چەمپيوندار اۋىلدان شىعادى

تۇركىستان وبلىسىنىڭ ماقتاارال اۋدانىنداعى ەڭبەكشى اۋىلدىق وكرۋگىندە تۋىپ-وسكەن ەلدوس ۇسەن ۇلى تۇسكە دەيىن مەكتەپتە بولسا، كۇن باتقانشا اتا-اناسىنا كومەكتەسىپ ءۇي شارۋاسىمەن اينالىسادى. ودان كەيىن اۋدان ورتالىعىنا جاتتىعۋعا بارادى. الدىمەن ول ەركىن كۇرەستىڭ الىپپەسىن مەڭگەردى. العاشقى باپكەرى باحتيەر ەرمانوۆتىڭ: «كۇنىگە سپورتزالعا كەلىپ، بىرەۋدى جىعۋدى عانا ۇيرەنبەي، جان-جاقتى بولىڭدار، ادەبي كىتاپتار وقىڭدار، مەكتەپتە ءتارتىپتى بولىڭدار، شەشەن سويلەي بىلىڭدەر. قازىرگى تەحنولوگيانى ۇيرەنىڭدەر. ەرتەڭ اتاقتى سپورتشى بولىپ، ءتۇرلى مەملەكەتتەرگە جارىسقا بارساڭدار قاجەت بولادى»، دەگەن سوزدەرىن ۇمىتقان ەمەس.

سپورتتاعى العاشقى ەكى جىلىن ە.زۇل­پان فيزيكالىق دايىندىعىنا، كۇرەس ادىس­تەرىن مەڭگەرۋگە ارنادى. العاش رەت ەركىن كۇرەستەن وبلىستىق چەمپيوناتتا باق سىناپ، ەكىنشى ورىندى يەلەندى. وسى العاشقى جەتىستىگىنەن كەيىن اۋدان ورتالىعى مىر­زاكەنتتە جاڭادان اشىلعان پانكراتيون جانە گرەپپلينگ سپورتىنا اۋىس­تى. بۇل سپورتتىڭ جەكپە-جەك تۇرلەرىنەن نۇرجان قاراباەۆ جاتتىقتىرىپ كەلەدى. شاكىرتىنىڭ جەكپە-جەككە دەگەن تالابىن، بويىنداعى قابىلەتىن بايقاعان باپ­كەرى وبلىستىق، رەسپۋبليكالىق، حالىق­ارالىق دودالارعا ءجيى قوسىپ ءجۇر. ناتي­جەسىندە، ەلدوس ۇسەن ۇلى 85 كيلو سالماق دارەجەسىندە پانكراتيوننان جانە گرەپپلينگتەن 2003-2004 جانە 2005-2006 جىل­دارى تۋعان سپورتشىلار اراسىندا وبلىستىق چەمپيوناتتاردا، تۋرنيرلەردە 12 رەت توپ جارىپ ۇلگەردى. بىلتىر ساۋىردە پانكراتيوننان وتكىزىلگەن قازاقستان چەمپيوناتىندا 4 قارسىلاسىن ءتۇرلى ادىسپەن جەڭىپ، ەل چەمپيونى اتاندى. ال تامىز ايىندا استانادا وتكەن گرەپپلينگتەن ازيا چەمپيوناتىندا ەلىمىزدىڭ كوك بايراعىن كوتەرىپ، چەمپيون اتاندى.

وسىنداي جەتىستىكتەرگە جەتكىزگەن باپ­­كەرلەرىنە ريزاشىلىعىن بىلدىرگەن ەلدوس ەرەجەسىز جەكپە-جەكتەن ەلىمىزدىڭ ابى­رويى­ن اسقاقتاتقان د.دۇنگەنباەۆ، ا.نازاروۆ، ە.ەستانوۆ، ش.راحمونوۆ، ق.اح­مەتوۆ، ا.ءاشىموۆ سىندى اعالارىنىڭ جە­ڭىستى جولدارىن جالعاستىرىپ، قازاقتىڭ جاۋىنگەر حالىق ەكەنىن دالەلدەي تۇسكىسى كەلەتىنىن ايتادى. «ەلىمىزدە ەرەجەسىز جەك­پە-جەك ونەرى جىلدان-جىلعا قانات جايىپ دامىپ كەلەدى. جالپى، سپورتتا مەيلى ول جاڭا باستاعان اۋەسقوي نەمەسە كاسىپقوي سپورتشى بولسىن ءوزىنىڭ ءار كەزدەسۋىنە وتە جوعارى دەڭگەيدە دايىندىق جاساۋى كەرەكتىگى ءمالىم. مىنانى جەڭەمىن دەپ وركوكىرەكتەنىپ شىقساڭ، ەرتەڭگى كۇنى ۇتى­لىپ قالۋىڭ مۇمكىن. قارسىلاستى سىيلاۋ كەرەك. ونىڭ ءوزىن عانا ەمەس، ەلىنىڭ تاريحىن دا زەرتتەپ ءبىلۋ ارقىلى ءار كەزدەسۋ سايى­ن دۇنيەتانىمىڭدى دا كەڭەيتىپ وتىرۋ قا­جەت»، دەيدى 16 جاستاعى سپورتشى ە.زۇلپان.

ايتا كەتەلىك، جاس سپورتشى 2022 جىل قورىتىندىسى بويىنشا «اۋداننىڭ ەڭ ۇزدىك سپورتشىسى» اتانعان بولاتىن.

تۇركىستان وبلىسى