اۋستراليانىڭ اشىق بىرىنشىلىگىنىڭ 117 جىلدىق تاريحى بار. اتالعان جارىستىڭ تۇساۋى سوناۋ 1905 جىلى كەسىلگەن. «Australasian Championships» دەپ اتالعان العاشقى تۋرنيردە 17 تەننيسشى باق سىنادى. رودني حيت پەن ارتۋر كەرتيس اراسىنداعى فينالدىق سايىستى 5 مىڭ كورەرمەن تاماشالاعان ەكەن. 1927 جىلى بۇل جارىس ءوز اتاۋىن «Australian Championships» دەپ وزگەرتسە, 1969 جىلدان بەرى ول اۋستراليانىڭ اشىق بىرىنشىلىگى دەپ اتالىپ كەلەدى.
- بۇل جارىس ءار جىلدارى اۋستراليانىڭ ءتۇرلى قالالارىندا ءوتتى. اتاپ ايتساق, مەلبۋرندە – 54 رەت, سيدنەيدە – 17 رەت, ادەلايدادا – 14 رەت, بريسبەندە – 7 رەت, پەرتتە – 3 رەت. سونداي-اق 1906 جانە 1912 جىلدارداعى باسەكەلەر جاڭا زەلانديانىڭ اۋماعىندا ۇيىمداستىرىلدى.
- اۋستراليانىڭ اشىق بىرىنشىلىگىندە ەرلەر اراسىندا ەڭ كوپ ولجاعا كەنەلگەن ويىنشى – نوۆاك دجوكوۆيچ. سەربيانىڭ ساڭلاعى 2008, 2011-2013, 2015-2016, 2019-2021 جىلدارى وتكەن تۋرنيرلەردە قارسىلاس شاق كەلتىرمەدى. بارلىعى – 9 جەڭىس. روي ەمەرسون (اۋستراليا) مەن رودجەر فەدەرەر (شۆەيتساريا) 6 رەتتەن توپ جاردى.
- ايەلدەر سايىسىندا مارگارەت سميت-كورتتىڭ الدىنا تۇسەتىن ەشكىم جوق. اۋستراليا تەننيسشىسىنىڭ 1960 جىلى باستالعان جەڭىستى جولى 1973 جىلعا دەيىن جالعاستى. جاڭا وڭتۇستىك ۋەلس شتاتىنا قاراستى ولبەري قالاسىنىڭ تۋماسى سول ارالىقتا 11 رەت باس جۇلدەنى ولجالادى. سميت-كورتتان بولەك, امەريكالىق سەرەنا ۋيليامس (7 رەت) جانە قوس اۋستراليالىق نەنسي ۋينن-بولتون (6 رەت) مەن دافنا اكحەرست تە (5 رەت) مول ولجاعا كەنەلدى.
- ال بارلىق سايىس تۇرلەرىن قوسا العاندا مىنا تەننيسشىلەردىڭ تابىسى زور: ەرلەر – ادريان كۆيست (1936-1950 جىلدارى) – 13 جەڭىس, دجەك كروۋفورد (1929-1935) – 11 جەڭىس, دجون برومۆيچ – (1938-1950) – 11 جەڭىس. ايەلدەر – مارگارەت سميت-كورت (1960-1973) – 22 جەڭىس, نەنسي ۋينن-بولتون (1926-1951) – 20 جەڭىس, تەلما لونگ (1936-1958) – 18 جەڭىس.
- جەكەلەگەن, جۇپتىق جانە ارالاس جۇپتار اراسىنداعى جارىستاردىڭ بارلىعىندا جەڭىسكە جەتكەن ساناۋلى عانا ويىنشى بار. ولار – دافنا اكحەرست (1925, 1928-1929), دجون كوكس (1926), جان بوروترا (1928), دجەك كروۋفورد (1932), نەنسي ۋينن-بولتون (1940, 1947-1948), تەلما لونگ (1952) جانە مارگارەت سميت-كورت (1963).
- حح عاسىردىڭ ەكىنشى جارتىسىندا ونەر كورسەتكەن اۋستراليانىڭ ماقتانىشى كەن روزۋوللدىڭ تولاعاي تابىسىنا تامسانباۋ مۇمكىن ەمەس. ول وسى جارىستى ۇتقان ەڭ جاس جانە ەڭ «قارت» ويىنشىلاردىڭ كوشىن باستاپ تۇر. 1953 جىلى مەلبۋرندە روزۋولل دارا شىقتى. ول كەزدە كەن نەبارى 18 جاستا ەدى. ءدال سول تەننيسشى 1972 جىلى, ياعني اراعا 19 جىل سالىپ, تاعى دا توپ جاردى. ول كەزدە جاسىل قۇرلىقتىڭ وكىلى 37 جاستان اسقان-تىن.
- ايەلدەر اراسىنداعى جارىستىڭ ەڭ جاس جەڭىمپازى – مارتينا حينگيس. 1997 جىلى مەلبۋرندە اتوي سالعاندا شۆەيتساريانىڭ سۇلۋى نەبارى 16 جاستا ەدى. ەڭ «قارت» جەڭىمپاز – تەلما لونگ. ول 1954 جىلى باس جۇلدەنى يەلەندى. ول كەزدە اۋستراليانىڭ تەننيسشىسى 36 جاسقا تاياپ قالعان ەدى.
- 2012 جىلعى ءتۋرنيردىڭ فينالدىق ماتچىندا سەربيالىق نوۆاك دجوكوۆيچ پەن يسپانيالىق رافاەل نادال 353 مينۋت بويى ايقاسىپ, العاشقىسى 5:7 6:4 6:2 6:7, 7:5 ەسەبىمەن جەڭىسكە جەتتى. بۇل – ەڭ ۇزاققا سوزىلعان باسەكە. ايەلدەر جايىندا ايتار بولساق, 2011 جىلى يتاليالىق فرانچەسكا سكياۆونە مەن رەسەيلىك سۆەتلانا كۋزنەتسوۆا اراسىندا وتكەن باسەكە 284 مينۋتقا سوزىلدى. بۇل تارتىس 6:4, 1:6, 16:14 ەسەبىمەن اپەننين تۇبەگىنەن كەلگەن ارۋدىڭ پايداسىنا شەشىلدى.
- بىلتىر وتكەن ءتۋرنيردىڭ ەرلەر اراسىنداعى باسەكەسى رافاەل ءنادالدىڭ جەڭىسىمەن اياقتالدى. يسپانيا تەننيسشىسى اقتىق سىندا رەسەيدىڭ مىقتىسى دانيل مەدۆەدەۆتەن 2:6 6:7, 6:4 6:4 7:5 ەسەبىمەن ايلاسىن اسىردى. ايەلدەر اراسىندا ەشلي ءبارتيدىڭ باعى جاندى. جەرگىلىكتى تەننيسشى فينالدا امەريكالىق دانيەل كوللينزدى قاپى قالدىردى. ەسەپ – 6:3, 7:6.
- بيىلعى جارىستىڭ جەكەلەگەن سايىسىندا قازاقستان اتىنان ەلەنا رىباكينانىڭ, الەكساندر بۋبليك پەن يۋليا پۋتينتسەۆانىڭ باق سىنايتىندارى بەلگىلى. سونداي-اق اندرەي گولۋبەۆ, الەكساندر نەدوۆەسوۆ جانە اننا دانيلينانىڭ جۇپتىق سايىستاعى ونەرىن تاماشالايمىز.
- ەرلەر اراسىندا جەڭىمپاز اتانعان تەننيسشىگە نورمان برۋكس كۋبوگى تابىس ەتىلەدى. 90 جىل عۇمىر كەشكەن مەلبۋرننىڭ تۋماسى ءوز وتانىندا وسى سپورت ءتۇرىنىڭ كەڭىنەن قۇلاش جايۋىنا سۇبەلى ۇلەس قوستى. ول 1911 جىلى ءدال وسى تۋرنيردە قارسىلاس شاق كەلتىرمەگەن ەدى. سونىمەن قاتار برۋكس 1924 جىلى جۇپتىق سايىستا الدىنا جان سالمادى. ايەلدەر اراسىندا شاشاسىنا شاڭ جۇقتىرماعان ويىنشىعا دافنا اكحەرستتىڭ كۋبوگى تابىستالادى. ونى دا ءوز وتانداستارى ەرەكشە قۇرمەتتەيدى. اتالعان جارىستا اكحەرست بەس رەت (1925-1926, 1928-1930) باس جۇلدەنى ولجالادى.
