ەلامان قۋاتوۆ: ارمانىم – الەم چەمپيونى بولۋ

بەرتىن كەلە قويان-قولتىق سپورتى لاتىن امەريكاسى مەن ەۋروپا ەلدەرىندە، كەيىننەن ازيا قۇرلىعىندا قارقىندى دامي باس­تادى. ءدال وسى ازيا ەلدەرىنىڭ سپورتشىلارى قولدانعان ستيل بۇگىنگە دەيىن جەتكەن. بۇل جەكپە-جەكتە ەكى نارسەگە باسا ءمان بە­رىلەدى. ول – قورعانىس پەن شابۋىل. قويان-قولتىق ۇرىسىنىڭ ەرەجەسى بويىنشا، سپورتشىلار قارسىلاسقا سوققىنى قورعانا ءجۇرىپ جاساۋعا ءتيىس. سونداي-اق وسى سپورت ءتۇرىن سەرىك ەتكەن جاندارعا پسيحولوگيالىق دايىندىقتىڭ دا اسا ماڭىزدى ەكەنىن ايتا كەتكەن ءجون. تاتامي ۇستىندە ەركىن قيمىلداي وتىرىپ، قورعانا ءجۇرىپ سوققى جاساۋ دا جاۋىنگەرلىك ونەردى قاجەت ەتەدى. الايدا ارميالىق قويان-قولتىق ۇرىستا كەيبىر تىيىم سالىنعان ادىستەرگە (شىنتاق، تىزە جانە باس سوققىلارىنا) رۇقسات بەرىلگەن.

بىلتىر ەلوردادا قويان-قول­تىق ۇرىستان رەسپۋب­ليكا­لىق دەڭگەيدەگى قورعانىس ءمينيسترى­نىڭ كۋبوگى ۇيىمداستىرىلدى. اسا تارتىستى وتكەن جەكپە-جەك­تەردە قارسىلاستارىنان با­سىم تۇسكەن دارىندى سپورت­شى­مىز ەلامان قۋاتوۆ جارىس جەڭىمپازى اتاندى. كىل مىق­تىلاردىڭ قاتارىنان كو­رىنگەن كەيىپكەرىمىز بۇعان دەيىن دە ەل بىرىنشىلىگىندە ەكى مارتە توپ جارىپ، تمد ەلدەرىنىڭ ارميالارى اراسىنداعى قويان-قولتىق ۇرىستىڭ كۇمىس جۇلدەسىن موينىنا تاققان.

ەلامانعا سپورت دەگەن ءسوز بالا كۇنىنەن جاقسى تانىس. قاجىمۇقان مۇڭايتپاسوۆ اتىن­داعى سپورت مەكتەپ-ينتەرناتىن ءتامامداپ، 61993 اسكەري بو­لىمىندە مەرزىمدى اسكەري قىز­مەتىن وتەگەن دەسانتشى جىگىت جەك­پە-جەكتى كىشكەنتايىنان سەرىك ەتكەن. قازاقتىڭ داڭقتى بوكسشىسى، 2000 جىلعى سيدنەي وليمپياداسىنىڭ چەمپيونى ەرماحان ىبىرايىموۆقا ۇقساسام دەگەن ارمانى ونىڭ سپورتقا دەگەن قىزىعۋشىلىعىن ەسەلەي ءتۇستى.

اسكەري قىزمەت پەن سپورتتى قاتار الىپ جۇرگەن ەلامان بۇگىندە ەلورداداعى دەسانتتىق-شابۋىلداۋ اسكەرىندە ەڭبەك ەتەدى. بوزبالا كۇنىنەن سپورتتىڭ قىر-سىرىنا قانىققان كەيىپ­كەرىمىز دەسانتشىلار اراسىندا دا ورەلى ونەرىمەن بىر­دەن كوزگە ءتۇستى. جوعارىدا ايت­قا­نىمىزداي، قازاقستان مەن تمد ەلدەرى اراسىنداعى بىرىن­شىلىكتەرگە قاتىسىپ، قانجى­عاسى بوس قايتپادى. سونىمەن قاتار رەسپۋبليكالىق دەڭگەيدەگى ءتۇرلى جارىستا دا توپ جاردى.

– بىلتىر ەلوردادا ۇيىم­داستىرىلعان قورعانىس مينيستر­­لى­گىنىڭ كۋبوگى ءۇشىن وت­كەن جارىستا فينالعا دەيىن ءۇش جەكپە-جەك وتكىزدىم. رەسپۋبليكالىق تۋرنير بولعان سوڭ، ونىڭ ۇس­تىنە كۇشتىك قۇرىلىمدار اراسىندا وتكەن سوڭ مۇندا وسال قار­سىلاستاردىڭ بولمايتىنى انىق. فينالداعى قارسىلاسىم دا قارىمدى بولدى. كوبىنە پار­تەرگە كىرمەي، قي­مىلداي ءجۇ­رىپ، سوققى جاسادىم. سونىڭ ناتي­جەسىندە جارىس جەڭىمپازى اتاندىم، – دەيدى ە.قۋاتوۆ.

«مۇنداي جەكپە-جەكتە جىل­­دامدىق پەن سوققىنىڭ كۇ­شى ماڭىزدى. سەبەبى قارسى­لاس­تى لاقتىرۋعا، اۋىرتۋ ءادى­سىن قول­­دانۋعا كۇش پەن شاپشاڭ­دىق­­­تى تالاپ ەتىلەدى. اۋىر­تۋ ءادىسى – كوبىنە پارتەرگە كىرىپ، قار­سىلاستى لاقتىرۋ، جام­باس­قا الىپ جىعۋدان كەيىن جا­سا­لاتىن ءادىس ءتۇرى. ال قيمىل­داي ءجۇرىپ سوققى جاساۋدا قار­­­­سىلاستى السىرەتە الا­سىڭ. قاپ­­تالدان، باسقا، بەتكە، ىش­كە قول­مەن، اياقپەن (لوۋ-كيك)، شىن­تاقپەن سوققى جاساۋ ارقى­لى مىقتى سوققىلارىڭمەن ەرەك­شەلەنەسىڭ»، دەيدى ەل چەمپيونى.

ايتپاقشى، جاقسىلىق ۇشكەمپىروۆ اتىنداعى جەكپە-جەك سارايىندا وتكەن دودادا ەلاماننىڭ جانكۇيەرلەرى وعان قىزۋ قولداۋ كورسەتتى. ءتىپ­تى كەي ساتتە كورەرمەندەردىڭ قول­داۋى سپورتشىعا جىگەر بە­­رىپ، قارسىلاستىڭ الدىندا ءوزىن مىقتى ۇستاۋعا ىق­پال ەت­كەنىن دە جاسىرمادى. چەم­پيوننىڭ ءوزى دە سپورت كەشە­نىنە جينالعان دەسانتشى ارىپ­تەستەرى مەن جارىستىڭ باسىنان اياعىنا دەيىن قىزۋ قولداۋ كورسەتكەن باسشىلىق قۇرامىنا دا ءوز ريزاشىلىعىن جەتكىزدى. تارتىستى جارىستا قۇرامىندا ەلامانداي مىقتىسى بار قور­عانىس مينيسترلىگىنىڭ كومانداسى دا ءۇشىنشى ورىن الىپ، جۇل­دەلى قايتتى.

ەلاماننىڭ جەكە باپكەرى بەكبولات احمەتوۆ تە جەڭىس تۇ­عى­رىنان كورىنگەن شاكىرتىنىڭ ونە­رىنە ءدان ريزا. ەندى ولار بيىل ەلىمىزدە وتەتىن قويان-قولتىق ۇرىستان الەم چەمپيوناتىنىڭ ىرىكتەۋ كەزەڭىنە قىزۋ دايىندىق جۇرگىزىپ جاتىر.

– 2023 جىلى قويان-قولتىق ۇرىستان الەم بىرىنشىلىگى قازاق­ستاندا وتەدى. جىل باسىن­دا الەمدىك دودادا ەل نامىسىن قور­عايتىن سپورتشىلار ىرىك­تەلەدى. ەندى سول سايىستا ءتاۋىر ناتيجە كورسەتىپ، الەم چەمپيو­ناتىندا ەل نامىسىن ابىرويمەن قورعايمىز دەگەن ۇمىتتەمىز. بۇيىرسا، ءوز جانكۇيەرلەرىمىزدىڭ الدىندا جەڭىسكە جەتىپ، كوك تۋىمىزدى جەلبىرەتۋ ءۇشىن با­رىمىزدى سالامىز، – دەيدى ب.اح­مەتوۆ.

الەم بىرىنشىلىگىنە ىرىكتەۋ سايىسى وسى اقپان ايىنىڭ سو­ڭ­ىندا وتپەك.

قارلىعاش اقىلبەك،

اسكەري جۋرناليست