بيىل 149 ينۆەستيتسيالىق جوبا جۇزەگە اسىرىلادى

اتالعان جوبالاردىڭ دەنى قۇرىلىس يندۋسترياسى، تاماق ونەركاسىبى، ماشينا جاساۋ مەن مەتاللۋرگيا سالالارىنا قاتىستى. ينۆەستيتسيالىق جوبالاردىڭ كوشىن استانا قالاسى مەن اقتوبە جانە الماتى وبلىستارى باستاپ تۇرعانىن ايتا كەتۋ كەرەك.

ماسەلەن، ءىرى جوبالاردىڭ قاتارىندا «بوگاتىر» كەنىشىندەگى «كومىر ءوندىرۋدىڭ تسيكلدىك-اعىندىق تەحنولوگياسىن» ايتۋعا بولادى. ونىڭ ماقساتى ەلەكتر ستانسالارىن قاتتى وتىنمەن ۇزدىكسىز قامتاماسىز ەتۋگە بايلانىستى ەسكىرگەن تەحنولوگيالىق جابدىقتى جاڭارتۋ، سونداي-اق 230 مەتر تەرەڭدىكتەن كومىر قورىن تولىق ءارى ءتيىمدى وندىرۋگە باعىتتالعان.

سونىمەن قاتار ەكىباستۇزدا فەرروقورىتپا زاۋىتىن ىسكە قوسۋ جوسپارلانىپ وتىر. ونىڭ وندىرىستىك قۋاتى جىلىنا 240 مىڭ تونناعا دەيىن ءونىم شىعارۋعا قاۋقارلى. جاڭا زاۋىت ىسكە قوسىلعان بويدا ونىڭ ونىمدەرى الەمدىك ستاندارتتىڭ بارلىق تالابىنا سايكەس كەلەدى دەپ كۇتىلىپ وتىر.

بۇدان باسقا «شۇباركول كومىر» اق ارنايى كوكس ءونىمىن شىعاراتىن زاۋىتتىڭ جۇمىسىن جولعا قويماق. وسى كاسىپورىننىڭ سالىنۋى يمپورتتى الماستىرۋ باعدارلاماسى اياسىندا جۇزەگە اسىرىلعان تاعى ءبىر تابىستى جوباعا اينالادى. جاڭا ءوندىرىس ورنىندا 400 مىڭ تونناعا دەيىن ءونىم دايىندالادى دەپ مەجەلەنىپ وتىر. وسى ارقىلى «شۇباركول كومىر» اق قوسىلعان قۇنى جوعارى ءونىم ءوندىرىپ، يمپورت تاۋەلدىلىگىنەن ارىلۋعا مۇمكىندىك الادى.

ال Topan Chemical Industries كومپانياسى كاۋستيكالىق سودا مەن تۇز قىشقىلىن وندىرەتىن حيميا زاۋىتىنىڭ جوباسىن قولعا العانىن ايتا كەتكەن ءجون. اتالعان حيميالىق ءونىم ءوندىرىسى ماڭىزدى ونەركاسىپتىك رەاگەنتتەردىڭ يمپورتىن ەداۋىر تومەندەتىپ، قازاقستان مەن تاياۋ شەت مەملەكەتتەردىڭ كاسىپورىندارىن وتاندىق ءوندىرىستىڭ ساپالى حيميالىق ونىمدەرىمەن قامتاماسىز ەتۋگە سەپتىگىن تيگىزەدى.