كينو • 05 اقپان، 2023

افريكاداعى قازاق كينوسى

كامەرۋن استاناسى ياۋندەدە YARHA Festival حالىقارالىق كينوفەستيۆالى ءوتتى. الەمدىك كينو بايگەسىندە قازاق كينوسىنىڭ ارنايى كورسەتىلىمدەرى ۇيىمداستىرىلىپ، افريكا كورەرمەندەرى العاش رەت وتاندىق فيلمدەرىمىزبەن تانىستى.

ايگۇل احانبايقىزى

مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن «نارتاي» ءفيلمى فەستيۆالدىڭ نەگىزگى كونكۋرستىق باعدارلاماسىنا قاتىسىپ، ءتورت بىردەي جۇلدەگە يە بولىپ، «ۇزدىك كوركەم فيلم» اتاندى. سونىمەن قاتار فەستيۆال باعدارلاماسى اياسىندا افريكالىق كورەرمەندەرگە باسقا دا وتاندىق كينو كارتينالار تانىستىرىلدى.

– مەن قازاقستاندا تۇسىرىلگەن كوركەم ءفيلمدى العاش رەت كورىپ وتىرمىن، بۇعان دەيىن تەك دەرەكتى فيلمدەردى تاماشالاعان ەدىم. كينو مامانى باسقا ەلدەن كەلگەن كاسىپقويدىڭ جۇمىسىن كورگەندە، ەڭ الدىمەن كينو ءتىلىن تۇسىنۋگە تىرىسادى. بۇل فيلمدە كينو ءتىلى كەرەمەت كورىنىس تاپقان. قازاق كينوسىنىڭ باستى ەرەكشەلىگى دە وسىندا. قازاق ەلىنىڭ فيلمدەرىن كورگەندە، ءبىز كينو تىلىندە جەتكىزىلگەن بەلگىلى ءبىر وقيعاعا تاپ بولامىز جانە مەنى باۋراعان ءدال سول سەزىم،– دەدى كينوفەستيۆال قوناقتارىنىڭ ءبىرى، كانن كينوفەستيۆالىنىڭ قاتىسۋشىسى، رەجيسسەر مۋسسا تۋرە.

افريكالىق كورەرمەندەر قازاق كينوسىنىڭ دەڭگەيىن جوعارى باعالادى، ال يندۋستريا ماماندارى سەرىكتەستىك ورناتۋدى ۇسىندى.

– YARHA فەستيۆالىمەن سەرىكتەستىك كەلەسى جىلى دا جالعاسادى دەپ ۇمىتتەنەمىن. بۇل وقيعانىڭ قازاقستاننىڭ وڭ ءيميدجىن ىلگەرىلەتۋگە ءوز ۇلەسىن قوساتىنىنا سەنىمدىمىن. مادەني ديپلوماتيا جالعاسۋى كەرەك. ءبىز قازاقستاندىق كارتينالاردىڭ ماروككو، تۋنيس، سەنەگال جانە كونگو ەلدەرىندە كورسەتىلگەنىن قالايمىز، – دەپ اتاپ ءوتتى فرانتسياداعى قازاقستاندىق كينو قاۋىمداستىعىنىڭ پرەزيدەنتى اندرە يۆانوۆ.

كامەرۋنداعى وتاندىق فيلمدەردىڭ كورسەتىلىمىن فرانتسياداعى قازاقستاندىق كينو قاۋىمداستىعى ۇيىمداستىردى. بۇل – افريكاداعى العاشقى اۋقىمدى شارا.