قۇرمەتتى سايلاۋشىلار!
2023 جىلى 19 ناۋرىز قازاقستان رەسپۋبليكاسى پارلامەنتى ءماجىلىسى مەن ءماسليحاتتارى دەپۋتاتتارىنىڭ سايلاۋى وتەدى.
سايلاۋعا قاتىسۋعا كونستيتۋتسيالىق قۇقىقتى ىسكە اسىرۋدىڭ كەپىلى ءسىزدىڭ سايلاۋشىلار تىزىمىنە ەنگىزىلۋىڭىز بولىپ تابىلادى.
تىزىمدەردى داۋىس بەرۋگە ارنالعان ناقتى ۋچاسكەنىڭ اۋماعىندا تۇرعىلىقتى جەرى بويىنشا تۇراقتى تىركەۋ نەگىزىندە جەرگىلىكتى اتقارۋشى ورگاندار (اكىمدىكتەر) جاسايدى. تۇراقتى تىركەۋى جوق ازاماتتار تىزىمدەرگە ولاردىڭ ورنالاسقان جەرى بويىنشا اكىمدىكتەرگە بەرگەن ءوتىنىشىنىڭ نەگىزىندە ەنگىزىلەدى.
داۋىس بەرۋ كۇنى ءوزىنىڭ تىركەلگەن جەرى بويىنشا سايلاۋ ۋچاسكەسىنە كەلە المايتىن ءاربىر ازامات داۋىس بەرۋ كۇنىنە وتىز كۇن قالعاندا, ياعني 2023 جىلى 17 اقپاننان كەشىكتىرمەي ءتيىستى اكىمدىككە ءوتىنىش بەرىپ, ءوزىنىڭ ناقتى ورنالاسقان جەرى بويىنشا سايلاۋ ۋچاسكەسىندە تىركەلۋگە قۇقىلى.
ءوتىنىش تۇسكەن كەزدە اكىمدىك ازاماتتى تىركەلگەن جەرى بويىنشا سايلاۋشىلار تىزىمىنەن شىعارۋدى جانە ونى داۋىس بەرەتىن ۋچاسكەنىڭ تىزىمىنە ەنگىزۋدى ۇيىمداستىرادى.
وسى قۇقىقتى:
- داۋىس بەرۋ كۇنى تىركەلگەن جەرى بويىنشا بولمايتىنىن بىلەتىن ازاماتتار;
- باسقا قالادان كەلگەن, ارناۋلى جوعارى جانە ورتا وقۋ ورىندارىندا وقيتىن, جاتاقحانالاردان تىس تۇراتىن ستۋدەنتتەر;
- ۆاحتالىق ادىسپەن جۇمىس ىستەيتىن ازاماتتار پايدالانا الادى.
ازامات, ءبىرتۇتاس جالپىۇلتتىق سايلاۋ وكرۋگىن, سونىمەن قاتار بىرمانداتتىق اۋماقتىق سايلاۋ وكرۋگتەرىن ەسكەرە وتىرىپ, سايلاۋشىلاردىڭ ءبىر عانا تىزىمىنە ەنگىزىلە الادى.
سايلاۋشىلار تىزىمىنە تىركەلگەن جەرىڭىز بويىنشا ەنگىزىلگەنىڭىزدى ءتيىستى اكىمدىكتىڭ سايتى نەمەسە Call-ورتالىعى ارقىلى تەكسەرۋگە بولادى.
2023 جىلى 4 ناۋرىزدان باستاپ سىزگە ءوز ۋچاسكەڭىزدەگى سايلاۋشىلار تىزىمىندەگى دەرەكتەرىڭىزدى تەكسەرۋ مۇمكىندىگى بەرىلەتىن بولادى.
قۇرمەتتى سايلاۋشىلار!
سىزدەردى قۇقىقتىق ساۋاتتىلىق تانىتىپ, ءوزىڭىزدىڭ سايلاۋعا قاتىسۋعا كونستيتۋتسيالىق قۇقىعىڭىزدى ىسكە اسىرۋعا شاقىرامىز!
ءوزىڭىزدى سايلاۋشىلار تىزىمىنە ەنگىزۋگە قاجەتتى زاڭدىق ماڭىزى بار ارەكەتتەردى ۋاقتىلى قابىلداڭىز!
اركىمنىڭ داۋىسى ماڭىزدى!
