ەلىمىزدە ەنەرگوتيىمدىلىكتى ارتتىرۋ جوباسى جۇزەگە اسىرىلادى

استانا. 18 ماۋسىم. ەلىمىزدىڭ ەنەرگەتيكالىق تيىمدىلىگىن ارتتىرۋعا باعىتتالعان جوبانى جۇزەگە اسىرۋ ماقساتىندا ۇكىمەت پەن دۇنيەجۇزىلىك بانك اراسىندا گرانتتىق كەلىسىمگە قول قويىلدى. بۇل تۋرالى i-news.kz حابارلادى. كەلىسىم بويىنشا اتقارىلاتىن جۇمىستاردىڭ قۇنى 21,7 ملن. دوللارعا باعالاندى. قۇجاتقا ۇكىمەت تاراپىنان پرەمەر-ءمينيستردىڭ ورىنباسارى, يندۋستريا جانە جاڭا تەحنولوگيالار ءمينيسترى اسەت يسەكەشەۆ, ال دۇنيەجۇزىلىك بانك جاعىنان اتالعان قارجى ۇيىمىنىڭ قازاقستانداعى تۇراقتى وكىلى شەبنەم اككايا قول قويدى. اسەت يسەكەشەۆتىڭ ايتۋىنشا, كورسەتىلگەن قارجى ەنەرگەتيكا سالاسىن قارجىلاندىرۋدىڭ تۇراقتى مەحانيزمدەرىن قۇرۋعا جانە ەلدەگى ينستيتۋتسيونالدىق بازانى جاقسارتۋعا جۇمسالماق. سونداي-اق, ول: «جوبانى جۇزەگە اسىرۋ كەزىندە ەلدىڭ بارلىق وبلىسىنداعى مەملەكەتتىك, الەۋمەتتىك ماڭىزى بار نىسانداردىڭ مودەرنيزاتسيالانۋى جوسپارلانىپ وتىر. سولاردىڭ ىشىندە 20 مەكتەپ پەن بالاباقشا, 5 اۋرۋحانا جانە تەحنيكالىق جارىق بەرۋ جوباسى جاڭعىرتىلادى. سونداي-اق, بۇل نىسانداردا ەنەرگيا ۇنەمدەۋ جوباسى دايىندالادى», – دەدى. جولدىباي بازار. دەرەككوز: i-news.kz. فوتو: i-news.kz.