– مەن ايتارعا ءسوز تاپپاي تۇرمىن. شىنىمدى ايتسام, پرەزيدەنتتىڭ قاراپايىم ادامداردى باقىلاپ, نازارىنان تىس قالدىرمايتىنىنا تاڭعالدىم. مەنىڭ ۇزاق جىلعى ەڭبەگىمنىڭ ەسكەرىلگەنىنە قاتتى قۋاندىم, – دەيدى اقساقال.
اقادىردى ۇزاق جىل مەكەن ەتكەن وسپانوۆتار اۋلەتى وڭىرگە ەتەنە تانىس. بۇل وتباسى مۇشەلەرى حالىقارالىق ارەنادا 31 رەت جەڭىسكە جەتكەن. 18 رەت ءانۇران اۋەلەدى.
قازاقستاننىڭ بىرنەشە دۇركىن چەمپيونى, پاۋەرليفتينگتەن ازيا مەن الەمنىڭ ەكى دۇركىن چەمپيونى, ەڭبەك سىڭىرگەن جاتتىقتىرۋشى ءدارىباي وسپانوۆ 1949 جىلى تەمىرجولشىلار وتباسىندا دۇنيەگە كەلگەن. ول عۇمىرىن تەمىرجولعا ارناسا دا, سپورتتى جانىنا سەرىك ەتكەن. ال كەيىنگى 18 جىل پاۋەرليفتينگكە دەن قويىپتى. ول العاش 2010 جىلى فيليپپيندەگى ازيا چەمپيوناتىندا سالماعى 140 كگ شتانگانى كوتەرىپ, جەڭىسكە جەتىپتى.
ءدارىباي اقساقالدىڭ ءۇش بالاسى بار. ونىڭ ءبارى دە سپورتقا بەيىم. كەنجە ۇلى قاراماندى 13 جاسىنان باستاپ ءوزى جاتتىقتىرادى. قارامان – قازاقستاننىڭ ەڭبەك سىڭىرگەن سپورت شەبەرى, پاۋەرليفتينگتەن حالىقارالىق دارەجەدەگى سپورت شەبەرى. ول دا حالىقارالىق بايراقتى باسكەلەلەردە توپ جارىپ ءجۇر. وعان قوسا بالالاردى جاتتىقتىرادى.
ۇلكەن ۇلى الماز وسپانوۆ – حالىقارالىق دارەجەدەگى سپورت شەبەرى, جوعارى ساناتتى جاتتىقتىرۋشى. ورتاڭعى ۇلى – ماناس وسپانوۆ سپورت شەبەرى. نەمەرەسى ايتاس – پاۋەرليفتينگتەن سايىستارعا بىرنەشە مارتە قاتىسقان, سپورت شەبەرى ءنورماتيۆىن ورىنداعان بولاشاعى زور بالا.
ءدارىباي وسپانوۆ مۇنىمەن توقتاپ قالمايتىنىن ايتادى. ول اپتاسىنا بەس رەت جاتتىعادى. ءۇش ۇلىمەن حالىقارالىق جارىستاردا قازاقستاننىڭ نامىسىن قورعاۋعا بەلدى بەكەم بۋعان.
– قازان ايىندا موڭعولياداعى الەم بىرىنشىلىگىنە قاتىسۋدى جوسپارلاپ وتىرمىز, ال ماۋسىم ايىندا ۇندىستانعا بارامىز. سپورتتاعى ۇزاق ءومىر ءسۇرۋدىڭ باستى قۇپياسى – ۇنەمى دەنە شىنىقتىرۋمەن اينالىسۋ, جاقسى قان اينالىمى ءۇشىن سىرتتا جۇگىرۋ قاجەت. سونىمەن قاتار الدىمىزعا ماقسات قويىپ, ولارعا قول جەتكىزۋىمىز كەرەك. مەنىڭ ماقساتىم – ەڭبەك سىڭىرگەن سپورت شەبەرى اتاعىن الۋ جانە بىرنەشە رەت چەمپيون بولۋ, – دەيدى سپورت ارداگەرى.
قاراعاندى وبلىسى
