قوستاناي وبلىسىندا ەكى جاڭا اكىم تاعايىندالدى

استانا. 18 ماۋسىم. قوستاناي ءوڭىرىنىڭ باسشىسى نۇرالى سادۋاقاسوۆتىڭ وكىمىمەن وبلىس ورتالىعى مەن قوستاناي اۋدانىنىڭ جاڭا اكىمدەرى بەكىتىلدى. بۇل تۋرالى وبلىس اكىمىنىڭ رەسمي سايتى حابارلادى. قالالىق ءماسليحاتتىڭ شەشىمى نەگىزىندە جانە وبلىس اكىمىنىڭ وكىمىمەن احمەدبەك ماساقباي ۇلى احمەتجانوۆ قوستاناي قالاسىنىڭ اكىمى بولىپ تاعايىندالدى. ا.احمەتجانوۆ 1966 جىلدىڭ 8 جەلتوقسانىندا قوستاناي وبلىسى ارقالىق اۋدانى سارىوزەن اۋدانىندا تۋعان. جوعارى ءبىلىمدى. 1991 جىلى قاراعاندى كووپەراتيۆ ينستيتۋتىن ەكونوميست, ال 2001 جىلى قوستاناي مەملەكەتتىك ۋنيۆەرسيتەتىن زاڭگەر ماماندىعى بويىنشا بىتىرگەن. ەڭبەك جولىن 1991 جىلى قوستاناي وبلىسى اۋليەكول اۋدانى سۇلۋكول كەڭشارىندا جۇمىسشىلار كووپەراتيۆى توراعاسىنىڭ ورىنباسارى بولىپ باستاعان. 1992-1996 جىلدار ارالىعىندا  اۋليەكول اۋدانىنا قاراستى «نوۆو-نەجينسك» كەڭشارىندا جۇمىسشىلار كووپەراتيۆىنىڭ توراعاسى بولعان. 1998-2007 جىلدار ىشىندە وبلىس اۋماعىنداعى سالىق سالاسىندا باسشىلىق قىزمەتتەر اتقارعان. 2007-2010 جىلدار ارالىعىندا تاران اۋدانىنىڭ, 2010 جىلدىڭ قىركۇيەگىنەن وسى ۋاقىتقا دەيىن قوستاناي اۋدانىنىڭ اكىمى بولدى. 2009 جىلى «قۇرمەت» وردەنىمەن ماراپاتتالدى. سول سياقتى, وبلىس باسشىسىنىڭ وكىمىمەن ءارى اۋداندىق ءماسليحات دەپۋتاتتارىنىڭ شەشىمى نەگىزىندە قوستاناي اۋدانىنىڭ اكىمى بولىپ ءتاۋبا قايىرجان ۇلى يساباەۆ بەكىتىلدى. ءتاۋبا يساباەۆ 1967 جىلدىڭ 29 قىركۇيەگىندە اقمولا وبلىسى ستەپنوگورسك قالاسىندا تۋعان. ءبىلىمى جوعارى. 1993 جىلى اقمولا ينجەنەر-قۇرىلىس ينستيتۋتىن ينجەنەر-مەحانيك ماماندىعى بويىنشا بىتىرگەن. ەڭبەك جولىن 1985 جىلى قاراپايىم جۇمىسشى رەتىندە باستاعان. 1993-2005 جىلدار ارالىعىندا اقمولا وبلىسى سەلەتين اۋدانىندا جانە اتالعان وبلىس اكىمى اپپاراتىندا ءتۇرلى قىزمەتتەر اتقارعان. ال 2005 جىلدىڭ ناۋرىزىنان وسى تاعايىنداۋعا دەيىن قوستاناي وبلىسى اكىمىنىڭ ءىس جۇرگىزۋشىسى ءارى اپپارات باسشىسىنىڭ ورىنباسارى قىزمەتىن اتقارىپ كەلگەن. 2002 جىلى «ەرەن ەنبەگى ءۇشىن» مەدالىمەن ماراپاتتالعان. جولدىباي بازار. دەرەككوز: قوستاناي وبلىسى اكىمىنىڭ رەسمي سايتى. فوتو: odk.kz.