راسىندا, ەلىمىزدەگى سوڭعى وقيعالار, سونىڭ ىشىندە پاندەميا جانە توتەنشە جاعداي رەجىمىن ەنگىزۋ كەزىندە جۋرناليستەردىڭ جۇمىسىن رەتتەۋ ماسەلەسى جەتىلمەگەنى كورىندى. زاڭ جوباسىندا دارىگەرلەر, پوليتسەيلەر جانە قۇتقارۋشىلارمەن تەڭ دارەجەدە وزدەرىنىڭ كاسىبي بورىشتارىن وتەۋ بارىسىندا جۋرناليستەر قىزمەتىن ەرەكشە جاعدايلاردا قۇقىقتىق رەتتەۋدىڭ جولدارى قاراستىرىلعان. مەملەكەتتىك ورگاندارعا سۇرانىس جىبەرۋ, وعان جاۋاپ قايتارۋ مەرزىمى قىسقارتىلادى.
فورۋمدا وڭىرلىك گازەتتەرگە ورتاق پروبلەمالاردىڭ بارلىعى ايتىلدى. ۇسىنىس كوپ. بۇل رەتتە, وكىلەتتى ورگاندار تاراپىنان شەكاراعا جاقىن وڭىرلەردە بۇقارالىق اقپارات قۇرالدارىنا مەملەكەتتىك تاپسىرىس بەرۋدە باسىمدىلىق ۇلتتىق يدەولوگيالىق باعىتقا بەرىلۋگە ءتيىس. مىسالى, پاۆلودار – شەكاراعا جاقىن ورنالاسقان وبلىس ءارى قازاق ءتىلىنىڭ ماسەلەسى تولىق شەشىلمەگەن ءوڭىر. پاۆلودار وبلىستىق «Saryarqa samaly» گازەتىنىڭ تەك ءتىل ماسەلەسىندە عانا ەمەس, ۇلتتىق قۇندىلىقتاردى دارىپتەۋ بويىنشا اتقارىپ كەلە جاتقان ءرولى ۇلكەن. وسى ورايدا, وڭىرلىك باسىلىمدى قولداۋدى كەڭەيتۋ كەرەك دەپ ويلايمىز. شەكارالىق وڭىرلەردە جۇرگىزىلگەن ماركەتينگ زەرتتەۋلەر, وكىنىشكە قاراي, وزگە ءتىلدى اۋديتوريانىڭ باسىمدىعىن كورسەتەدى. بۇل رەتتە قازاقتىلدى وقىرمان اۋقىمىن كەڭەيتۋ كەرەك. «ماسس مەديا تۋرالى» زاڭ جوباسىندا ءسوز ەتىلگەندەي, مەملەكەتتىك تاپسىرىسپەن قاتار, سۋبسيديالاۋ ارقىلى قازاقتىلدى گازەتتەردىڭ جازىلۋ باعاسىن ارزانداتۋعا, وقىرمانىن كوبەيتۋگە ءمان بەرىلسە دەيمىز. ەلدىگىمىزدى ويلاساق, قالاي دا قازاقتىلدى بۇقارالىق اقپارات قۇرالدارىن بىرىڭعاي ادىسپەن تاپسىرىس بەرۋدەن بولەك جەكەشە قولداۋدىڭ تەتىگىن تاۋىپ, جولعا قويىلسا دەيمىز.
گازەت قىزمەتكەرلەرى دە الەۋمەتتىك باسپانامەن قامتىلۋ سەكىلدى وزەكتى ماسەلەلەرمەن ۇشىراسىپ وتىر. بۇل رەتتە مارتەبەنىڭ ءوسىرىلۋى, جەرگىلىكتى بيلىكتىڭ زاڭدى نەگىزدە قولداۋىنا اكەلەدى دەپ سەنەمىز.
نۇربول جايىقباەۆ,
پاۆلودار وبلىستىق «Saryarqa samaly» گازەتىنىڭ باس رەداكتورى
