تىرەك جانە سەرىكتەس ەلدى مەكەندەر تىزبەسىنە ەنگىزىلگەن وسىنشا اۋىلعا ەل قازىناسىنان وتكەن ءۇش جىلدا 326 ملرد تەڭگە قارجى ءبولىنىپ, ول 334 تۇرعىن ءۇي-كوممۋنالدىق شارۋاشىلىق وبەكتىسىن, 1,2 مىڭ ءبىلىم بەرۋ, دەنساۋلىق ساقتاۋ, سپورت مەكەمەسىن جانە 2 مىڭنان استام اۋىلىشىلىك جولدى سالۋعا جانە جوندەۋگە جۇمسالىپتى. بيىل 736 اۋىلدىڭ وسىنداي مۇقتاجدىقتارىن شەشۋگە 143 ملرد تەڭگە ءبولىنىپ وتىر. ءجون-اق. تەك «كەلەشەگى جوق» دەگەن قاتاڭ ۇكىم كەسىلىپ, قالتاسىنىڭ ءتۇبى تەسىك جەرگىلىكتى بيۋدجەتتەن قارجىلاندىرۋعا قالدىرىلعان 2 793 اۋىلدىڭ جاعدايى قالاي بولار ەكەن دەگەن وي مازالايدى. ويتكەنى ولاردا دا ادامدار تۇرادى عوي...
...وسىدان ءۇش جارىم جىلداي بۇرىن سولتۇستىك قازاقستان وبلىسىنىڭ ورتالىعىنان 560 شاقىرىمداي شالعاي تۇكپىردەگى قۋلىكول اۋىلىنا جولىمىز تۇسكەنى بار. سول ماڭايداعى تالاي ەلدى مەكەننىڭ توز-توزى شىعىپ, جابىلىپ جاتقاندا جولى ناشار, قيان شەتتەگى قۋلىكولدىڭ ىرگەسى سوگىلمەگەنى قايران قالدىرعان. قايماعى بۇزىلماعان قازاق اۋىلىندا 190 وتباسى, ياعني ءبىر مىڭعا جۋىق ادام تۇرادى ەكەن. جەرگىلىكتى ورتا مەكتەپتە 190-نان استام وقۋشى انا تىلىندە ءبىلىم الىپ ءجۇر. تويى تويعا ۇلاسقان ەلدى مەكەننىڭ ەكى جاعىندا ەكى كافە اشىلىپتى. ەجەلدەن اتا كاسىبىنە مىعىم قۋلىكولدىكتەردىڭ ورىستەرى ءتورت ت ۇلىك مالعا تولى بولىپ شىقتى. ايتسە دە وسى قۇت-بەرەكە قونعان اۋىل اۋدان ورتالىعىنان 180 شاقىرىم قاشىقتىقتا ورنالاسقاندىعى سەبەپتى تىرەك جانە سەرىكتەس ەلدى مەكەندەر تىزبەسىنە ەنگىزىلمەپتى. اۋىل تۇرعىندارى: «اۋىل – ەل بەسىگى» جوباسىنا ەنگىزىلسەك, رەسپۋبليكالىق بيۋدجەتتەن بىزگە دە قاجەتتى قارجى ءبولىنىپ, ەڭ باستى مۇقتاجدىعىمىز – اۋىلىمىزدىڭ جولى جوندەلەر مە ەدى؟..» دەپ مۇڭايعان ەدى. ايتەۋىر, ءساتىن سالعاندا, كەيىن بۇل ماسەلەگە پارلامەنت ءماجىلىسىنىڭ التىنشى شاقىرىلىمداعى دەپۋتاتتارى ارالاسىپ, قۋلىكول اۋىلى تىرەك ەلدى مەكەن اتاندى.
ال اسا كورنەكتى جازۋشى عابيت مۇسىرەپوۆ دۇنيەگە كەلگەن قىزىلجار وڭىرىندەگى جاڭاجول اۋىلى جاقىن تىرەك اۋىلدان 65 شاقىرىم قاشىقتىقتا ورنالاسۋى سەبەپتى سەرىكتەس ەلدى مەكەن ساناتىنا دا قوسىلماي قالىپتى. ويتكەنى ۇلتتىق ەكونوميكا ءمينيسترىنىڭ «اۋىلدىق ەلدى مەكەندەردى ايقىنداۋعا ارنالعان ولشەمشارتتاردى بەكىتۋ تۋرالى» 2019 جىلعى 13 قىركۇيەكتەگى №81 بۇيرىعىنا سايكەس سەرىكتەس اۋىل جاقىن تىرەك اۋىلدان 15 شاقىرىمنان ارتىق قاشىقتىقتا ورنالاسپاۋعا ءتيىستى ەكەن. سول ولشەمشارتتى وزگەرتىپ, جاڭاجول اۋىلىن تىرەك ەلدى مەكەن رەتىندە ايقىنداپ, وعان كورشىلەس ورنالاسقان بىرنەشە اۋىلدى سەرىكتەس ەلدى مەكەندەر ەتىپ بەلگىلەۋگە نەگە بولماسىن؟! ايتپەسە, جولى ناشار وسى اۋىلدار قۋاتتى مەملەكەتتىك قولداۋدان قاعىس قالىپ, بىرتىندەپ تاراپ, جويىلىپ كەتۋى مۇمكىن.
جۋىردا سولتۇستىك قازاقستان وبلىسىنىڭ ايىرتاۋ اۋدانىنداعى اتىنا زاتى ساي بىرلەستىك اۋىلى تىرەك ەلدى مەكەن بولىپ بەلگىلەنگەنىن ءبىلىپ قۋانىپ قالدىق. وعان 11 شاقىرىم قاشىقتىقتاعى, باستاۋىش مەكتەبى, قىرىق شاقتى عانا ءۇيى قالعان قاراقامىس اۋىلى سەرىكتەس بولىپ ايقىندالىپتى. ال مۇنداي مارتەبە 23 شاقىرىم جەردە ورنالاسقان, ورتا مەكتەبى بار, جەتپىس شاقتى شاڭىراق ءتۇتىن تۇتەتىپ وتىرعان داۋقارا اۋىلىنا بۇيىرماپتى...
جالپى, «كەلەشەگى جوق» دەپ تانىلعان اۋىلداردىڭ كوبى – ەلىمىزدىڭ جۇمىس كۇشى تاپشى سولتۇستىك-شىعىس وڭىرلەرىندە. سوندىقتان ۇلتتىق ەكونوميكا مينيسترلىگى جۇمىس كۇشى ارتىق وڭىرلەردىڭ تۇرعىندارى ءوز ەرىكتەرىمەن قونىس اۋدارىپ جاتقان اقمولا, قاراعاندى, قوستاناي, سولتۇستىك قازاقستان, پاۆلودار, شىعىس قازاقستان وبلىستارى ءۇشىن ارنايى ولشەمشارتتار بەلگىلەگەنى ءجون سياقتى.
ء«ۇمىتسىز – شايتان» دەمەكشى, ەندىگى ءۇمىت – ۇكىمەت باسشىسى ءاليحان سمايىلوۆتىڭ ۇلتتىق ەكونوميكا مينيسترلىگىنە اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسىن ازىرلەۋ بارىسىندا بولاشاعى بار اۋىلداردى ايقىنداۋ ادىستەرىن وزەكتەندىرۋدى تاپسىرعانىندا. ايتپەسە, قازىر ءتۇتىنى ءبىرشاما ءتۇزۋ ۇشىپ وتىرعان تالاي اۋىل ەل بەسىگى بولماق تۇگىل, ازىپ-توزىپ, تۇبىندە تەك جۇرتى عانا قالۋى عاجاپ ەمەس.
