مەديتسينا • 24 قاڭتار، 2023

كۇردەلى ىسىككە جاسالعان وپەراتسيا

جۋىردا ۇلتتىق عىلىمي ونكولوگيا ورتالىعىندا دارىگەرلەر سيرەك كەزدەسەتىن قاتەرلى ىسىككە شالدىققان ناۋقاسقا وپەراتسيا جاسادى.

ساندىبەك ءاسانالى

پاتسيەنتكە «كلاتسكين ىسىگى» دياگنوزى قويىلىپتى. اشىپ ايتار بولساق، وبىردىڭ وسى ءتۇرى ءوت جولدارىندا، باۋىر ايماعىنداعى تۇتىكتەردە داميدى ەكەن. دارىگەرلەر كەيىنگى 30 جىلدا الەمدە قاتەرلى ىسىككە شالدىعىپ، قايتىس بولعاندار سانى ەسەلەپ ارتىپ جاتقانىن العا تارتادى. سونىڭ ىشىندە باۋىردان تىس ءوت جولدارىنىڭ قاتەرلى ىسىگى از تىركەلگەنىمەن، اۋرۋدىڭ وسى ءتۇرىن دياگنوستيكالاۋ جانە دەر كەزىندە انىقتاۋ كۇردەلى ماسەلە بولىپ تۇر. مۇنداي دياگنوز ورتا ەسەپپەن 100 مىڭ ادامنان ءبىر، ارى اسسا ءۇش ادامعا عانا قويىلۋى مۇمكىن ەكەن. تاعى ءبىر ستاتيستيكاعا كوز جۇگىرتسەك، كلاتسكين ىسىگى ەۋروپا نەمەسە امەريكا حالقىنا قاراعاندا ازيالىقتاردان ءجيى انىقتالادى دەگەن بولجام بار.

دارىگەرلەر كلاتسكين ىسىگىنە ءتان سيمپتومداردىڭ جوق ەكەنىن ايتادى. مۇنداي جاعدايدا پاتسيەنت ءجىتى تەكسەرىلمەسە، دارىگەرلەردىڭ دەرتتى بىردەن انىقتاۋى كۇردەلىرەك. ماسەلەن، دەرتتىڭ اۋىرسىنۋ سيپاتى حولەتسيستيت، حولەليتياز سىندى اۋرۋلاردىڭ بەلگىلەرىنە ۇقساس بولعاندىقتان، كەيدە دياگنوز دۇرىس قويىلماۋى ابدەن مۇمكىن. بىراق مەديتسينادا «اۋىرىپ ەم ىزدەگەنشە، اۋىرماۋدىڭ جولىن ىزدە» دەگەن ءدوپ ايتىلعان سوزگە توقتايمىز. ياعني كەز كەلگەن ازامات جەڭىل اۋرۋدى اسقىندىرىپ الماي ۋاقىتىندا دياگنوستيكادان ءوتۋى قاجەت. سول سەكىلدى كلاتسكين ىسىگىنىڭ سوڭعى ساتىسىندا ناۋقاستى ەمدەۋ كۇردەلەنەدى. ءتىپتى 95 پايىز جاعدايدا ىسىك ارتەريا مەن قاقپالىق كوكتامىرعا ءبىتىپ كەتەتىندىكتەن، وپەراتسيا جاساۋ دا مۇمكىن بولمايدى ەكەن. ياعني مۇنداي دياگنوزبەن وپەراتسيا جاساتاتىندار ساناۋلى دەگەن ءسوز. دارىگەرلەردىڭ كومەگىمەن كلاتسكين ىسىگى دەر كەزىندە انىقتالىپ، وپەراتسيا جاساعان ناۋقاس جايىندا گەپاتوبيليارلى حيرۋرگ، ترانسپلانتولوگ ابىلايحان شارمەنوۆ ايتىپ بەرگەن ەدى.

– ەمحانامىزعا قاراعاندىدان 70 جاستاعى ايەل جۇگىندى. قاراشا ايىندا سارعايۋ بەلگىلەرى بايقالعان ەكەن. ناۋقاستىڭ دەنساۋلىعىن تەكسەرە كەلە، گەپاتوپانكرەاتوبيليارلى حيرۋرگيا، ونكوگەپاتولوگيا جانە ترانسپلانتاتسيا ورتالىعىنىڭ ماماندارى كلاتسكين ىسىگىن انىقتادى. اۋرۋ باستاپقى ساتىدا بولعانىمەن، سول جاق ءوت جولدارىن زاقىمداپ ۇلگەرگەن. پاتسيەنتتىڭ ينفاركت جانە جۇرەكتى شۋنتتاۋ سەكىلدى قوسالقى اۋرۋلارى بولعانىنا قاراماستان، دارىگەرلىك كونسيليۋم وتكىزىپ، وپەراتسيا جاساۋ تۋرالى شەشىم قابىلداندى. باۋىرىنىڭ 70 پايىزىن الىپ تاستادىق. قازىرگى تاڭدا ناۋقاس بەلسەندى. ورنىنان تۇرىپ، تاماق ءىشىپ، ءتىپتى جۇگىرە دە الادى، – دەيدى دارىگەر.

ال پاتسيەنت كەز كەلگەن سىرقاتقا جەڭىل قاراۋعا بولمايتىنىن ايتۋدا. سونىمەن قاتار ول ەل تۇرعىندارىن جىل سايىن مەديتسينالىق تەكسەرۋدەن ۋاقتىلى وتۋگە شاقىردى.