اقمولا وبلىسى ەرەيمەنتاۋ اۋدانىنا جاڭا اكىم تاعايىندالدى

استانا. 18 ماۋسىم. اقمولا وبلىسىنىڭ اكىمى سەرگەي كۋلاگيننىڭ وكىمىمەن اۋداندىق ءماسليحاتتىڭ كەزەكتەن تىس سەسسياسىندا ەرمەك بەكەن ۇلى نۇعىمانوۆ ەرەيمەنتاۋ اۋدانىنىڭ اكىمى بولىپ بەكىتىلدى. بۇل تۋرالى «قازاقپارات» حابارلادى. 1957 جىلدىڭ 20 قىركۇيەگىندە اقمولا وبلىسىنىڭ الەكسەەۆكا اۋدانىندا تۋعان ەرمەك بەكەن ۇلى نۇعىمانوۆ 1982 جىلى تسەلينوگراد اۋىل شارۋاشىلىعى ينستيتۋتىن بىتىرگەن. ماماندىعى – اگرونوم. ول ەڭبەك جولىن 1975 جىلى بۇرىنعى كوكشەتاۋ وبلىسى ءۋاليحانوۆ اۋدانى «زولاتايا نيۆا» كەڭشارىندا مەحانيزاتور بولىپ باستاعان. 1979-1996 جىلدار ارالىعىندا ءتۇرلى سالادا جۇمىس ىستەدى. 1996 جىلى بۇرىنعى كوكشەتاۋ اۋدانى  اكىمىنىڭ ورىنباسارى, 1997 جىل زەرەندى اۋدانى اكىمىنىڭ ورىنباسارى قىزمەتىن اتقاردى. 2004  جىلى  جاقسى اۋدانىنىڭ, 2007 جىلى بۇلاندى اۋدانىنىڭ اكىمى بولىپ تاعايىندالدى. ال وسى تاعايىنداۋعا دەيىن ول اقمولا وبلىستىق اۋىل شارۋاشىلىعى باسقارماسى باسشىسىنىڭ ورىنباسارى قىزمەتىن اتقاردى. جولدىباي بازار. دەرەككوز: «قازاقپارات». فوتو: novosti-ru.ru.