قونىستى بولعان كەلىنشەك قولۇشىن سوزعان جاندارعا ريزاشىلىعىن ءبىلدىردى.
– پاتەر جالداپ تۇرىپ جاتقانىمىزعا 15 جىل بولعان ەدى. ءۇيىمىز ورتەنىپ كەتىپ, ءاپ-ساتتە قايعى جۇتىپ قالدىق. العاشقىدا نە ىستەرىمىزدى بىلمەي, بالا-شاعامىزبەن قاتتى كۇيزەلدىك. ءبىزدى دالادا قالدىرماي, جاعدايىمىزدى كورىپ, كومەك بەرگەن, جاردەمدەسكەن اعايىنعا راحمەت. اۋەلى اللا, سوسىن قاراپايىم حالىقتىڭ ارقاسىندا باسپاناعا قول جەتكىزدىك. ەندى ول ءوزىمىزدىڭ جەكە ءۇيىمىز. و باستا راسى كەرەك, جۇرت قايعىمىزعا ورتاقتاسادى, ءۇي اپەرەدى دەگەن وي بولعان جوق ەدى. اسىرەسە, ءۇيىمىزدىڭ بولاتىنىن ەستىگەندە مەنەن بۇرىن بالالارىم ەرەكشە تولقىدى. قۋانىشتان توبەسى كوككە ەكى ەلى جەتپەي قالدى. ءتىپتى بالا-شاعامنىڭ ىشىندەگى تۇڭعىشىم «اناشىم, اللاعا مىڭدا ءبىر شۇكىر. ەندى ءبىز پاتەر جالداپ دالادا قاڭعىرمايمىز», دەپ كوڭىلى بوساپ, كوز جاسىنا ەرىك بەردى. ءيا, يىعىمىزعا تۇسكەن زور اۋىرتپالىقتى كوتەرىسىپ, وسىنداي قۋانىشتى ساتكە جەتكىزگەن حالقىما العىستان باسقا ايتارىم جوق. قۇدايىم ولاردىڭ دا ءاربىرىنىڭ شاڭىراعىنا تەك جاقسىلىقتار سىيلاسىن, – دەدى شاتتىقتان ءجۇزى بال-بۇل جانعان ن.دۇيسەباەۆا.
ءوز كەزەگىندە شاھاردا ءبىر وتباسىن اۋىر جاعدايعا قالدىرعان توتەنشە وقيعانىڭ بولعانىن ەستىگەن كاسىپكەر, ءارى شىمكەنت قالالىق قوعامدىق كەڭەستىڭ مۇشەسى نۇرگۇل قوبلانوۆا دەرەۋ ءتىلسىز جاۋدان جاپا شەككەن كوپبالالى انانىڭ جاعدايىن بىلمەككە ۇمتىلادى. مۇنداي جاناشىرلىقتى «امانات» پارتياسى قالالىق فيليالى اتقارۋشى حاتشىسىنىڭ ورىنباسارى ءمۇراتالى قالمۇراتوۆ تا كورسەتەدى. ولار كوپبالالى وتباسىنىڭ حال-احۋالىن ءبىلىسىپ, تۇرمىسقا قاجەتتى زاتتارمەن جانە كەرەكتى ازىق-تۇلىكپەن قامتاماسىز ەتىپ تۇردى.
كاسىپكەر كەلىنشەك ن.قوبلانوۆانىڭ ايتۋىنشا, تۇنگى اۋا تەمپەراتۋراسى -20 گرادۋستان تومەندەگەن ساقىلداعان سارى ايازدا بالالار دالادا قالىپ قويماسىنشى دەپ قاتتى ۋايىم شەگىپتى. ءسويتىپ شۇعىل ارادا ارىپتەستەرىنە قوڭىراۋ شالىپ, شاما جەتكەنشە جىلۋ جيناۋ اكتسياسىنا مۇرىندىق بولعان. سونىمەن بىرگە قايىرىمدى ىستە شەت قالعىسى كەلمەگەن حالىق قايعىعا دۋشار بولعان كوپبالالى انانىڭ اپكەسى الميرا ساتىبالديەۆانىڭ اتىنداعى جەكە شوتقا قولدان كەلگەنشە قارجى اۋدارعان. قىسقاسى, ساۋاپتى امال جاساۋدا قاراپايىم تۇرعىنداردىڭ ەشقايسىسى دا كومەك قولىن سوزۋدان ايانبادى.
ال قايناربۇلاق ساياجايىنىڭ اۋىل ءبيى اقمارال ومىرزاقوۆا ەلدەن از عانا ۋاقىت ىشىندە 22 ملن تەڭگەنىڭ جينالعانىن ايتادى. سول قوماقتى قاراجاتتىڭ 19,5 ملن تەڭگەسى باسپانا ساتىپ الۋعا جۇمسالسا, قالعان اقشاعا ءۇي جيھازدارى, كورپە-توسەك سەكىلدى ەڭ قاجەتتى تۇرمىستىق بۇيىمدار ساتىپ اپەردى. سونىمەن قاتار جىلۋدان جينالعان قاراجاتتى تاعى دا ءبىر وسىنداي ورتتەن زارداپ شەككەن وتباسىعا جاردەم رەتىندە ۇلەستىرگەن.
اۋىل ءبيىنىڭ ايتۋىنشا, قيىن ساتتە حالىق اۋىزبىرشىلىك تانىتىپ, قايعىنىڭ استىندا قالعان ءبىر شاڭىراققا جۇمىلا كومەك كورسەتكەنى ول البەتتە ەلدە ءالى دە جاناشىر ازاماتتاردىڭ كوپ ەكەنىنىڭ جارقىن دالەلى, ءارى وسىنداي قايىرىمدى قوعام باردا ادامدار ەشقاشان وزدەرىن جالعىز سەزىنبەك ەمەس. مىنە, وسىلايشا, حالىقتىڭ قامقورلىعىنىڭ ناتيجەسىندە بارىنان ايىرىلعان وتباسى قايتا ءۇيلى بولىپ, ولار ءۇشىن باقىتتىڭ باياندى عۇمىرى باستالدى. ەڭ باستىسى وقىس وقيعا ادامداردى, تۇتاس قوعامدى شەنىنە, اتىنا قاراماستان ورتاق ىسكە بىرىكتىرىپ جىبەردى. ولاردىڭ ىشىندە قاراپايىم حالىق تا, كاسىپكەر دە, پارتيا وكىلدەرى دە, ەرىكتىلەر مەن قوعامدىق ۇيىمدار دا بار. ءتىپتى, مەكتەپتە وقيتىن بالالارعا دەيىن قالتالارىنان اكە-شەشەسى بەرگەن تيىندارىن شىعارىپ, قايىرىمدىلىق اكتسياسىنا اتسالىسىپتى.
بۇدان بولەك جالماعان ورتتەن جارامسىز كۇيگە ەنگەن ءۇيدى «ەلگە قىزمەت» قوعامدىق قورى كۇردەلى جوندەۋدەن وتكىزگەن. ال «مەديكەر» جەكە مەديتسينالىق كلينيكاسىنىڭ باسشىسى, ءارى دارىگەر باقىتجان پوزيلوۆ بولسا, زارداپ شەككەن وتباسىعا اسىرەسە كوپبالالى كەلىنشەككە مەديتسينالىق جانە پسيحولوگيالىق كومەك كورسەتۋگە دايىن ەكەنىن جەتكىزدى.
شىمكەنت
