نەگىزسىز تولەم سۇراپ، جازاعا تارتىلدى

ماسەلەنىڭ ءمان-جايى بىلاي ەكەن. «قامقور-تۇتىنۋ» جشس ارال اۋدانىنداعى مەكتەپتەرمەن بالالارعا ىستىق تاماق بەرۋ قىزمەتىن كور­سەتۋگە كەلىسىمشارت جا­سايدى. الايدا وتكەن جىل­دىڭ 15 قىركۇيەگىندە ءبىر مەكتەپ باسشىسى سەرىكتەستىك ديرەكتورى زياعالادين وتە­نوۆكە حات جولداپ، اس ءمازىرىن kundelik.kz سايتىنا ورنالاستىرۋ ءۇشىن اي سايىن 6 مىڭ تەڭگە تولەۋدى ەسكەرتەدى. اۋدانداعى وزگە دە مەكتەپ باسشىلارىنىڭ تالابى وسىنداي بولىپتى. امالى قالماعان كاسىپكەر 6 مەكتەپكە 1 ايعا سۇراعان اقشالارىن تولەيدى دە كاسىپ­كەر­لەر پالاتاسىنىڭ ارال اۋداندىق فيليالىنان قۇقى­عىن قورعاۋدى سۇرايدى.

اۋداندىق فيليال ديرەكتورى نۇرساۋلە ەمبەرگەنوۆا مەكتەپ باسشىلارىنىڭ ارەكە­تىنە قۇقىقتىق باعا بەرۋ ءۇشىن اۋداندىق پرو­كۋ­را­تۋراعا حات جولدايدى. ماسەلەدەن حاباردار بول­عان كاسىپكەرلەر پالاتا­سى­نىڭ زاڭگەرلەرى ونى جان-جاقتى زەردەلەپ، پالاتا جانىنداعى كاسىپكەرلەردىڭ قۇقىعىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەستە قاراۋعا شەشىم قابىلداپتى.

– وتىرىسقا كاسىپكەر ونلاين قاتىستى. كەڭەس قۇ­را­مىن­داعى قۇقىق قورعاۋ ور­گان­دارىنىڭ دا وكىل­دەرى ءبىراۋىزدان مەكتەپ باس­شى­لارىنىڭ ارەكەتى زاڭ­سىز ەكەنىن ايتتى. وبلىس­تىق پرو­كۋراتۋرا وكىلى كاسىپ­كەر­­دىڭ بۇل شاعىمىنىڭ نەگى­زىن­دە اۋدانداعى وزگە دە مەكتەپ­تەردەگى جاعدايعا تالداۋ جا­ساي­تىنىن جەتكىزدى، – دەي­دى كاسىپكەرلەر پالاتاسى ديرەك­تورىنىڭ ورىنباسارى سالاۆات قۇلماحان.

جاقىندا كاسىپكەرلەر پالاتاسىنا ارال اۋدانىنىڭ پروكۋرورى ماديار بەك­پا­نوۆ­تان حات كەلىپ، وندا مەك­تەپ باسشىلارىنىڭ MektepMenu پلاتفورماسىن پاي­دا­لانۋ ءۇشىن كا­سىپكەرلىك سۋبەكتىلەرىنە نە­گىزسىز تولەم جاساتقانى انىق­تالعانى جا­زىلعان. وسىعان بايلا­نىستى اۋدان­دىق ءبىلىم بو­لىمىنە ۇسى­نىس بەرىلىپ، اسحانا يە­لەرىنىڭ نەگىزسىز تولەنگەن 500 مىڭ تەڭگەگە جۋىق اق­شاسى قايتارىلىپ، 8 كاسىپ­كەر­دىڭ بۇزىلعان قۇقى­عى قالپىنا كەلتىرىلگەن. زاڭ بۇزۋ­شىلىققا جول بەرگەن ءبىلىم سالاسىنىڭ 43 وكىلىنە تار­تىپتىك شارا قولدانىلدى.

قىزىلوردا