كەزدەسۋ بارىسىندا تاراپتار سوتقا دەيىنگى تەرگەپ-تەكسەرۋ ساتىسىندا ادام قۇقىقتارىن قورعاۋ, ونىڭ ىشىندە قازاقستان رەسپۋبليكاسىنىڭ قۇقىق قورعاۋ قىزمەتىندە ازاپتاۋدىڭ الدىن الۋ ماسەلەلەرىن, سونداي-اق كوميسسيانىڭ ەۋروپالىق قۇرىلىمدارمەن ىنتىماقتاستىعىنىڭ پەرسپەكتيۆالارى تۋرالى تالقىلادى.
كوميسسيا توراعاسى يگور روگوۆ قازاقستان رەسپۋبليكاسىندا ادام قۇقىقتارىن قورعاۋ, ونىڭ ىشىندە سوتقا دەيىنگى تەرگەپ-تەكسەرۋ ساتىسىندا جۇيەلى جۇمىس جۇرگىزىلىپ جاتقانىن, بۇل رەتتە كوميسسيا ەۋروپا كەڭەسىنەن ەلەۋلى ادىسنامالىق جانە ۇيىمداستىرۋشىلىق كومەك الاتىنىن اتاپ ءوتتى. بۇگىندە رەسپۋبليكادا قۇقىق قورعاۋ جانە سوت جۇيەلەرىن تەرەڭ رەفورمالاۋ جۇرگىزىلىپ جاتقان كەزدە ەۋروپا كەڭەسىنىڭ HELP باعدارلاماسىن ساراپتامالىق قولداۋدىڭ ماڭىزدىلىعىن باعالاماۋعا بولمايدى.
ەۋروپا كەڭەسى دەلەگاتسياسىنىڭ باسشىسى سەرگەي ديكمان ەۋروپالىق قۇرىلىمداردىڭ قازاقستاندىق قۇقىق قورعاۋ ينستيتۋتتارىمەن ىنتىماقتاستىعىن دامىتۋعا قاناعاتتانعاندىعىن ءبىلدىرىپ, ساپاردىڭ ماقساتى قۇقىق قورعاۋ سالاسىندا ادام قۇقىقتارىن قورعاۋ, ونىڭ ىشىندە ازاپتاۋ سياقتى جاعىمسىز قۇبىلىستىڭ الدىن الۋ تەتىكتەرىن ازىرلەۋ ماقساتىندا زاڭ ماماندىقتارىنىڭ وكىلدەرى ءۇشىن جاڭا ءبىلىم بەرۋ باعدارلامالارىن تالقىلاۋ بولىپ تابىلاتىنىن ايتتى.
ەۋروپا كەڭەسىنىڭ دەلەگاتسياسى ەلىمىزدىڭ جوعارعى سوتى, باس پروكۋراتۋراسى, ادىلەت مينيسترلىگى, رەسپۋبليكالىق ادۆوكاتتار القاسىنىڭ, ادام قۇقىقتارى جونىندەگى ۋاكىلىنىڭ باسشىلىعىمەن, سونداي-اق باس پروكۋراتۋرا جانىنداعى قۇقىق قورعاۋ ورگاندارى اكادەمياسى مەن جوعارعى سوت جانىنداعى سوت تورەلىگى اكادەمياسىنىڭ عالىمدارى جانە وقىتۋشىلارىمەن كەزدەسۋدى جوسپارلاپ وتىر.
