بۇگىن - قازاقستان مەن ەۋروپالىق وداق ديپلوماتيالىق قارىم-قاتىناس ورناتقان كۇن

قازاقستان رەسپۋبليكاسى پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى جانە ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى – ەۋروپالىق كوميسسيانىڭ ۆيتسە-پرەزيدەنتى جوزەپ بوررەلل ديپلوماتيالىق قارىم-قاتىناستاردىڭ 30 جىلدىعىنا وراي بىرلەسكەن مالىمدەمە جاسادى.

«ارىپتەستىك جانە ىنتىماقتاستىق تۋرالى كەلىسىمگە قول قويىلعاننان باستاپ 2020 جىلى كەڭەيتىلگەن ارىپتەستىك جانە ىنتىماقتاستىق تۋرالى كەلىسىم (كاىك) كۇشىنە ەنگەنگە دەيىن ءبىزدىڭ سەرپىندى قارىم-قاتىناسىمىز ۇزاق جولدان ءوتتى.

قازىرگى ۋاقىتتا كەڭەيتىلگەن ارىپتەستىك جانە ىنتىماقتاستىق تۋرالى كەلىسىم ەكونوميكا، ساۋدا جانە ينۆەستيتسيا سالالارىنان باستاپ اۆياتسيا، ءبىلىم بەرۋ جانە زەرتتەۋ، ازاماتتىق قوعام مەن ادام قۇقىقتارى سالاسىنداعى ارىپتەستىككە دەيىن ىنتىماقتاستىقتىڭ 29 سالاسىن قامتيدى. قازاقستان مەن ەو كاىك-تى تولىق ىسكە اسىرۋ ماقساتىندا ءوزارا ءتيىمدى ەكىجاقتى قاتىناستاردى ودان ءارى دامىتۋعا جانە نىعايتۋعا بەرىك ۇستانىمىن ساقتاپ وتىر.

ەو «ادىلەتتى قازاقستان» تۇجىرىمىن ىلگەرىلەتۋگە باعىتتالعان قازاقستاننىڭ ماڭىزدى ساياسي جانە ەكونوميكالىق رەفورمالارىن، سونداي-اق 2022 جىلعى قاڭتار وقيعالارىنا تولىق جانە اشىق تەرگەپ-تەكسەرۋ جۇرگىزۋگە ەلدىڭ بەيىلدىلىگىن تولىق قولدايتىنىن تاعى دا مالىمدەيدى.

شيكىزات، اككۋمۋلياتورلىق باتارەيالار مەن جاسىل سۋتەكتىڭ تۇراقتى قۇن تىزبەكتەرى جونىندەگى ستراتەگيالىق ارىپتەستىك تۋرالى جاقىندا قول قويىلعان ءوزارا تۇسىنىستىك مەموراندۋمى جاسىل جانە تسيفرلىق تەحنولوگيالارعا كوشۋ ءۇشىن ماڭىزدى ءرول اتقاراتىن بولادى. ءبىز جوعارى دەڭگەيدەگى بايلانىستاردى كەڭەيتۋدى، پارلامەنتتىك ىنتىماقتاستىقتى تەرەڭدەتۋدى، ىسكەرلىك جانە ادامدار اراسىنداعى بايلانىستاردى نىعايتۋدى، سونداي-اق ادام قۇقىقتارى مەن زاڭ ۇستەمدىگى جونىندەگى ديالوگتى جالعاستىراتىن بولامىز.

قازىرگى گەوساياسي تۇرعىدا ءبىز بۇۇ جارعىسىنا، حالىقارالىق قۇقىققا جانە ەگەمەندىك پەن اۋماقتىق تۇتاستىقتىڭ قاعيداتتارىنا بەرىك بەيىلدىلىگىمىزدى راستايمىز. بەيبىتشىلىك پەن قاۋىپسىزدىكتى ساقتاۋدىڭ، سونداي-اق داۋلاردى ديپلوماتيالىق جولمەن شەشۋدىڭ ماڭىزدىلىعىن اتاپ وتەمىز.

ءبىز ەو مەن ورتالىق ازيا اراسىنداعى ىنتىماقتاستىق ءۇشىن بەرىك ءارى بولاشاعى زور نەگىز قۇرۋعا، سونداي-اق وركەندەۋدىڭ، تۇراقتى جانە ورنىقتى دامۋدىڭ ىرگەتاسى بولىپ تابىلاتىن ورتالىق ازياداعى وڭىرلىك ديالوگتى نىعايتۋعا دەگەن ۇمتىلىسىمىزدى تاعى دا راستايمىز. كەلەسى قادام رەتىندە ءبىز 2023 جىلى قازاقستاندا الماتى قالاسىندا ەو – ورتالىق ازيا ەكونوميكالىق فورۋمىن وتكىزۋدى اسىعا كۇتەمىز.

قارىم-قاتىناستارىمىز ءۇشىن وسى ماڭىزدى جىلى ءبىز مەيلىنشە تىعىز جانە جان-جاقتى ىنتىماقتاستىعىمىزدىڭ بولاشاعىنا سەنىممەن قارايمىز. ونى ەۋروپالىق وداق پەن قازاقستان حالقىنىڭ ءوزارا يگىلىگى ءۇشىن، سونداي-اق زور وڭىرلىك تۇراقتىلىق پەن وركەندەۋ جولىندا ىلگەرىلەتۋگە بەل بۋدىق»، دەپ جازىلعان مالىمدەمەدە.