تەكەلىنىڭ ءتاتتى تاعامدارى

اس – ادامنىڭ ارقاۋى. ۇننان جاسالاتىن اس-ءدامدى قاراپايىم حالىق كۇنىگە قولدانادى. جۇمىسباستى قىز-كەلىنشەكتەر ءۇشىن ءتاتتى تاعامداردى دۇكەننەن ساتىپ الا سالعان الدەقايدا ءتيىمدى. سوندىقتان جەتىسۋلىق ايەلدەر الدىمەن تەكەلى ونىمدەرىنە كەزەككە تۇرادى. ونىڭ ىشىندە ءجيى سۇرانىسقا يە – شوكولاد جاعىلعان «ۋمكا» پىراندىگى. ونىڭ ءدامدى بولىپ دايىندالۋىنىڭ سىرى تەك «بادەلحان» جك-نىڭ تاجىريبەلى شەبەرلەرىنە عانا ايان. 10 جىلدان بەرى وسى يگىلىكتى ىسپەن اينالىسىپ كەلە جاتقان اسپازدار قىر-سىرىن بىزگە بايانداپ بەردى.

جەتىسۋ وبلىسى اكىمىنىڭ ءباسپاسوز قىز­مەتىنىڭ مالىمەتىنە سۇيەنسەك، وسىدان 20 جىل بۇرىن شاعىن تسەح رەتىندە اشىلعان كاسىپورىن بىرتە-بىرتە ىرگەسىن كەڭەيتىپ، بۇگىندە ايتۋلى ءوندىرىس ورنىنا اينالعان. ەكى مىڭىنشى جىلداردىڭ باسىندا دوس­تارىمەن ءوزارا كەڭەسىپ، وسى كەلەلى ءىستى كاسىپكە اينالدىرۋعا نيەتتەنگەن تالعات توڭكەرىس ۇلى العاشقى قيىندىقتاردى ەسكە الدى. اۋەلدە مۇنداي ۇلكەن كاسىپورىنعا اينالدىرۋ ويىندا دا بولماعان.

«ەشقانداي عيماراتىمىز، ارنايى قۇرال-جابدىقتارىمىز بولعان جوق. تەك شاعىن ءبىر ورىن تاۋىپ ورنىقتىق. بىراق بىرتە-بىرتە ءتاتتى پىسىرۋگە بار ىنتامىزبەن كىرىستىك. تەكەلىنىڭ اتىن شىعاراتىن ساپالى ءونىم جاساساق دەپ تالپىندىق. تىنىمسىز ەڭبەكتەنۋدىڭ ناتيجەسىندە ارمانىمىز ورىندالدى. 2010 جىلدان بەرى ءونىمىمىزدى «الاقاي» برەندىمەن شىعارىپ كەلەمىز. ءبىزدىڭ پىراندىكتەرىمىز تەكەلى، تالدىقورعان قالالارى مەن وبلىس اۋماعىندا عانا ەمەس، استانا، الماتى، قاراعاندى قالالارىندا دا ءوتىمدى. ون جىلدان اسا ۋاقىت وسى وڭىرلەرگە ءونى­مى­مىزدى جەتكىزىپ وتىرمىز»، دەدى ت.توڭكەرىس ۇلى.

ماسەلەن، كاسىپورىندا بۇرىننان كەلە جاتقان ءوندىرىس شەبەرلەرى بار. سولاردىڭ ءبىرى – ليۋدميلا ستەبەنەۆا. ونىڭ مۇندا ەڭبەك ەتىپ جۇرگەنىنە ون جىلعا جۋىقتاعان. كاسىبي مامان پىراندىك ءپىسىرۋ وندىرىستىك جولعا قويىلعانىن، مۇنداعى ۇدەرىستەر 30 پايىز اۆتوماتتاندىرىلعانىن ايتتى. ايتالىق، قامىردى بولىكتەرگە ءبولىپ، پىراندىكتى دومالاق فورماعا كەلتىرۋ ءىسىن ارنايى قۇرىلعىلار اتقارادى. تەك سوپاقشا، جۇمىرلاۋ كەلگەن «قازاقستان» پىراندىكتەرى عانا قولدان دايىندالىپ پىسىرىلەدى.

كاسىپورىن ديرەكتورىنىڭ ايتۋىنشا، 2018 جىلى جەكە قاراجاتىنا ارنايى جابدىقتار ساتىپ العان. كومپيۋتەرلىك باعدارلامانىڭ كومەگىمەن وندا 12 مينۋت سايىن 70 كگ قامىر قاجەتتى فورمالاردا بولىكتەرگە ءبولىنىپ، پىسىرۋگە جىبەرىلەدى. قولدانىستاعى قۇرىلعىنىڭ كومەگىمەن پىراندىكتىڭ جاڭا تۇرلەرىن دە جاساۋعا بولادى. ءتىپتى ءوندىرىستى اۆتوماتتاندىرۋ اۋقىمىن ۇلعايتۋعا نيەتتى.

«ول ءۇشىن بىزگە مىقتى، تاجىريبەلى تەحنولوگ كەرەك. ەڭ باستىسى ءوندىرىس ۇدەرىسىن اۆتوماتتاندىرۋ دەڭگەيىن ۇلعايتۋ بارىسىندا قىزمەتكەرلەر سانى قىسقارمايدى. بىلىكتى مامانداردىڭ كوپشىلىگى ونداعان جىل بىزبەن بىرگە جۇمىس ىستەپ كەلەدى. سوندىقتان ولاردى كاسىپورىننىڭ ىشىندە باسقا جۇمىسقا اۋىستىرىپ، جۇمىس ورىندارىن ساقتاپ قالامىز. اۆتوماتتاندىرۋ ءىسىن بيىل باستايمىز دەپ وتىرمىز»، دەيدى ت.توڭكەرىس ۇلى.

جالپى، وندىرىستە 58 ادام ەڭبەك ەتەدى. ولاردىڭ جالاقىلارىنىڭ كولەمى – 90 مىڭ مەن 120 مىڭ تەڭگەنىڭ ارالىعىندا. ءتىپتى ىندەت ءورشىپ تۇرعان كەزدە دە كاسىپورىن توقتاعان جوق. قىزمەتكەرلەرىنىڭ قاۋىپ­سىز­دىگى ءۇشىن كاسىپورىن باسشىلىعى ولاردى فابريكانىڭ كولىگىمەن تاسىمالداۋدى ۇيىمداستىرعان.

تەكەلى كونديتەرلىك فابريكاسىندا ءبىر تاۋلىكتە 1-دەن 1،5 تونناعا دەيىن پىران­دىك شىعارادى. جالپى، ءونىم كولەمى تاپ­سىرىسقا بايلانىستى ايقىندالادى. قاجەتتىلىگىنە قاراي سىيلىق سۋۆەنيرى رەتىندەگى ءارتۇرلى پىراندىك تە پىسىرىلەدى. بۇگىندە فابريكادا ءتاتتى پىراندىكتىڭ قويىتىلعان ءسۇتتى، شوكولادتى، بانانمەن، تاڭقۋرايمەن، ليمونمەن، قۇلپىنايمەن، قويبۇلدىرگەنمەن 13 ءتۇرى شىعارىلادى.

ءتاتتىنىڭ تۇرلەرىن سان قيلى ەتۋ قامىر­دىڭ قۇرامى مەن جاقپاسىنا بايلانىستى. وسىنىڭ ىشىندە تۇتىنۋشىلار اراسىندا ەڭ كوپ سۇرانىسقا يە «ۋمكا» پىراندىكتەرى اق جانە قارا شوكولادپەن، كەيدە جەر­جاڭ­عاق قوسىپ پىسىرىلەدى. پىراندىكتىڭ ءدال وسى ءتۇرىن تەكەلىنىڭ برەندى دەۋگە بولادى. تسەحقا بوگدە ادامنىڭ كىرۋىنە رۇقسات ەتىلمەيدى. مۇندا ونداعان جىلدان بەرى پىراندىك ءپىسىرۋ شەبەرلەرى ەرەكشە رەتسەپتتى كوزدىڭ قاراشىعىنداي قورعاپ، بارىنشا قۇپيا ساقتاپ كەلەدى.

«شيكىزاتتىڭ قىمباتتاعانىنا بايلانىستى ونىمدەرىمىزدىڭ قۇنى وسكەنى راس. ءبىز وتاندىق ونىمدەردى، ياعني وزىمىزدە شىعاتىن ۇن، ماي، قانت، ءسۇتتى قولدانامىز. وتكەن كوكتەمدە ەلىمىزدەگى كوپتەگەن كونديتەرمەن قاتار قانت تاپشىلىعى پروبلەماسىمەن ءبىز دە بەتپە-بەت كەلدىك. بىراق جەرگىلىكتى اكىمدىكتىڭ قولداۋى ارقىلى الماتىدان قانت جەتكىزىلدى. بيىل قانتقا قاتىستى مۇنداي دۇربەلەڭ بولمايدى دەپ ۇمىتتەنەمىز»، دەيدى ت.توڭكەرىس ۇلى.

وسى رەتتە ەسكە سالا كەتەيىك، وبلىستىق تۇ­راق­تاندىرۋ قورىنا جەتىسۋلىقتار ءۇشىن كوكسۋ قانت زاۋىتىنان 2 190 توننا قانت ساتىپ الىندى. بۇعان جالپى سوماسى 920 ملن تەڭگە جۇمسالعان. ونداعى ماقسات بىلتىرعىداي قانت تاپشىلىعى تۋىنداعان جاعدايدا نەمەسە باعا كۇرت وسكەن ساتتە قانت ساتىلىمعا شىعارىلادى. بۇل وڭىردە شەكەر جەتىسپەۋشىلىگىنىڭ الدىن الۋعا ىقپال ەتەتىن بىردەن-ءبىر امال بولماق. قاراپايىم حالىق بەكەردەن بەكەر الاڭداماسا بولادى.

جەتىسۋ وبلىسى