۋ-قۇتقارۋ توبى «قاۋىپسىزدىككە ايتارلىقتاي قاتەر» تونگەندىكتەن, التى كۇننەن كەيىن تۇركيادان كەتىپ قالدى.
United Hatzalah باسشىسى ەلي پوللاك پەن وپەراتسيا جونىندەگى ۆيتسە-پرەزيدەنتى دوۆ مايزەل يزرايلدىك دەلەگاتسياعا ناقتى جانە تىكەلەي قاۋىپ تۋرالى اقپارات العاندارىن جانە قىزمەتكەرلەردىڭ قاۋىپسىزدىگىن ءبىرىنشى ورىنعا قويۋ كەرەك ەكەنىن ايتتى.
ء«بىز ءوز توبىمىزدى سيريا شەكاراسىنا جاقىن تۇركيا ايماعىنا جىبەرگەن كەزدە بەلگىلى ءبىر تاۋەكەل دەڭگەيى بار ەكەنىن بىلدىك, بىراق ءبىز ادام ءومىرىن قۇتقارۋ ميسسياسى ءۇشىن قاۋىپتى ازايتۋعا قاجەتتى قادامدار جاسادىق», دەدى مايزەل.
تۇركيانىڭ ادىلەت مينيسترلىگى حابارلاعانداي, تابيعي اپاتتان كەيىن توناۋشىلار كوبەيىپ كەتكەن. بۇزاقىلار دۇكەندەردى توناپ, قۇربان بولعاندارىڭ باعالى زاتتارىن ۇرلاي باستاعان. ءتىپتى, كوشەلەردە ءتۇرلى توپتار اراسىندا قاقتىعىستار باستالىپ, جەر سىلكىنىسى بولعان ايماقتاردا وق اتىلعان.
سونىمەن قاتار, اۆستريا قارۋلى كۇشتەرىنىڭ وكىلدەرى دە تۇركياداعى جەر سىلكىنىسى ايماعىنان قاۋىپسىزدىكتىڭ جوقتىعىنا جانە قارۋلى توناۋشىلار توبىنىڭ جانە مەرزىمدى اتىستاردىڭ سالدارىنان اسكەريلەر مەن قۇتقارۋشىلاردىڭ ومىرىنە قاۋىپ تونگەندىكتەن كەتىپ جاتقاندارىن مالىمدەدى.
گەرمانيادان جەتكەن كومەك ۇيىمى دا ءزىلزالادان زارداپ شەككەن تۇركيادا قاۋىپسىزدىككە الاڭداۋشىلىق پەن ادامدار اراسىندا قاقتىعىستار, اتىس بولعانى تۋرالى حابارلاردى العا تارتىپ, قۇتقارۋ جۇمىستارىن توقتاتقان.
نەمىس حالىقارالىق ىزدەۋ جانە قۇتقارۋ ۇيىمى (ISAR) مەن گەرمانيا فەدەرال تەحنيكالىق كومەك اگەنتتىگى (THW) تۇرىك ازاماتتىق قورعانىس اگەنتتىگى AFAD جاعدايدى قاۋىپسىز دەپ تانىعان بويدا جۇمىسىن قايتا باستايتىندارىن ايتتى. ISAR وپەراتسيالىق مەنەدجەرى ستيۆەن بايەر اپاتتان كەيىن كۇن وتكەن سايىن قاۋىپسىزدىك جاعدايى ناشارلاپ بارا جاتقانىن جاسىرمادى.
